নিউজ ডেস্ক, ২৬ ছেপ্টেম্বৰ: চাকৰি প্ৰত্যাশীসকলৰ বাবে এক ভাল খবৰ লৈ আহিছে ভাৰতীয় ৰে’ল বিভাগে ৷ যিসকলে ৰে’ল বিভাগত চাকৰি কৰাৰ আশা মনত পুহি ৰাখিছে, তেওঁলোকৰ আশা অতি সোনকালেই পূৰণ হোৱাৰ পথত ৷ কিয়নো ৰে’ল বিভাগত চাকৰি ওলাইছে ৷ আকৰ্ষণীয় দৰমহা তথা অন্যান্য সা-সুবিধাসহ এক সন্তোষজনক দৰমহা লাভ কৰিব নিযুক্তি লাভ কৰা প্ৰাৰ্থীয়ে ৷ এন টি পি চি (নন টেকনিকেল পপুলাৰ কেটেগৰী) ৰ খালী পদ পূৰণৰ বাবে ৰে’ল বিভাগে এক অধিসূচনা জাৰি কৰিছে ।
মুঠ খালী পদৰ সংখ্যা: একেলগে পূৰণ কৰা হ’ব ৮১১৩ টা খালী পদ । ইয়াৰ ভিতৰত আছে মুখ্য বাণিজ্যিক-টিকট তত্বাৱধায়কৰ ১৭৩৬ টা, ষ্টেচন মাষ্টাৰৰ ৯৯৪ টা, গুডছ ট্ৰেইন মেনেজাৰৰ ৩১৪৪ টা, জুনিয়ৰ একাউণ্ট এচিষ্টেণ্ট-টাইপিষ্টৰ ১৫০৭ টা আৰু ছিনিয়ৰ কেৰাণী-টাইপিষ্টৰ ৭৩২ টা পদ ।
দৰমহা: মুখ্য বাণিজ্যিকসহ টিকট তত্বাৱধায়ক আৰু ষ্টেচন মাষ্টাৰ দুটা লেভেল-৬ ৰ চাকৰি । আৰম্ভণিৰ দৰমহা পাব ৩৫,৪০০ টকা । ডি এ, এইচ আৰ এ আৰু আন সকলো ভাট্টাকে ধৰি প্ৰথম মাহৰ পৰা কমেও ৬৫ হাজাৰ টকা দৰমহা লাভ কৰিব । বাকীবোৰ লেভেল-৫ ৰ চাকৰি । ২৯,২০০ টকাৰ মৌলিক দৰমহা লাভ কৰাৰ বিপৰীতে ডি এ, এইচ আৰ এ আদি ভাট্টাকে ধৰি ৫৫ হাজাৰ টকা দৰমহা পাব নিযুক্তি লাভ কৰা প্ৰাৰ্থীয়ে ।
নিযুক্তি কেনেকুৱা হ’ব: ওপৰত উল্লেখ কৰা সকলো পদৰ বাবে দুটা পৰ্যায়ত কম্পিউটাৰ ভিত্তিক টেষ্ট (CBT) হ’ব । যদি আপুনি ষ্টেচন মাষ্টাৰ পদৰ বাবে আবেদন কৰিছে তেন্তে আপুনি অতিৰিক্তভাৱে কম্পিউটাৰ ভিত্তিক যোগ্যতা পৰীক্ষা (CBAT)ত উপস্থিত থাকিব লাগিব । টাইপিষ্টৰ পোষ্টৰ বাবে টাইপিং স্কিল টেষ্ট (TST)ও আছে । ইয়াৰ ভিতৰত যিসকলে প্ৰতিভা প্ৰদৰ্শন কৰে তেওঁলোকক বাছনি কৰা হয়, তেওঁলোকৰ প্ৰমাণ পত্ৰ পৰীক্ষা কৰা হয়, স্বাস্থ্য পৰীক্ষা কৰা হয় আৰু তেওঁলোকক পোনপটীয়াকৈ নিযুক্তি দিয়া হয় ।
যোগ্যতা: এই চাকৰিসমূহৰ বাবে আবেদন কৰা প্ৰাৰ্থীৰ যিকোনো ডিগ্ৰী থাকিব লাগিব । ২০২৫ চনৰ ১ জানুৱাৰীলৈকে ১৮ ৰ পৰা ৩৬ বছৰ বয়সৰ ভিতৰৰ লোকসকলে যোগ্যতা অৰ্জন কৰিব পাৰিব । অনুসূচিত জাতি আৰু অনুসূচিত জনজাতিৰ বাবে পাঁচ বছৰ আৰু অন্যান্য পিছপৰা শ্ৰেণীৰ প্ৰাৰ্থীৰ বাবে বাবে তিনি বছৰ বয়সৰ শেষসীমা ৰেহাই দিয়া হ’ব ।
আবেদন প্ৰক্ৰিয়া আৰু মাচুলৰ বিৱৰণ: অনলাইন আবেদন কৰিব লাগিব । আৱেদন দাখিলৰ অন্তিম তাৰিখ ১৩ অক্টোবৰ ২০২৪ । অনুসূচিত জাতি, অনুসূচিত জনজাতি, বিশেষভাৱে সক্ষম, মহিলা, প্ৰাক্তন সেনাবাহিনী, তৃতীয় লিংগ, সংখ্যালঘু, অতি পিছপৰা শ্ৰেণীয়ে ২৫০ টকা আৰু আনসকলে ৫০০ টকা দিব লাগিব ।
পৰীক্ষাৰ তাৰিখ: পৰীক্ষাৰ তাৰিখ এতিয়াও ঘোষণা কৰা হোৱা নাই । অতি সোনকালে ঘোষণা কৰা হ'ব । এই চাকৰিৰ বাবে আবেদন কৰিব বিচৰাসকলে এই ৱেবচাইট https://www.rrbapply.gov.in/ যোগেদি আবেদন কৰিব পাৰিব ।
লগতে পঢ়ক: এপলত নিয়োগৰ সুবিধা : কেতিয়া হ’ব নিযুক্তি প্ৰক্ৰিয়া ? - Job opportunity in Apple India
ADRE পৰীক্ষাৰ অ' এম আৰ শ্বীট কিদৰে লাভ কৰিব ? - Assam CM Himanta Biswa Sarma
