নিউজ ডেস্ক, 17 ছেপ্টেম্বৰ: মোদী ৩.০ চৰকাৰৰ প্ৰথম ১০০ দিনত ‘বিকশিত ভাৰত’ গঢ়াৰ বাবে এক সুদৃঢ় ভেটি স্থাপন কৰা বুলি উল্লেখ কৰি কেন্দ্ৰীয় গৃহমন্ত্ৰী অমিত শ্বাহে মঙলবাৰে কয় যে এই ১০০ দিনত প্ৰতিটো শ্ৰেণী সমাজৰ অন্তৰ্ভুক্তিৰে দৰিদ্ৰ লোকৰ উন্নয়ন আৰু কল্যাণৰ মাজত এক উল্লেখযোগ্য ভাৰসাম্যতা সৃষ্টি কৰা হৈছে ।
"এই (১০০ দিনৰ কৃতিত্ব)ৰ আঁৰৰ কাৰণটো হ'ল সকলো ৰাজনৈতিক দল নিৰ্বাচনত ব্যস্ত আছিল, কিন্তু প্ৰধানমন্ত্ৰী মোদীয়ে নিৰ্বাচনৰ ছমাহ পূৰ্বে আমোলাতন্ত্ৰক এই কাম দিছিল যে যিমানবোৰ উন্নয়নৰ কাম কৰিবলগীয়া আছে, তেওঁলোকে যিখন নতুন চৰকাৰ আহিব তাৰ বাবে সম্পূৰ্ণ কৰিব লাগিব, যাতে দেশৰ উন্নয়নৰ গতিত বাধাৰ সৃষ্টি নহয় ।’’ মোদী চৰকাৰৰ তৃতীয় কাৰ্যকালৰ প্ৰথম ১০০ দিনৰ ৰিপ’ৰ্ট কাৰ্ড দি শ্বাহে এইদৰে কয় ।
শ্বাহে কয় যে মোদীয়ে এটা দুখীয়া পৰিয়ালত জন্মগ্ৰহণ কৰিছিল, আৰু বিশ্বৰ সৰ্ববৃহৎ গণতন্ত্ৰৰ প্ৰধানমন্ত্ৰী হৈছিল ৷ বিশ্বৰ ১৫খন ভিন্ন দেশে তেওঁক নিজৰ দেশৰ সৰ্বোচ্চ সন্মানেৰে সন্মানিত কৰিছে, যিয়ে কেৱল আমাৰ প্ৰধানমন্ত্ৰীৰেই নহয়, সমগ্ৰ ভাৰতৰে গৌৰৱ বৃদ্ধি কৰিছে ।
শ্বাহে কয় যে আজি দেশৰ ১৪০ কোটি জনসাধাৰণে প্ৰধানমন্ত্ৰী মোদীৰ দীৰ্ঘায়ুৰ বাবে ভগৱানৰ ওচৰত প্ৰাৰ্থনা কৰিছে ।
তেওঁ কয় যে মোদীৰ তৃতীয় কাৰ্যকালৰ প্ৰথম ১০০ দিনত প্ৰায় ১৫ লাখ কোটি টকাৰ প্ৰকল্প আৰম্ভ কৰা হৈছিল । "যোৱা ১০ বছৰ ধৰি মোদী চৰকাৰে নীতি ৰূপায়ণৰ দিশ, গতি, নিখুঁততাৰ ক্ষেত্ৰত সামঞ্জস্যতা বজাই ৰাখিছে । মোদী চৰকাৰে নিৰাপত্তা, উন্নয়ন, আৰু দৰিদ্ৰ লোকৰ কল্যাণৰ দিশত সমৰ্পিততাৰে কাম কৰি যাব । নিৰাপদ ভাৰত গঢ়ি তুলিবলৈ বাহ্যিক, আভ্যন্তৰীণ নিৰাপত্তা, আৰু প্ৰতিৰক্ষা ব্যৱস্থা মোদী চৰকাৰে শক্তিশালী কৰিছে ।" শ্বাহে লগতে কয় ।
