নিউজ ডেস্ক, ১২ জুন : কাশ্মীৰ উপত্যকাত পুনৰ ৰক্তপাত । বিগত তিনি দিনত সংঘটিত তৃতীয়টো সন্ত্ৰাসবাদীৰ আক্ৰমণত এগৰাকী চি আৰ পি এফ জোৱান শ্বহীদ হয় । আনহাতে, এই আক্ৰমণৰ প্ৰত্যুত্তৰত নিৰাপত্তা বাহিনীয়ে চলোৱা অভিযানত দুই সন্ত্ৰাসবাদী নিহত হৈছে । জম্মু-কাশ্মীৰৰ কঠুৱা জিলাৰ ছাইদা সুখল হীৰানগৰ অঞ্চলত এক অভিযানত আন এক সন্ত্ৰাসবাদী নিহত হৈছে । জম্মু-কাশ্মীৰ আৰক্ষীয়ে শেহতীয়া এনকাউণ্টাৰত দ্বিতীয়জন সন্ত্ৰাসবাদী নিহত হোৱাৰ কথা নিশ্চিত কৰিছে ।
আনহাতে, সন্ত্ৰাসবাদীৰ এই আক্ৰমণৰ পৰিপ্ৰেক্ষিতত জম্মু প্ৰদেশত নিৰাপত্তা ব্যৱস্থা অধিক কটকটীয়া কৰা হৈছে । ইফালে আৰক্ষীয়ে প্ৰকাশ কৰা মতে, নিৰাপত্তাৰক্ষীয়ে কঠুৱাত চলি থকা অভিযানত আৰু এজন সন্ত্ৰাসবাদীক হত্যা কৰে । ইয়াৰ নিৰাপত্তাৰক্ষীৰে এনকাউণ্টাৰত নিহত সন্ত্ৰাসবাদীৰ সংখ্য়া দুজনলৈ বৃদ্ধি পাইছে । আনহাতে, ১২১ চি আৰ পি এফ বেটেলিয়নৰ জোৱান কবীৰ দাস এই সংঘৰ্ষত শ্বহীদ হয় । মঙলবাৰে নিশা হীৰানগৰত চিকিৎসাধীন অৱস্থাত গুলীত আঘাতপ্ৰাপ্ত চি আৰ পি এফ জোৱানজনৰ মৃত্যু হয় ।
অৱশ্যে সন্ত্ৰাসবাদীৰ বিৰুদ্ধে অনুসন্ধান অভিযান এতিয়াও অব্যাহত আছে । কিয়নো অসামৰিক অঞ্চলত আৰু এজন সন্ত্ৰাসবাদী লুকাই থকা বুলি অনুমান কৰা হৈছে । আনহাতে, কঠুৱা সংঘৰ্ষস্থলীৰ পৰা অস্ত্ৰৃশস্ত্ৰ আৰু গোলাবাৰুদো উদ্ধাৰ কৰা হৈছে ।
উদ্ধাৰ হোৱা অস্ত্ৰ-শস্ত্ৰৰ ভিতৰত আছে 30 ৰাউণ্ড গুলী থকা 3 টা মেগজিন, 24 ৰাউণ্ড গুলীৰে এটা মেগজিন, পৃথক পলিথিনত 75 ৰাউণ্ড গুলী, 3 টা সজীৱ গ্ৰেনেড, 1 লাখ নগদ টকা (500 টকীয়া 200 খন নোট), খোৱাখাদ্য (পাকিস্তানত তৈয়াৰী চকলেট, শুকান চানা আৰু ৰুটী), পাকিস্তানত প্ৰস্তুত কৰা ঔষধ আৰু বেজীৰ (বিষনাশক) এটা চিৰিঞ্জ, 2 পেকেট এ4 বেটাৰী, টেপত মেৰিয়াই থোৱা এটা হেণ্ডছেট আৰু এই হেণ্ডছেটৰ পৰা ওলমি থকা তাঁৰ উদ্ধাৰ কৰা হৈছে ।
উল্লেখ্য যে মঙলবাৰে সন্ধিয়া জম্মু-কাশ্মীৰৰ আন্তঃৰাষ্ট্ৰীয় সীমান্তৰ ওচৰৰ জম্মু-কাশ্মীৰৰ কঠুৱা জিলাৰ এখন গাঁৱত সন্ত্ৰাসবাদী আৰু নিৰাপত্তাৰক্ষীৰ মাজৰ এনকাউণ্টাৰৰ সময়ত এগৰাকী অৰ্ধসামৰিক বাহিনীৰ চি আৰ পি এফ জোৱান আৰু এজন সন্দেহযুক্ত পাকিস্তানী সন্ত্ৰাসবাদী নিহত হয় । এই এনকাউণ্টাৰৰ সময়ত এজন অসামৰিক লোকো আহত হয় ।
আনহাতে, ঘটনা সন্দৰ্ভত জম্মু অঞ্চলৰ অতিৰিক্ত আৰক্ষী সঞ্চালক প্ৰধান আনন্দ জৈনে কয় যে ডোডা জিলাৰ অতি উচ্চতাত সন্ত্ৰাসবাদী আৰু নিৰাপত্তাৰক্ষীৰ মাজত পৃথক সংঘৰ্ষ চলি আছে । তেওঁ দুয়োটা সন্ত্ৰাসবাদবিৰোধী অভিযানৰ তত্ত্বাৱধান কৰি আছে ।
অভিযানৰ বৰ্ণনা দি জৈনে কয় যে সীমান্তৰ সিপাৰৰ পৰা নতুনকৈ অনুপ্ৰৱেশ কৰা দুজন সন্ত্ৰাসবাদী কঠুৱা জিলাৰ ছাইদা সুখল গাঁৱত এটা ঘৰৰ পৰা পানী বিচাৰি ওলাই আহিছিল । সম্ভাৱ্য বিপদৰ কথা অনুভৱ কৰা গাঁওবাসীয়ে আৰক্ষীক সতৰ্ক কৰি দিয়ে । ইয়াৰ পিচতে নিৰাপত্তা বাহিনীয়ে দ্ৰুততাৰে সঁহাৰি জনায় । তেওঁ লগতে কয় যে পৰৱৰ্তী সময়ত হোৱা গুলীবৰ্ষণত এজন সন্ত্ৰাসবাদীক হত্যা কৰা হয় । আনহাতে, আনজন গাঁওখনৰ ভিতৰতে লুকাই থকাৰ সন্দেহ কৰা হৈছে । হীৰানগৰ খণ্ডৰ কুটা মোডৰ ওচৰত এই অভিযান বৰ্তমানো চলি আছে ।
লগতে পঢ়ক :উত্তৰ কাশীত তীৰ্থযাত্ৰীক কঢ়িয়াই অনা বাছ দুৰ্ঘটনাত পতিত, নিহত তিনি মহিলা - Uttarakhand bus accident
