নেশ্যনেল ডেস্ক,১৮ মাৰ্চ : দেশৰ সীমান্তত থকা সৈনিকসকল সদায় সাজু থাকে, কিন্তু আন দেশৰ সীমান্তত কি কাৰ্যকলাপ চলিছে সেই বিষয়েও তেওঁলোকে অতি সতৰ্ক হৈ থাকিব লাগে । সময়ে সময়ে চৰকাৰে আন দেশৰ সীমাত কি কাৰ্যকলাপ চলিছে সেয়া জানিবলৈ বিভিন্ন প্ৰযুক্তি ব্যৱহাৰ কৰে ।
একেটা ক্ষেত্ৰতে আইআইটি কানপুৰৰ ইনকিউবেটেড কোম্পানী এথৰন এৰ'স্পেচে এটা বিশেষ ড্ৰোণ নিৰ্মাণ কৰিছে যি আন দেশৰ সীমান্তলৈ যাব পাৰে আৰু তথ্য সংগ্ৰহ কৰিব পাৰে । লগতে, যদি শত্ৰু দেশবোৰে এই ড্ৰোণ চিনাক্ত কৰে, তেন্তে ইয়াত আত্ম-ধ্বংসাত্মক প্ৰযুক্তি ব্যৱহাৰ কৰা হৈছে, যাতে ড্ৰোণখন তৎক্ষণাৎ ধ্বংস কৰা হয় । এথৰন এৰ'স্পেচৰ সহ-প্ৰতিষ্ঠাপক প্ৰখৰ নন্দী শ্ৰীবাস্তৱে কয় যে ড্ৰোণখন ভাৰতীয় নৌসেনাই অৰ্ডাৰ কৰিছে । এই ড্ৰোণ প্ৰকল্প আইআইটি কানপুৰৰ দ্বাৰা ভাৰতীয় নৌসেনালৈ প্ৰেৰণ কৰা হৈছিল । যাক ইতিমধ্যে গ্ৰহণ কৰা হৈছে । ভাৰতীয় নৌসেনাই দুবাৰকৈ এই ড্ৰোণৰ সফল পৰীক্ষণ কৰিছে আৰু তৃতীয় পৰীক্ষণ এতিয়াও বাকী আছে ।
প্ৰখৰে লগতে কয় যে এই ড্ৰোণে আন দেশৰ সীমান্তলৈ গৈ তথ্য সংগ্ৰহ কৰিব পাৰে । ইয়াৰ বাহিৰেও, কৃত্ৰিম বুদ্ধিমত্তা প্ৰযুক্তি ব্যৱহাৰ কৰা এই ড্ৰোণ দিন বা ৰাতি সকলো সময়তে কাম কৰিব পাৰে । ইফালে জাহাজৰ পৰি পানীত সন্ধানহীন হোৱা প্ৰতিজন ব্যক্তিক এই ড্ৰোণে চিনাক্ত কৰিব পাৰে । সেই সন্ধানহীন লোকক চিনাক্ত কৰি ড্ৰোণে উদ্ধাৰৰ বাবে সহায় কৰিব পাৰে । ড্ৰোণত জীৱন ৰক্ষাকাৰী জেকেট থাকে । ই বিপদত পৰা প্ৰতিজন ব্যক্তি বা জাহাজক চিনাক্ত কৰিব পাৰে ।