তেওঁ কয় যে পিএমএৱাইৰ অধীনত অতিৰিক্ত তিনি কোটি ঘৰৰ অনুমোদন দি মোদী চৰকাৰে প্ৰতিজন দৰিদ্ৰ নাগৰিকৰ বাবে এটা গৃহ প্ৰদানৰ প্ৰতিশ্ৰুতিৰ দিশত আগবাঢ়িছে ।
"বিশ্বমানৰ আন্তঃগাঁথনি নিৰ্মাণৰ বাবে তিনি লাখ কোটি টকাৰ প্ৰকল্পৰ অনুমোদন দিয়া হৈছে । মোদী চৰকাৰৰ অধীনত ভাৰতে বিশ্বৰ এক প্ৰধান উৎপাদন কেন্দ্ৰ হিচাপে আত্মপ্ৰকাশ কৰিছে । মোদী চৰকাৰে কৃষকক সমৃদ্ধ কৰাৰ বাবে অসংখ্য আঁচনি প্ৰৱৰ্তন কৰিছে, যাতে দেশখনৰ খাদ্য সুৰক্ষিত হৈ থাকে আৰু কৃষকসকল যে আত্মনিৰ্ভৰশীল হয় ।’’ শ্বাহে কয় ।
যুৱক-যুৱতীসকলক সবলীকৰণৰ বাবে দুইলাখ কোটি টকাৰ পিএম পেকেজ ঘোষণা কৰা হৈছে, যাৰ ফলত অহা পাঁচ বছৰত ৪.১০ কোটি যুৱক-যুৱতী উপকৃত হ’ব বুলি উল্লেখ কৰি শ্বাহে কয়, "মূলধনী ব্যয় ১১ লাখ ১১ হাজাৰ কোটি টকালৈ বৃদ্ধি কৰাটো নিজৰ বাবেই এক মাইলৰ খুঁটি । আমাৰ ইস্তাহাৰত প্ৰকাশ কৰা অনুসৰি ৭০ বছৰ বা তাতকৈ অধিক বয়সৰ সকলো জ্যেষ্ঠ নাগৰিকক পাঁচ লাখ টকা পৰ্যন্ত বিনামূলীয়া স্বাস্থ্য কভাৰেজ প্ৰদান কৰা হ’ব ।”
তেওঁ লগতে কয়, "আজি এক কোটিৰো অধিক 'লাখপতি দিদি'ৰ বাৰ্ষিক আয় এক লাখ বা তাতকৈ অধিক টকা হৈছে ।" লগতে শ্বাহে প্ৰধানমন্ত্ৰী নৰেন্দ্ৰ মোদীৰ নেতৃত্বত বিগত ১০০ দিনৰ গুৰুত্বপূৰ্ণ সাফল্য চিত্ৰিত এখন বিশেষ ‘‘বিকশিত ভাৰতৰ পথ প্ৰশস্ত’’ পুস্তিকা আৰু আঠখন ফ্লাইয়াৰ মুকলি কৰে । এই উপলক্ষে কেন্দ্ৰীয় তথ্য আৰু সম্প্ৰচাৰ, ৰে’ল আৰু ইলেক্ট্ৰনিকছ আৰু তথ্য প্ৰযুক্তি বিভাগৰ মন্ত্ৰী অশ্বিনী বৈষ্ণৱো উপস্থিত থাকে ।
শ্বাহে কয় যে ৬০ বছৰৰ পাছত প্ৰথমবাৰৰ বাবে দেশত ৰাজনৈতিক স্থিতিশীলতাৰ পৰিৱেশ সৃষ্টি হৈছে আৰু দেশখনে নিজৰ নীতিৰ ওপৰত স্থিতি গ্ৰহণ কৰিছে । তেওঁ কয় যে ১০ বছৰৰ ভিতৰত নীতিসমূহে ইয়াৰ কাৰ্যকৰীকৰণৰ গতি আৰু সঠিকতা বজাই ৰাখি আশানুৰূপভাৱে কাম কৰি যাবলৈ নিশ্চিত কৰি একাদশ বছৰত প্ৰৱেশ কৰাটো অতি কঠিন আৰু এক বৃহৎ সাফল্য ।
