তেজপুৰ, 8 জুলাই: অন্ত পৰা নাই মণিপুৰৰ অশান্তজৰ্জৰ পৰিস্থিতিৰ ৷ লোকসভাৰ বিৰোধী দলপতি ৰাহুল গান্ধীৰ মণিপুৰ ভ্ৰমণৰ পূৰ্বে মণিপুৰ আৰক্ষীৰ সৈতে গুলীচালনা কুকি উগ্ৰপন্থীৰ । ঘটনা সন্দৰ্ভত আৰক্ষীয়ে আটক কৰে দুজন লোকক । এই তথ্য সদৰী কৰিছে জিৰিবাম জিলাৰ আৰক্ষী অধীক্ষক প্ৰদীপ সিঙে ।
আৰক্ষী অধীক্ষক গৰাকীয়ে প্ৰকাশ কৰা অনুসৰি সোমবাৰে পুৱতি নিশা প্ৰায় 3 বজাত জিৰিবামৰ লেইনগাংপকপি অঞ্চলত মণিপুৰ আৰক্ষীৰ সৈতে কুকি উগ্ৰপন্থীৰ গুলীচালনাৰ ঘটনা সংঘটিত হৈছে ৷ গুলীচালনাৰ ঘটনা সংঘটিত হোৱা স্থানৰ পৰা জিৰিবাম আৰক্ষী থানাৰ দূৰত্ব মাত্ৰ ছয় কিল’মিটাৰ ৷ এই ঘটনাৰ পাচত আৰক্ষীৰ এটা দল আৰু অগ্নিনিৰ্বাপক বাহিনী ঘটনাস্থলীত উপস্থিত হয় ৷ কুকি উগ্ৰপন্থীসকলে এই দলটোৰ ওপৰতো গুলীচালনা কৰে ৷
ঘটনাস্থলীত উপস্থিত আৰক্ষীৰ দলটোৱে অকলে পৰিস্থিতি নিয়ন্ত্ৰণ কৰিব নোৱাৰি 39 নং অসম ৰাইফলছৰ সহায় বিচাৰে ৷ পৰৱৰ্তী সময়ত অসম ৰাইফলছৰ দলে এই ঘটনাত জড়িত থকাৰ সন্দেহত আটক কৰে দুজন লোকক ৷
ইয়াৰ পিচত পুৱা প্ৰায় 9.30 বজাত একাংশ অচিনাকী লোকে জিৰিবামৰ ৰবৰ ফাৰ্মৰ সমীপত থকা এখন ফাৰ্মত অগ্নিসংযোগ কৰাৰ লগতে লালপানী এলেকাত থকা স্থানীয় লোকসকলৰ বাসগৃহতো অগ্নিসংযোগ কৰে ৷ অৱশ্যে ঘটনাস্থলীত উপস্থিত হৈ সমগ্ৰ ঘটনা নিয়ন্ত্ৰণ কৰে মণিপুৰ আৰক্ষী আৰু চি আৰ পি এফৰ দলে ৷
ঘটনা সংক্ৰান্তত জিৰিবামৰ আৰক্ষী অধীক্ষকে প্ৰকাশ কৰা তথ্য অনুসৰি, পুনৰ 11.30 বজাত জিৰিবামৰ গোলাৰ্থল এলেকাত কেইবাটাও ঘৰ জ্বলাই দিয়ে অচিনাক্ত দুৰ্বৃত্তই ৷ পৰৱৰ্তী সময়ত আৰক্ষী আৰু অসম ৰাইফলছৰ দলে পৰিস্থিতি নিয়ন্ত্ৰণ কৰে । এই দুয়োটা কাণ্ডতে কুকি উগ্ৰপন্থী জড়িত থকাৰ বিষয়ে তথ্য লাভ কৰে আৰক্ষীয়ে ৷
উল্লেখ্য যে, ৰাহুল গান্ধীৰ মণিপুৰ ভ্ৰমণৰ পূৰ্বে সংঘটিত হোৱা এই ঘটনাৰ চাঞ্চল্যকৰ ভিডিঅ’ সম্প্ৰতি পোহৰলৈ আহিছে ৷ বিগত জুন মাহৰে পৰা মণিপুৰত বিৰাজ কৰিছে অশান্তজৰ্জৰ পৰিস্থিতিয়ে ৷ এজন যুৱকৰ প্ৰথমে নিৰুদ্দেশ আৰু তাৰপিচত মৃতদেহ উদ্ধাৰক কেন্দ্ৰ কৰি এই পৰিস্থিতিৰ সূত্ৰপাত ঘটিছিল ৷ পৰৱৰ্তী সময়ত এই পৰিস্থিতিয়ে অধিক ভয়ংকৰ ৰূপ ধাৰণ কৰে ৷
গোষ্ঠীগত সংঘৰ্ষই এনে পৰ্যায় পায় যে, জিৰিবামৰ পৰা বহুসংখ্যক লোকে প্ৰাণৰ মমতাত পলাই আহি কাছাৰৰ লক্ষীপুৰ অঞ্চলত আশ্ৰয় লয় ৷ ঘটনাৰ কিছু সময়ৰ পিচতেই ৰাহুল গান্ধীয়ে জিৰিবামত থকা আশ্ৰয় শিবিৰ পৰিদৰ্শন কৰে আৰু পুনৰ উভতি আহি শিলচৰ বিমানবন্দৰৰ পৰা ইম্ফল বিমানবন্দৰলৈ ৰাওনা হয় ।
জিৰিবামৰ আৰক্ষী অধীক্ষকে টেংনোপোল জিলাৰ সমীপত ৰবৰ বাগানৰ সমীপৰ পাহাৰীয়া অঞ্চলত আৰক্ষী আৰু সুৰক্ষা বাহিনীয়ে উগ্ৰপন্থী বিৰোধী অভিযান আৰম্ভ কৰা বুলি সদৰী কৰিছে ৷
