নেশ্যনেল ডেস্ক, 3 জুলাই: হাথৰছৰ সৎসংগত মঙলবাৰে সংঘটিত এটি শোকাৱহ দুৰ্ঘটনাত বৰ্তমানলৈকে মৃত্যু হৈছে 121 জন লোকৰ । পৰৱৰ্তী সময়ত সৎসংগ(প্ৰাৰ্থনা সভা) ৰ পৰা চিকিৎসালয়লৈকে সকলোতে মৃতদেহবোৰ সিঁচৰতি হৈ থকা দেখা যায় । ইতিমধ্যে এই মৰ্মান্তিক দুৰ্ঘটনাত নিহতসকলৰ এখন তালিকা প্ৰকাশ কৰিছে জিলা প্ৰশাসনে ৷ সমান্তৰালকৈ মুকলি কৰিছে হেল্পলাইন নম্বৰ ৷
উল্লেখ্য যে, জিলাখনৰ চিকান্দ্ৰৰাউ আৰক্ষী থানাৰ অন্তৰ্গত ৰতিভানপুৰৰ ফুলৰাই গাঁৱত নাৰায়ণ সাকাৰ বিশ্ব হৰি সংস্থাই মঙলবাৰে আয়োজন কৰিছিল এক সৎসংগ(প্ৰাৰ্থনা সভা) ৰ অনুষ্ঠান । য’ত শিৱবাবাৰ আৰাধনা চলি আছিল ৷ সৎসংগ শেষ হোৱাৰ পিছতে এই হৃদয় বিদাৰক দুৰ্ঘটনাটো সংঘটিত হয় ৷ এই দুৰ্ঘটনাত বিশেষকৈ মহিলা আৰু শিশুসকল অধিক পৰিমাণে পদপিষ্ট হয় ৷ মঙলবাৰৰ নিশালৈকে 116 গৰাকী লোকৰ মৃত্যু ঘটা বুলি জিলা প্ৰশাসনে নিশ্চিত কৰিছিল ৷ মৃতদেহবোৰ চিকিৎসা মহাবিদ্যালয়লৈ ইতিমধ্যে প্ৰেৰণ কৰা হৈছে ।
উল্লেখ্য যে, জিলা প্ৰশাসনে প্ৰকাশ কৰিছে নিহত আৰু আহতসকলৰ নামৰ তালিকা । দুৰ্ঘটনাটোত আহতসকলৰ পৰিয়ালে প্ৰশাসনে মুকলি কৰা হেল্পলাইন নম্বৰবোৰত যোগাযোগ কৰি প্ৰয়োজনীয় তথ্য়সমূহ লাভ কৰিব পাৰিব ৷
হাথৰাছৰ ঘটনা সন্দৰ্ভত আলিগড়ৰ জিলা দণ্ডাধীশে জিলাখনৰ 23 গৰাকী লোকৰ মৃত্যু ঘটা বুলি নিশ্চিত কৰে ৷ বিপৰীতে তিনিজন আহত জে এন চিকিৎসা মহাবিদ্যালয়ত চিকিৎসাধীন হৈ থকা বুলি দণ্ডাধীশগৰাকীয়ে ব্যক্ত কৰে । ইয়াৰে এজনৰ অৱস্থা সংকটজনক ।
একে সময়তে 15 টা মৃতদেহ জে এন চিকিৎসা মহাবিদ্যালয়লৈ, 6 টা মালখান সিং জিলা চিকিৎসালয়লৈ আৰু দুটা মৰণোত্তৰ পৰীক্ষাগৃহলৈ অহা বুলিও জানিব পৰা গৈছে । আৰক্ষীয়ে এইক্ষেত্ৰত যাৱতীয় ব্যৱস্থা গ্ৰহণ কৰি আছে ৷
জিলা প্ৰশাসনে মুকলি কৰা হেল্পলাইন নম্বৰসমূহ হৈছে
- আগ্ৰা জ’ন কণ্ট্ৰ’ল- 7839866849
- আলিগড় ৰেঞ্জ কণ্ট্ৰ’ল- 7839855724
- আগ্ৰা ৰেঞ্জ কণ্ট্ৰ’ল- 7839855724
- হাথৰাছ কণ্ট্ৰ’ল- 9454417377
- এটা কণ্ট্ৰ’ল- 9454417438
- আলিগড় কণ্ট্ৰ’ল- 7007459568