শ্বাহে কয় যে মোদী চৰকাৰৰ বিগত ১০ বছৰত প্ৰধানমন্ত্ৰী মোদীয়ে দেশৰ ৬০ কোটি দৰিদ্ৰ লোকক ঘৰ, শৌচাগাৰ, গেছ সংযোগ, খোৱাপানী, বিদ্যুৎ, প্ৰতিমাহে পাঁচ কেজি ৰেচন আৰু পাঁচ লাখ টকা পৰ্যন্ত স্বাস্থ্য বীমাৰ সুবিধা প্ৰদান কৰিছে ।
"আমি এটা লক্ষ্য নিৰ্ধাৰণ কৰিছো যে অহা পাঁচ বছৰত দেশত এনে কোনো ব্যক্তি নাথাকিব যাৰ নিজা ঘৰ নাই । আমাৰ চৰকাৰে যুৱক-যুৱতীসকলৰ বাবে বহু সুযোগ প্ৰদান কৰিছে আৰু আজি ভাৰতৰ যুৱক-যুৱতীসকলে বিশ্বৰ যুৱক-যুৱতীসকলৰ সৈতে প্ৰতিযোগিতাত অৱতীৰ্ণ হ'বলৈ সাজু হৈছে ।" শ্বাহে কয় ।
তেওঁ আৰু কয় যে ১০০ দিনক ১৪ টা স্তম্ভত ভাগ কৰা হৈছে । "আন্তঃগাঁথনিৰ অধীনত ১০০ দিনত তিনি লাখ কোটি টকাৰ প্ৰকল্প আৰম্ভ কৰা হৈছে । ৭৬ হাজাৰ কোটি টকা ব্যয় সাপেক্ষে মহাৰাষ্ট্ৰৰ বাধাৱনত এটা মেগা বন্দৰ নিৰ্মাণ কৰা হ'ব, যিটো প্ৰথম দিনাৰ পৰাই বিশ্বৰ শীৰ্ষ দহটা বন্দৰত অন্তৰ্ভুক্ত হ'ব ।" শ্বাহে ক'লে ।
"৪৯,০০০ কোটি টকাৰে ২৫,০০০ অসংলগ্ন গাঁৱক পথেৰে সংযোগ কৰাৰ আঁচনি আৰম্ভ কৰা হ'ল । ৫০,৬০০ কোটি টকা ব্যয় সাপেক্ষে ভাৰতৰ প্ৰধান পথসমূহ সম্প্ৰসাৰণৰ সিদ্ধান্ত লোৱা হৈছে । বাৰাণসীৰ লাল বাহাদুৰ শাস্ত্ৰী আন্তঃৰাষ্ট্ৰীয় বিমানবন্দৰ উন্নীতকৰণ কৰি পৰ্যটনৰ প্ৰসাৰৰ বাবে কাম কৰা হৈছে, পশ্চিম বংগৰ বাগডোগ্ৰা, বিহাৰৰ বিহতা আৰু আগট্টি তথা মিনিকয়ত নতুন এয়াৰ ষ্ট্ৰিপ নিৰ্মাণৰ লগতে বেংগালুৰু মেট্ৰ’ ফেজ-৩, পুনে মেট্ৰ’, থানে ইন্টিগ্ৰেল ৰিং মেট্ৰ’ আৰু আন বহুতো মেট্ৰ’ ৰে’ল প্ৰকল্পও এই ১০০ দিনত আগবাঢ়িছে ।’’
শ্বাহে কয় যে প্ৰধানমন্ত্ৰী কিষাণ সন্মান নিধি যোজনাৰ ১৭ সংখ্যক কিস্তিৰ অধীনত ৯.৫০ কোটি কৃষকক ২০ হাজাৰ কোটি টকা বিতৰণ কৰা হৈছে । ‘‘এতিয়ালৈকে মুঠ ১২.৩৩ কোটি কৃষকক তিনি লাখ কোটি টকা বিতৰণ কৰা হৈছে । খাৰিফ শস্যৰ ন্যূনতম সমৰ্থন মূল্য (এম এছ পি)ও বৃদ্ধি কৰা হৈছে আৰু মোদী চৰকাৰে পূৰ্বৰ চৰকাৰতকৈ কেইবাগুণো বেছি শস্য এম এছ পিত ক্ৰয় কৰিছে, যাৰ পৰা মোদী চৰকাৰ যে কৃষকৰ স্বাৰ্থত উৎসৰ্গিত সেই কথা প্ৰকাশ কৰিছে ।’’ -শ্বাহে লগতে কয় ৷
