পাটনা : পাইলটৰ প্ৰত্যুৎপন্নমতিতাৰ বাবেই এক ডাঙৰ বিমান দুৰ্ঘটনাৰ পৰা ৰক্ষা পৰে যাত্ৰীসকল । দিল্লীৰ পৰা শ্বিলঙলৈ উৰামৰা এখন বিমানত হঠাতে বিজুতিৰ সৃষ্টি হয় । যাৰবাবে বিমানখনে পাটনা বিমানবন্দৰত জৰুৰী অৱতৰণ কৰিবলগা হয় । লগতে যাত্ৰীসকলে এক আসন্ন বিপদৰ পৰা ৰক্ষা পৰি স্বস্তিৰ নিশ্বাস পেলায় ।
বিমানখনে উৰামৰাৰ পিচতে পাইলটজনে ককপিটৰ উইণ্ডস্ক্ৰীণত এটা ফাঁট লক্ষ্য কৰে । পাইলটজনৰ মতে, এটা চৰায়ে বিমানখনত খুন্দা মৰাৰ পিছত উইণ্ডস্ক্ৰীণখন ভাঙি যায় আৰু টাৰ্বোফেন ক্ষতিগ্ৰস্ত হয় । লগে লগে পাইলটজনে কৰ্মচাৰীসকলক এই বিষয়ে অৱগত কৰে । পুৱা ৯ বজাত এই ঘটনাটো সংঘটিত হয় আৰু সেই সময়ত বিমানখন পাটনাৰ ওপৰেৰে পাৰ হৈ গৈ আছিল ।
লগে লগে পাইলটজনে যান-বাহন নিয়ন্ত্ৰণ অৰ্থাৎ পাটনা এ টি চিক বিষয়টো অৱগত কৰে আৰু পাটনা বিমানবন্দৰত জৰুৰী অৱতৰণৰ অনুমতি বিচাৰে । এই বিষয়টো বিমানবন্দৰৰ বিষয়াসকলকো জনোৱা হয় । অৱতৰণৰ অনুমতি পোৱাৰ পিচত এছ জি 2950 নম্বৰৰ বিমানখনে পাটনা বিমানবন্দৰত জৰুৰী অৱতৰণ কৰে ।
জানিব পৰা মতে, সেই সময়ত বিমানখন পাটনা বিমানবন্দৰৰ পৰা এক কিলোমিটাৰ দূৰৈত আছিল । বিমানখনত ৮০ গৰাকী যাত্ৰী আছিল । কিন্তু পাইলটজনৰ দূৰদৰ্শিতাৰ বাবেই বিমানখনত থকা ৮০ গৰাকী যাত্ৰীৰ জীৱন ৰক্ষা পৰে আৰু বিমানখন সুৰক্ষিতভাৱে অৱতৰণ কৰায় ।
অ' এ জি ফ্লাইট ভিউৱে নিজৰ ৱেবছাইটত বিমানখনৰ বিষয়ে তথ্য প্ৰদান কৰিছে । আনহাতে, দিল্লীৰ পৰা শ্বিলঙলৈ যোৱা স্পাইচজেটৰ ২৯৫০ নম্বৰৰ বিমানখন বাতিল কৰা হয় । পাটনা বিমানবন্দৰৰ পৰা আন এখন বিমানেৰে যাত্ৰীসকলক শ্বিলঙলৈ প্ৰেৰণ কৰাৰ ব্যৱস্থা কৰা হয় ।
