নিউজ ডেস্ক, ২৩ জুলাই : জম্মুৰ বট্টল ছেক্টৰত (Battal sector) অনুপ্ৰৱেশকাৰী সন্ত্ৰাসবাদীয়ে ভাৰতৰ ভূমিত প্ৰৱেশৰ চেষ্টা কৰে ৷ এই কথা গম পাই অনুপ্ৰৱেশকাৰীক বাধা দিয়ে সেনা জোৱানে ৷ যাৰ ফলত অনুপ্ৰৱেশকাৰী আৰু সেনা জোৱানৰ মাজত গুলীচালনা হয় ৷
এই গুলীচালনাত এজন জোৱান আহত হৈছে ৷ সংবাদ সংস্থা ANI ৰ আগত এই কথা উল্লেখ কৰিছে হোৱাইট নাইট কৰ্পছে । সোমবাৰ মাজ নিশা সংঘটিত হয় এই গুলীচালনা ৷ বট্টল ছেক্টৰত বৰ্তমানেও অব্যাহত আছে সেনাৰ অভিযান । এই অভিযানৰ বিষয়ে হোৱাইট নাইট কৰ্পছে X-তো এটা পোষ্ট কৰে ।
হোৱাইট নাইট কৰ্পছে ANI ৰ আগত উল্লেখ কৰে যে ইয়াৰ পূৰ্বে সোমবাৰে পুৱতি নিশাও জম্মু-কাশ্মীৰৰ ৰাজৌৰীৰ গুণ্ডা গাঁৱত সন্ত্ৰাসবাদী আৰু নিৰাপত্তাৰক্ষীৰ মাজত এক সংঘৰ্ষ হয় ৷ ফলত এটা সন্ত্ৰাসবাদী নিহত হোৱাৰ লগতে এজন সেনা জোৱান আৰু এগৰাকী সাধাৰণ নাগৰিকো আহত হয় ৷
ইফালে কিছুদিন পূৰ্বে জম্মু অঞ্চলৰ কঠুৱাত সেনাৰ কনভয়ত সন্ত্ৰাসবাদীয়ে আক্ৰমণ কৰে ৷ বিশেষকৈ ডোডা আৰু উধামপুৰত হোৱা এনকাউণ্টাৰকে ধৰি ক্ৰমাৎ সন্ত্ৰাসবাদী আক্ৰমণৰ হাৰ বৃদ্ধি পাইছে ৷ যোৱা বৃহস্পতিবাৰৰ দিনাও জম্মু-কাশ্মীৰৰ ৰাজৌৰী জিলাৰ সুন্দৰবাণী অঞ্চলৰ নিয়ন্ত্ৰণ ৰেখাৰ সমীপত নিৰাপত্তাজনিত কাৰণত ভাৰতীয় সেনা সৈন্যই গুলীচালনা কৰে ।
Op BATTAL
— White Knight Corps (@Whiteknight_IA) July 23, 2024
Alert troops foiled an #infiltration bid by effectively engaging infiltrating #terrorists with effective fire in the #Battal Sector at 0300h.
During the exchange of heavy fire, one braveheart has been injured.
Operations are continuing.@adgpi@NorthernComd_IA
এক সুকীয়া ঘটনাত জম্মু-কাশ্মীৰৰ ডোডা জিলাৰ কাষ্টিগড় অঞ্চলত বৃহস্পতিবাৰে সন্ত্ৰাসবাদীৰ সৈতে হোৱা সংঘৰ্ষত ভাৰতীয় সেনাৰ দুজন জোৱান আহত হয় । বিগত ১৫ জুলাইত নিৰ্দিষ্ট চোৰাংচোৱাৰ তথ্যৰ ভিত্তিত ডোডাৰ উত্তৰ অঞ্চলত ভাৰতীয় সেনা আৰু জম্মু-কাশ্মীৰ আৰক্ষীৰ যৌথ অভিযান চলি আছিল ।
হোৱাইট নাইট কৰ্পছৰ মতে, নিশা প্ৰায় ৯ বজাত সন্ত্ৰাসবাদীৰ সৈতে যোগাযোগ স্থাপন কৰা হয় আৰু সেই সময়তে তীব্ৰ গুলীবৰ্ষণো হয় । ফলত এজন বিষয়াসহ চাৰিজন জোৱান নিহত হয় । নিহত হোৱা জোৱান কেইজন হৈছে কেপ্তেইন ব্ৰিজেশ থাপা, নাইক ডি ৰাজেশ, চিপাহী বিজেন্দ্ৰ, চিপাহী অজয় ।
১৬ জুলাইৰ দিনা উত্তৰ সেনা অধিনায়ক লেফটেনেণ্ট জেনেৰেল এম ভি সুচিন্দ্ৰ কুমাৰে দেশৰ বাবে প্ৰাণ আহুতি দিয়া সাহসী কেপ্তেইন ব্ৰিজেশ থাপা, নাইক ডি ৰাজেশ, চিপাহী বিজেন্দ্ৰ আৰু চিপাহী অজয় কুমাৰ সিঙক শ্ৰদ্ধাঞ্জলি জনাই মাল্যাৰ্পণ কৰে ৷