শ্বাহে কয় যে সমবায় চেনি কলৰ ইথানল উৎপাদনকাৰী ইউনিটসমূহক বহু খাদ্য ইথানল ইউনিটলৈ ৰূপান্তৰিত কৰি কুঁহিয়াৰৰ পৰা ইথানল উৎপাদন কৰা হৈছে । "ইয়াৰ ফলত এতিয়া কেৱল চুপাৰিৰ পৰাই নহয় কুঁহিয়াৰৰ পৰাও ইথানল উৎপাদন হ'ব । আমি পিঁয়াজ আৰু বাছমতী চাউলৰ ন্যূনতম ৰপ্তানি মূল্য (এমইপি) আঁতৰাই দিছো । পিঁয়াজৰ ওপৰত ৰপ্তানি শুল্ক ৪০%ৰ পৰা ২০%লৈ হ্ৰাস কৰা হৈছে ।" তেওঁ লগতে উল্লেখ কৰে ৷
শ্বাহে কয় যে ৰাষ্ট্ৰীয় ঔদ্যোগিক কৰিড’ৰ উন্নয়ন কাৰ্যসূচীৰ অধীনত ১২ টা ঔদ্যোগিক মণ্ডল নিৰ্মাণ কৰা হ’ব যিবোৰ প্ৰধান ৰাষ্ট্ৰীয় ঘাইপথৰ সৈতে সংযুক্ত হ’ব । তেওঁ উল্লেখ কৰে, "মধ্যবিত্ত শ্ৰেণীৰ বাবে আটাইতকৈ গুৰুত্বপূৰ্ণ সিদ্ধান্ত লোৱা হৈছে । মুদ্ৰা ঋণৰ সীমা ১০ লাখৰ পৰা ২০ লাখ টকালৈ বৃদ্ধি কৰা হৈছে, আৰু যিসকলে সফলতাৰে পুৰণি ঋণ পৰিশোধ কৰিছে সকলোৱে ইয়াৰ দ্বাৰা উপকৃত হ'ব । এটা ক্ৰেডিট নিশ্চয়তা আঁচনি হৈছে । এম এছ এম ইৰ বাবে আৰম্ভ কৰা হৈছে যাৰ অধীনত ক্ষুদ্ৰ ব্যৱসায়ী আৰু ক্ষুদ্ৰ উদ্যোগীসকলে নিশ্চয়তা অবিহনে ঋণ লাভ কৰিব পাৰিব ।’’
শ্বাহে কয় যে প্ৰধানমন্ত্ৰী জনজাতীয় উন্নত গ্ৰাম অভিযানৰ অধীনত ৬৩ হাজাৰ জনজাতীয় গাঁও সম্পূৰ্ণৰূপে উন্নত হ’ব । "ইয়াৰ ফলত পাঁচ কোটি জনজাতীয় লোকৰ অৰ্থনৈতিক অৱস্থা উন্নত হ'ব । এই আঁচনিৰ অধীনত গাঁওখন প্ৰাথমিক প্ৰয়োজনীয়তা আৰু মৌলিক সুবিধাৰে সম্পূৰ্ণ সুসজ্জিত হ'ব । এই ১০০ দিনত অনুসূচিত জাতিৰ বিশেষভাৱে সক্ষম লোকসকলক তিনি লাখ নতুন পৰিচয় পত্ৰ প্ৰদান কৰা হৈছে ।" শ্বাহে কয় ৷
লগতে পঢ়ক: মোদী চৰকাৰৰ তৃতীয় কাৰ্যকালৰ ভিতৰতে কাৰ্যকৰী হ’ব ‘এক দেশ, এটা নিৰ্বাচন’ - ONE NATION ONE ELECTION
