তেজপুৰ, ১০ ছেপ্টেম্বৰ : হিংসা আৰু প্ৰতিহিংসাৰ দাবানলে পুনৰ দহিছে মণিপুৰ । প্ৰায় ডেৰ বছৰ ধৰি চলা গোষ্ঠীগত সংঘৰ্ষৰ ঘা টুকুৰা কিছু পৰিমাণে শুকাবলৈ আৰম্ভ কৰিছিল যদিও পুনৰ যেন তাত চেঙা তেল পৰিছে । যাৰ ফলত পুনৰ উত্তপ্ত হৈ পৰিছে মণিপুৰৰ পৰিস্থিতি ।
বিশেষকৈ বিগত ১ ছেপ্টেম্বৰৰ উগ্ৰপন্থীৰ আক্ৰমণত ৯ জন লোকে প্ৰাণ হেৰুৱাবলগা হোৱা আৰু বহুজন গুৰুতৰভাৱে আহত হৈ চিকিৎসাধীন হৈ থকা ঘটনাৰ পিছত এতিয়া ক্ৰমাৎ নিয়ন্ত্ৰণৰ বাহিৰলৈ গৈছে মণিপুৰৰ আইন-শৃংখলা পৰিস্থিতি । তাৰ মাজতে প্ৰধানমন্ত্ৰীৰ মণিপুৰৰ পৰিস্থিতিক লৈ নিৰুদ্বেগচিত আচৰণে যেন জ্বলা জুইত ঘিঁউ ঢালিছে ।
শেহতীয়া ৰকেট আৰু ড্ৰোন আক্ৰমণৰ পিছতে পুনৰ জাঙুৰ খাই উঠিছে সমগ্ৰ মণিপুৰ । আনহাতে, চৰকাৰে বিভিন্ন শিক্ষানুষ্ঠান বন্ধ ঘোষণা কৰাৰ লগতে ইণ্টাৰনেট সেৱা স্থগিত ৰখাৰ সময়তে দেখিবলৈ পোৱা গৈছে প্ৰধানমন্ত্ৰী নৰেন্দ্ৰ মোদীৰ পোষ্টাৰ ৰাজহুৱা স্থানৰ পৰা আঁতৰাই দিছে প্ৰতিবাদী জনতাই ।
প্ৰধানমন্ত্ৰী নৰেন্দ্ৰ মোদীৰ ফলকত আক্ৰমণ
মণিপুৰৰ ইম্ফল চহৰত প্ৰতিবাদী ছাত্ৰ সংগঠন আৰু বিভিন্ন প্ৰতিবাদী লোকে ৰাজপথত থকা প্ৰধানমন্ত্ৰী নৰেন্দ্ৰ মোদীৰ ফটো থকা বেনাৰসমূহ ফালি পেলায় । হিংসাজৰ্জৰ মণিপুৰৰ ছাত্ৰ সংগঠনে চহৰৰ মাজমজিয়াত থকা মোদীৰ বিভিন্ন পোষ্টাৰ ফালি আঁতৰাই দিয়ে । ক্ষোভিত জনতাই প্ৰধানমন্ত্ৰী নৰেন্দ্ৰ মোদীৰ বিৰুদ্ধে ক্ষোভৰ তীব্ৰ উদ্গীৰণ ঘটায় ।
লিচিপ্ৰিয়া কাংগুজামৰ ক্ষোভ
লিচিপ্ৰিয়া কাংগুজাম মণিপুৰৰ এগৰাকী ১২ বছৰীয়া প্ৰকৃতিপ্ৰেমী যুৱতী । তেওঁ মঙলবাৰে এক্সত লিখিছে, "ভাৰতৰ এই হিন্দু মেইটেইৰ শ শ হাজাৰ লোকে কিয় কেন্দ্ৰীয় চৰকাৰৰ বিৰুদ্ধে ইমান ক্ষুব্ধ হৈছে সেই বিষয়ে গভীৰভাৱে চিন্তা কৰা উচিত ! বিগত ১৬ মাহ স্নাইপাৰ, আৰ পি জি, ড্ৰোন, বোমা আৰু ৩ শতাধিক গাঁও আক্ৰমণৰ কবলত, আৰক্ষী আৰু সেনাই কোনো ধৰণৰ ‘উল্লেখযোগ্য সঁহাৰি’ জনোৱা নাই । 'কুকি' সন্ত্ৰাসবাদৰ অন্ত পৰিব লাগিব । মণিপুৰৰ নাগৰিকে শান্তি কামনা কৰে ।"
তেওঁ পুনৰ উল্লেখ কৰে যে মণিপুৰৰ ছাত্ৰ সংগঠনে কুকি উগ্ৰপন্থীৰ বিৰুদ্ধে ব্যৱস্থা গ্ৰহণৰ দাবী জনাইছে । কাৰণ শেহতীয়াকৈ বেলেষ্টিক মিছাইলৰ দ্বাৰা আক্ৰমণ সংঘটিত কৰিছে ।
ছাত্ৰ সংগঠনৰ প্ৰতিবাদ
আনহাতে, মণিপুৰৰ দুখন জিলাত জিলা প্ৰশাসনে সান্ধ্য আইন জাৰি কৰাৰ কেইঘণ্টামানৰ পিছতে মণিপুৰ ছাত্ৰ সংগঠনে ইম্ফলত প্ৰতিবাদ সাব্যস্ত কৰে । ছাত্ৰ সংগঠনে সোমবাৰে মণিপুৰৰ মুখ্যমন্ত্ৰী আৰু ৰাজ্যপালক এক সময়সীমা বান্ধি দিছিল আৰু সেই সময়সীমাৰ অন্ত পৰাত ছাত্ৰ সংগঠনে পুনৰ ৰাজপথলৈ ওলাই আহি প্ৰতিবাদ সাব্যস্ত কৰে ।
