নিউজ ডেস্ক, 15 ফেব্ৰুৱাৰী : অন্ধ্ৰ প্ৰদেশৰ তিৰুপতিত সংঘটিত হৈছে এক চাঞ্চল্যকৰ ঘটনা ৷ বৃহস্পতিবাৰে অন্ধ্ৰ প্ৰদেশৰ তিৰুপতি জিলাৰ এখন চিৰিয়াখানাত এজন লোকক সিংহই হত্যা কৰে | সিংহটোৰ বাবে নিৰ্ধাৰিত বেষ্টনীত প্ৰৱেশ কৰাৰ পিছতে ব্যক্তিজনক সিংহটোৱে আক্ৰমণ কৰে ৷ ঘটনাটো জিলাখনৰ শ্ৰী ভেংকটেশ্বৰ চিৰিয়াখানাত সংঘটিত হৈছে ৷
মৃত যুৱকজন ৰাজস্থানৰ প্ৰহ্লাদ গুজ্জাৰ বুলি জানিব পৰা গৈছে ৷ চিৰিয়াখানাৰ পৰা পোৱা তথ্য অনুসৰি ব্যক্তিজন সুৰাসক্ত অৱস্থা আছিল ৷ চেলফি ক্লিক কৰিবলৈ ব্যক্তিজন সিংহৰ গৰালত প্ৰৱেশ কৰে আৰু লগে লগে প্ৰকাণ্ড সিংহটোৱে তেওঁক আক্ৰমণ কৰে ৷ এই তথ্য লাভ কৰাৰ লগে লগে আৰক্ষী আৰু বন বিভাগৰ বিষয়া ঘটনাস্থলীত উপস্থিত হৈ বিষয়টোৰ তদন্ত আৰম্ভ কৰে ৷
এই ঘটনাৰ পিচতে চিৰিয়াখানাৰ ভিতৰত দৰ্শনাৰ্থীৰ প্ৰৱেশ বন্ধ কৰি দিয়ে কৰ্তৃপক্ষই ৷ আৰক্ষীয়ে গোচৰ ৰুজু কৰি মৃতদেহটো মৰণোত্তৰ পৰীক্ষাৰ বাবে চিকিৎসালয়লৈ স্থানান্তৰিত কৰে ৷ যোৱা দশকত, ভাৰতৰ কেইবাখনো ৰাজ্যত চিৰিয়াখানা আৰু একে ধৰণৰ উদ্যানত পাঁচটা অনুৰূপ ঘটনা সংঘটিত হৈছে ৷
2021 চনৰ মাৰ্চ মাহত সিংহৰ গৰালত প্ৰৱেশ কৰাৰ পিছত কলকাতাৰ আলিপুৰ চিৰিয়াখানাত সিংহৰ আক্ৰমণত গৌতম গুচাইট নামৰ এজন 40 বছৰীয়া ব্যক্তি গুৰুতৰভাৱে আহত হৈছিল ৷ 2020 চনৰ মাৰ্চ মাহত ঝাৰখণ্ডৰ ৰাঁচীৰ ভগৱান বিৰচা জৈৱিক উদ্যানত এজন 35 বছৰীয়া ব্যক্তি বাঘে হত্যা কৰিছিল ৷
আন এটা ঘটনাত, 2019 চনৰ জানুৱাৰীত পঞ্জাৱৰ মোহালিৰ ছটবীৰ চিৰিয়াখানাত 25 ফুটতকৈ ওখ দেৱাল পাৰ কৰি গৰালত প্ৰৱেশ কৰাৰ পিছত এজন লোকক দুটা সিংহই হত্যা কৰিছিল ৷ ইফালে, 2017 চনৰ অক্টোবৰ মাহত বাংগালুৰুৰ উপকণ্ঠত থকা বেনাৰঘাট্টা জৈৱিক উদ্যানত দুটা বগা বাঘৰ পোৱালীয়ে এজন 40 বছৰীয়া পশু ৰক্ষকক হত্যা কৰে ৷ ঘটনাটো তেতিয়া সংঘটিত হৈছিল যেতিয়া পশু ৰক্ষক অঞ্জীয়ে গৰালৰ ভিতৰত মাংস দিবলৈ গৈছিল ৷ 20 বছৰীয়া মকছুদ খানক 2014 চনৰ ছেপ্টেম্বৰত দিল্লী চিৰিয়াখানাত এটা বগা বাঘে আক্ৰমণ কৰিছিল ৷
লগতে পঢ়ক : আকবৰ-সীতাক লৈ বংগত ৰাজনীতি
