শ্ৰীনগৰ : কাশ্মীৰত শীতৰ প্ৰকোপ বৃদ্ধি পাইছে । শুকুৰবাৰে মাজনিশা শ্ৰীনগৰত পাৰাস্তম্ভ -৮.৫ ডিগ্ৰী চেলচিয়াছলৈ হ্ৰাস পাইছে । ১৯৭৪ চনৰ পিছত গ্ৰীষ্মকালীন ৰাজধানী শ্ৰীনগৰ এয়া আছিল আটাইতকৈ শীতল নিশা । সেই বছৰ তাপমাত্ৰা -১০.৩ ডিগ্ৰী চেলচিয়াছলৈ হ্ৰাস পাইছিল ।
কাশ্মীৰৰ অন্যান্য অঞ্চল ক্ৰমে তিনিখন জিলাত নিম্নতম তাপমাত্ৰা -১০ ডিগ্ৰীৰ তললৈ যোৱাৰ লগে লগে হিমশীতল হৈ পৰিছে সমগ্ৰ কাশ্মীৰ । অনন্তনাগত তাপমাত্ৰা (-১০.৫), শ্বপিয়ান (-১০.৪) আৰু পুলৱামা (-১০.৩)।
ইয়াৰ পূৰ্বৰ নিশা শ্ৰীনগৰত নথিভুক্ত সৰ্বনিম্ন তাপমাত্ৰা ১৮৯১ চনৰ পিছত চহৰখনত তৃতীয় সৰ্বনিম্ন আছিল । ১৯৩৪ চনৰ ১৩ ডিচেম্বৰত শ্ৰীনগৰত এতিয়ালৈকে সৰ্বনিম্ন তাপমাত্ৰা আছিল -১২.৮ ডিগ্ৰী চেলচিয়াছ ।
২১ ডিচেম্বৰত কাশ্মীৰৰ ৪০ দিনীয়া শীতকালৰ 'চিল্লাই-কলন' আৰম্ভ হ'ব যি ৩১ জানুৱাৰীলৈকে থাকিব । ইয়াৰ পিছতে আছে 'চিল্লাই-খুৰ্ড' যি ৩১ জানুৱাৰীৰ পৰা ১৯ ফেব্ৰুৱাৰীলৈ ২০ দিন মৃদু ঠাণ্ডা আৰু 'চিল্লাই-বাছা' ২০ ফেব্ৰুৱাৰীৰ পৰা ২ মাৰ্চলৈ থাকিব যি ১০ দিনৰ বাবে সামান্য শীত থাকিব ।
বৰফত পৰিণত ডাল হ্ৰদ
প্ৰচণ্ড শীতৰ ফলত ডাল হ্ৰদকে ধৰি বহুতো অঞ্চল আৰু জলাশয় বৰফত পৰিণত হৈছে । চহৰখন আৰু সমভূমিৰ অন্যান্য অঞ্চলত দীঘলীয়া সময় ধৰি শুষ্ক বতৰৰ বাবে কাহ আৰু সাধাৰণ চৰ্দিৰ দৰে ৰোগ বৃদ্ধি পাইছে ।
বতৰ বিজ্ঞান বিভাগে ২১-২২ ডিচেম্বৰৰ নিশা উপত্যকাৰ ওখ অঞ্চলত পাতল তুষাৰপাত হোৱাৰ সম্ভাৱনাৰ লগতে ২৬ ডিচেম্বৰলৈকে মুখ্যতঃ শুষ্ক বতৰৰ ভৱিষ্যতবাণী কৰিছে । লগতে কৈছে যে ২৭ ডিচেম্বৰৰ নিশাৰ পৰা ২৮ ডিচেম্বৰৰ পুৱালৈকে কিছুমান ওখ অঞ্চলত পাতল তুষাৰপাত হ'ব পাৰে । অৱশ্যে, উপত্যকাটোত তাপমাত্ৰা আৰু হ্ৰাস হোৱাৰ সম্ভাৱনা আছে আৰু অহা কেইদিনমানৰ ভিতৰত ওচৰৰ অঞ্চলবোৰত শীতল ঢৌ আহিব ।
তুষাৰপাতৰ বাবে প্ৰাৰ্থনা কাশ্মীৰীসকলৰ
হাড় কঁপোৱা শীতৰ মাজতে উপত্যকাটোৰ লোকসকলে আকাশলৈ চাই আছে । শুষ্ক বতৰৰ পৰা পৰিত্ৰাণ বিচাৰি তুষাৰপাতৰ বাবে প্ৰাৰ্থনা কৰিছে । উপত্যকাটোৰ বাসিন্দাসকলে কৈছে যে পানী যোগান পাইপবোৰ বৰফত পৰিণত হৈছে আৰু অনিয়মীয়া বিদ্যুৎ যোগানে জীৱন কঠোৰ কৰি তুলিছে । তেওঁলোকে নিজকে গৰম কৰি ৰখাৰ বাবে পৰম্পৰাগত উপায়ৰ আশ্ৰয় লৈছে । তুষাৰপাতৰ ফলত নিম্নতম তাপমাত্ৰা বৃদ্ধি হ'ব যাৰ ফলত বৰ্তমানৰ শুষ্ক, ঠাণ্ডা বতৰৰ পৰিস্থিতি হ্ৰাস হ'ব ।
অঞ্চলভেদে নিম্নতম তাপমাত্ৰা
কাশ্মীৰ: শ্ৰীনগৰ -৮.৫ ডিগ্ৰী চেলচিয়াছ, কাজিগুণ্ড -৮.২, পেহেলগাম -৮.৬, কুপৱাৰা -৭.২, কোকেৰনাগ -৫.৮, গুলমাৰ্গ -৬.২, সোণামাৰ্গ -৮.৮, বান্দিপোৰা -৭.৪, বাৰামুলা -৬.২, বুদগাম -৮.৩, গান্দেৰবাল -৭.১, পুলৱামা -১০.৩, অনন্তনাগ -১০.৫, কুলগাম -৬.8, শ্বপিয়ান -১০.৪ ।
জম্মু : জম্মু ৫.৪, বানিহাল -৪.৪, বাটোটে ০.৫, কাটৰা ৬.০, ভাদৰৱাহ -২.৩, কিষ্টৱাৰ ১.১, পাদ্দাৰ -৮.০, ৰামবান ৩.৬, পুঞ্চ ১.৫, ৰাজৌৰী ১.৭, চাম্বা ১.৪, কাঠুৱা ৫.৭, ৰেচি ২.৮, উধমপুৰ ১.৫ ।
লাডাখ : লেহ -১২.৫, কাৰ্গিল -১৪.৩ ডিগ্ৰী চেলচিয়াছ ।
লগতে পঢ়ক :চাৰি দশকৰ পাছত ৰাইজৰ বাবে আহিল যোগাযোগৰ এক নতুন সুবিধা - HELICOPTER SERVICE
