নেশ্যনেল ডেস্ক,১৬ মাৰ্চ : লোকসভা নিৰ্বাচন দিন ঘোষণাৰ পূৰ্বে শনিবাৰে প্ৰধানমন্ত্ৰী নৰেন্দ্ৰ মোদীয়ে তেলেংগানাৰ নগৰকুৰনুলত এক ৰাজহুৱা জনসভা সম্বোধন কৰে । এই সভাত ভাষণ প্ৰদান কৰি প্ৰধানমন্ত্ৰীগৰাকীয়ে কয় যে কোনো দুৰ্নীতিগ্ৰস্ত লোকে পলাই যাব নোৱাৰে । বিআৰএছ নেত্ৰী কে কবিতাৰ গ্ৰেপ্তাৰ প্ৰসংগত এই মন্তব্য কৰে প্ৰধানমন্ত্ৰীগৰাকীয়ে ।
শুকুৰবাৰে ভাৰত ৰাষ্ট্ৰ সমিতিৰ (বিআৰএছ) মুৰব্বী তথা তেলেংগানাৰ প্ৰাক্তন মুখ্যমন্ত্ৰী চন্দ্ৰশেখৰ ৰাওৰ কন্যা কে কবিতাক ইডিয়ে দিল্লীৰ সুৰা নীতি কেলেংকাৰী গোচৰত গ্ৰেপ্তাৰ কৰে । তেওঁৰ গ্ৰেপ্তাৰ এদিন পিচতে প্ৰধানমন্ত্ৰীগৰাকীয়ে তেলেংগানাত উপস্থিত হৈ বিআৰএছক আক্ৰমণৰ লক্ষ্য হিচাপে লয় ।
ভাষণৰ মাজতে বিৰোধী দলসমূহক আক্ৰমণ কৰি প্ৰধানমন্ত্ৰীয়ে কয় যে কংগ্ৰেছ আৰু বিআৰএছয়ে একেলগে তেলেংগানাৰ উন্নয়নৰ প্ৰতিটো সপোন ভাঙি পেলাইছে । প্ৰধানমন্ত্ৰীয়ে লগতে কয় যে দেশৰ ২৫ কোটিৰো অধিক লোকক দৰিদ্ৰতাৰ পৰা উলিয়াই অনা হৈছে । একেই পৰিৱৰ্তনেৰে ৰাজ্যখনক একত্ৰিত কৰিব লাগিব বুলিও তেওঁ দাবী কৰে । আনকি নিৰ্বাচনৰ সময়সূচী ঘোষণাৰ পূৰ্বে ৰাইজে এনডিএয়ে ৪০০ খন আসন অতিক্ৰম কৰাৰ বিষয়ে তেওঁলোকৰ সিদ্ধান্ত দিছে বুলিও প্ৰধানমন্ত্ৰী মোদীয়ে উল্লেখ কৰে ।
তেওঁ লগতে দৃঢ়তাৰে কয় যে তেওঁ আজি তাত দেখিছে যে তেলেংগানাবাসীয়ে সিদ্ধান্ত লৈছে যে তেওঁলোকে তৃতীয়বাৰৰ বাবে মোদীক ঘূৰাই আনিব বিচাৰে । ৰাজ্যখনৰ বিৰোধী কংগ্ৰেছক লৈ প্ৰশ্ন উত্থাপন কৰি মোদীয়ে প্ৰশ্ন কৰে যে দলটোৱে 'গৰিবি হাটাও'ৰ শ্ল'গান দিয়াৰ পিচতো দৰিদ্ৰ লোকসকলৰ জীৱনত কোনো পৰিৱৰ্তন হৈছে নেকি ? কেৱল এয়াই নহয় লোকসভা নিৰ্বাচনৰ প্ৰাকক্ষণত প্ৰধানমন্ত্ৰীয়ে বিৰোধী দলসমূহক তীব্ৰ সমালোচনা কৰে ।
লগতে পঢ়ক :নিৰ্বাচনৰ সময়সূচী ঘোষণাৰ লগে লগে আদৰ্শ আচৰণ বিধি; কি এই আচৰণ বিধি ?
