নেশ্যনেল ডেস্ক, ২৯ জুন : এক অতি মৰ্মান্তিক ঘটনাত পাঁচগৰাকীকৈ ভাৰতীয় সেনা জোৱানে অকাল মৃত্যুক সাৱটিবলগা হয় । লাডাখৰ দৌলত বেগ অল্ডি অঞ্চলৰ মন্দিৰ মৰ্হত প্ৰকৃত নিয়ন্ত্ৰণ ৰেখাৰ ওচৰত আকস্মিক বানৰ ফলত শনিবাৰে পুৱতিনিশা এজন কনিষ্ঠ কমিছনড অফিচাৰসহ (জে চি অ') পাঁচ সেনা জোৱানৰ কৰুণ মৃত্যু হয় ।
উল্লেখ্য যে, এই ডি বি অ' (Daulat Beg Oldie) হৈছে গালৱান উপত্যকাৰ সৈতে যোগাযোগৰ প্ৰথম মাধ্যম স্থান । ইয়াতেই ২০২০ চনত ভাৰতীয় সেনা আৰু পি এল এৰ মাজত সংঘৰ্ষ হৈছিল ।
ভাৰতীয় সেনাৰ সূত্ৰ মতে, পুৱা প্ৰায় ৩ বজাত লেহ সীমান্তৰ বোধি নদী পাৰ হোৱাৰ বাবে এক টেংক অনুশীলনৰ সময়ত এই দুৰ্ঘটনাটো সংঘটিত হয় । সেই সময়ত নদীখনত হঠাতে পানীৰ স্তৰ বৃদ্ধি পায় । যাৰ ফলত সেনা জোৱানকেইজন টেংকসহ উটি যায় । অৱশ্যে পাঁচোটা মৃতদেহ উদ্ধাৰ কৰা হৈছে । এই শোকাৱহ দুৰ্ঘটনাটো সংঘটিত হোৱাৰ সময়ত টেংকখন টাংষ্টেলৈ গৈ আছিল বুলি সেনা সূত্ৰত প্ৰকাশ ।
লেহত নিয়োজিত এগৰাকী জ্যেষ্ঠ আৰক্ষী বিষয়াই ইটিভি ভাৰতক জনায়, "সংশ্লিষ্ট চকী ইয়াৰ পৰা প্ৰায় ১৫০ কিলোমিটাৰ দূৰৈত আছে । দুৰ্ঘটনাস্থলীৰ পৰা ৰিপোৰ্ট লাভ কৰাৰ পিছত সঠিক বিৱৰণ প্ৰকাশ কৰা হ'ব" ৷ বৰ্তমান অধিক বিৱৰণৰ বাবে অপেক্ষা কৰি থকা হৈছে ।
আনহাতে, এই কৰুণ দুৰ্ঘটনাটোৰ বাবে শোক প্ৰকাশ কৰিছে কেন্দ্ৰীয় প্ৰতিৰক্ষা মন্ত্ৰী ৰাজনাথ সিঙে । শনিবাৰে তেওঁ এই সন্দৰ্ভত এক্সত দিয়া এটা পোষ্টত কয়, "লাডাখৰ দুৰ্ঘটনাত আমাৰ পাঁচ সাহসী সেনা জোৱানৰ মৃত্যুৰ ঘটনাত মই মৰ্মাহত । দেশৰ বাবে এইসকল সেনা জোৱানৰ অৱদান কেতিয়াও পাহৰিব নোৱাৰি । তেওঁলোকৰ পৰিয়ালৰ প্ৰতি সমবেদনা জনালোঁ । এই মুহূৰ্তত সমগ্ৰ দেশ তেওঁলোকৰ কাষত আছে ।
Deeply saddened at the loss of lives of five of our brave Indian Army soldiers in an unfortunate accident while getting the tank across a river in Ladakh.
— Rajnath Singh (@rajnathsingh) June 29, 2024
We will never forget exemplary service of our gallant soldiers to the nation. My heartfelt condolences to the bereaved…
১৯৬২ চনত চীনৰ বিৰুদ্ধে হোৱা যুদ্ধৰ পটভূমিত আৰু শেহতীয়াকৈ ২০২০ চনৰ জুনত ভাৰতীয় সেনা আৰু চীনৰ পিপ'লছ লিবাৰেচন আৰ্মীৰ মাজত সংঘৰ্ষৰ পিচত লাডাখৰ এল এ চি ভাৰতৰ বাবে কৌশলগতভাৱে অতি গুৰুত্বপূৰ্ণ ।