প্ৰতিবাদকাৰী ছাত্ৰ-ছাত্ৰীৰ বৃহৎ সমাবেশ
ইফালে মেইৰা-পাইবি সংগঠনৰ লোকসকল একত্ৰিত হৈ বি টি ৰোড, ইম্ফললৈ যোৱা পথত আৰক্ষীৰ সৈতে মুখামুখি হয় আৰু ইয়াৰ ফলত হিংসাত্মক ঘটনা সংঘটিত হয় । পৰৱৰ্তী সময়ত মঙলবাৰে বিয়লি আন এক সংঘর্ষৰ সূত্ৰপাত হয় । তাৰ ফলত প্ৰায় ৫০ জনৰো অধিক ছাত্ৰ-ছাত্ৰী আহত হয় ।
মণিপুৰত ৫ দিনৰ বাবে ইণ্টাৰনেট সেৱা বন্ধ
অশান্ত মণিপুৰত এটাৰ পাচত আনটো নিষেধাজ্ঞা বলৱৎ কৰিছে ৰাজ্য চৰকাৰে । ইতিমধ্যে দুখন জিলাত সান্ধ্য আইন জাৰি কৰাৰ পিচত ৰাজ্য চৰকাৰৰ গৃহ বিভাগে মঙলবাৰে বিয়লি 3 বজাৰ পৰা ১৫ ছেপ্টেম্বৰৰ বিয়লি 3 বজালৈকে সকলো ধৰণৰ ইণ্টাৰনেট সেৱা বন্ধ ঘোষণা কৰিছে ।
মঙলবাৰে মণিপুৰৰ গৃহ বিভাগৰ যুটীয়া সচিব ডঃ মায়ংবাং ভেটো সিঙৰ স্বাক্ষৰিত এক নিৰ্দেশনাত এই বিষয়ে সদৰী কৰিছে । ৰাজ্যত শেহতীয়াকৈ সৃষ্টি হোৱা হিংসাত্মক কাৰ্য আৰু তাৰ ওপৰত সামাজিক মাধ্যমত যাতে উৰাবাতৰি কোনেও প্ৰচাৰ কৰিব নোৱাৰে তাৰ বাবেই ৰাজ্য চৰকাৰৰ গৃহ বিভাগে এই সিদ্ধান্ত গ্ৰহণ কৰে । উল্লেখ্য যে মণিপুৰৰ শেহতীয়া ঘটনাৰ বহুতো অপপ্রচাৰৰ পিছত ৰাজ্যখনৰ শান্তি-শৃংখলাত ব্যাঘাত জন্মে আৰু এই বিষয়ে বিভিন্ন স্তৰত সমালোচনাৰ সৃষ্টি হয় ।
পুনৰ বন্ধ শিক্ষানুষ্ঠান
মণিপুৰৰ শিক্ষা বিভাগে চৰকাৰী-বেচৰকাৰী বিদ্যালয়-মহাবিদ্যালয়, কাৰিকৰী শিক্ষানুষ্ঠান সকলো পুনৰ দুদিনৰ বাবে বন্ধ ঘোষণা কৰিছে । নিৰ্দেশনা অনুসৰি, ৰাজ্যখনৰ সকলো চৰকাৰী-বেচৰকাৰী শিক্ষানুষ্ঠান ১১ ছেপ্টেম্বৰ বুধবাৰ আৰু ১২ ছেপ্টেম্বৰ বৃহস্পতিবাৰে সম্পূৰ্ণ বন্ধ থাকিব ।
ৰাজ্যপালৰ আহ্বান
আনহাতে, ৰাজ্যপাল লক্ষ্মণপ্ৰসাদ আচাৰ্যই মণিপুৰৰ শেহতীয়া ঘটনাৰ বাবে গভীৰ উদ্বেগ প্ৰকাশ কৰে । এক প্ৰেছ বাৰ্তাত তেওঁ কয়, "শান্তি আৰু জনসাধাৰণৰ সহযোগিতাই একমাত্ৰ উপায়, যিয়ে সমাজৰ বিকাশ আনে । মণিপুৰ হৈছে 'মণিৰ ভূমি', ইয়াৰ যাতে ব্যতিক্ৰম নহয় । শেহতীয়াকৈ দেখা গৈছে যে বিগত কেইটামান দিনৰ পৰা ৰাজ্যখন অস্থিৰ হৈ পৰিছে । কিছুমান অপ্ৰীতিকৰ ঘটনাই তীব্ৰ জোকাৰণিৰ সৃষ্টি কৰিছে । তাৰ বাবে শান্তি পুনৰুদ্ধাৰৰ দিশত কেন্দ্ৰ আৰু ৰাজ্য চৰকাৰে নিষ্ঠাৰে প্ৰচেষ্টা গ্ৰহণ কৰিছে ।"
ৰাজ্যপালগৰাকীয়ে লগতে কয় যে হিংসাৰ দ্বাৰা কোনো সমস্যাৰ সমাধান নহয় । এই সমস্যাসমূহ দূৰ কৰিবলৈ সকলোৱে অৱদান আগবঢ়াব লাগিব আৰু উপায় বিচাৰিব লাগিব । সমস্যা সমাধানৰ বাবে ৰাজ্যপালগৰাকীয়ে জননেতা, ছাত্ৰ-ছাত্ৰীৰ সৈতে অহৰহ আলোচনা কৰি আছে ।
