নিউজ ডেস্ক, 26 আগষ্ট : চৰকাৰে বিগত 4 দশক ধৰি ছত্তীশগড়ৰ বস্তাৰত চলি থকা নক্সালবাদৰ সমাপ্তি ঘটাবলৈ নক্সাল নিৰ্মূল নীতি আৰু শান্তি আলোচনাৰ কথা উল্লেখ কৰি আহিছে । চৰকাৰে বিগত 7 মাহত 150 টাতকৈও অধিক মাওবাদীক হত্যা কৰা বুলি দাবী কৰিছে । এই দাবীসমূহৰ মাজতে উচ্চতম ন্যায়ালয়ৰ জ্যেষ্ঠ অধিবক্তা ক'লিন গনজালভেছে ৰাজ্য চৰকাৰৰ বিৰুদ্ধে গুৰুতৰ অভিযোগ উত্থাপন কৰিছে ।
তেওঁ কৈছে যে চৰকাৰে শান্তি আলোচনাৰ নামত দ্বৈত ৰাজনীতি গ্ৰহণ কৰি আছে । বস্তাৰত সংঘটিত সংঘৰ্ষত নিৰীহ জনজাতীয় লোক নিহত হৈছে । এই ক্ষেত্ৰত তেওঁ উচ্চতম ন্যায়ালয়ৰ কাষ চাপিব বুলি উল্লেখ কৰে । "বস্তাৰত নিৰন্তৰভাৱে ভুৱা সংঘৰ্ষ সংঘটিত হৈ আছে ।" তেওঁ উল্লেখ কৰে । লগতে তেওঁ এই মৃত্যুবোৰৰ তদন্তৰো দাবী জনায় ।
আনহাতে, এই মৃত্যুৰ গোচৰ সন্দৰ্ভত উচ্চতম ন্যায়ালয়ত আবেদন দাখিল কৰাৰ বিষয়টোও পোহৰলৈ আহিছে । বস্তাৰত সংবাদমেল সম্বোধন কৰি অধিবক্তা ক'লিন গনজালভেছে কয়, "মই এনকাউণ্টাৰত নিহত লোকসকলৰ তদন্ত কৰিবলৈ বস্তাৰলৈ আহিছো । নিহত লোকসকল নক্সালবাদীনে ? নে সাধাৰণ নাগৰিক ? তেওঁলোকৰ মৃত্যু মাওবাদীৰ গুলীত নে আৰক্ষীৰ গুলীত হৈছিল ? বিগত দুদিন ধৰি 70 জন লোকৰ ভিডিঅ' পৰীক্ষা কৰা হৈছে । 70 জন লোকৰ ভিতৰত আছে 35 গৰাকী মহিলা, যিয়ে ভুৱা সংঘৰ্ষত মৃত্যুবৰণ কৰিছে ।"
আনহাতে, তেওঁ ডি আৰ জিৰ বিৰুদ্ধেও অভিযোগ উত্থাপন কৰে । "বস্তাৰত নিয়োজিত ডি আৰ জি বাহিনী হৈছে চালৱা জুডুমৰ এক উন্নীত আৰু আটাইতকৈ বিপজ্জনক সংস্কৰণ । প্ৰথমটো আছিল চালৱা জুডুম, যিটো কিছু সময়ৰ বাবে আৰম্ভ কৰা হৈছিল । সেইটোক স্থায়ী কৰি ডি আৰ জি কৰা হৈছে । তেওঁলোকক কোৱা হৈছে যে 'যোৱা আৰু হত্যা কৰা' । ডি আৰ জিৰ ওপৰত ৰাজহুৱা অডিট হ'ব লাগে । আমি আদালতত এইটো দাবী কৰিম । ছত্তীশগড়ৰ বস্তাৰত সংঘটিত ঘটনাটো এক গণহত্যা । মণিপুৰত, গাজা ষ্ট্ৰিপত সংঘটিত হোৱা ঘটনাৰ দৰে বস্তাৰতো গণহত্যা সংঘটিত হৈছে । গণহত্যা কৰা লোকসকল হৈছে ডি আৰ জি ।" তেওঁ কয় ।
"বস্তাৰ আই জিৰ ওচৰত এক আবেদন আছে যে যদি তেওঁলোকৰ মাজত কোনো মাওবাদী আছে, তেন্তে লগে লগে তেওঁলোকক ধৰি কাৰাগাৰত ভৰাই দিয়ক । তেওঁলোকৰ মাজত নোসোমাও । কিন্তু যদি নাই তেন্তে তেওঁলোকক গণহত্যা কৰাটো বন্ধ কৰক । নিৰীহ লোকক হত্যা কৰাটো সহজ, কিন্তু প্ৰকৃত অপৰাধীক হত্যা কৰাটো অতি কঠিন । যদি আপোনাৰ সাহস আছে, তেন্তে ছত্তীশগড় আৰু বস্তাৰৰ ভিতৰত থকা প্ৰকৃত মাওবাদী আৰু সন্ত্ৰাসবাদীসকলক ধৰি কাৰাগাৰত ৰাখক ।" উচ্চতম ন্যায়ালয়ৰ অধিবক্তা ক'লিন গনজালভেছে কয় ।
অধিবক্তাগৰাকীয়ে লগতে কয়, "বস্তাৰত সংঘটিত গণহত্যা সন্দৰ্ভত উচ্চতম ন্যায়ালয়ত এখন আবেদন দাখিল কৰা হ'ব । ইয়াত 15-20 জন লোক জড়িত থাকিব । যিসকলৰ পৰিয়ালৰ লোক নিহত হৈছে তাৰ মাজৰ তেনে 35-40 জন লোকৰ স্বাক্ষৰ থাকিব । এই আবদনখন হত্যাৰ বাবে হ'ব, প্ৰত্যাক্ৰমণৰ বাবে নহয় । এই আবেদনত আদালতক দাবী কৰা হ'ব যে এই মৃত্যুবোৰৰ তদন্ত কৰা হওক । এই তদন্ত ছত্তীশগড় আৰক্ষীয়ে কৰা উচিত নহয় । ইয়াৰ বিপৰীতে এগৰাকী বাহিৰৰ অৱসৰপ্ৰাপ্ত ডি জি পিৰ দ্বাৰা কৰা উচিত, যাতে প্ৰকৃত সত্যটো ওলাই আহিব পাৰে ।
উল্লেখ্য যে, বিগত কেইবাদিনো ধৰি বস্তাৰত ভুৱা নক্সাল সংঘৰ্ষৰ বিষয়টোৱে তীব্ৰ চৰ্চা লাভ কৰি আহিছে । তাৰ মাজতে এতিয়া উচ্চতম ন্যায়ালয়ৰ এগৰাকী অধিবক্তাই ভুৱা এনকাউণ্টাৰত নিৰীহ জনজাতীয় লোকৰ মৃত্যু সন্দৰ্ভত আদালতত আবেদন দাখিল কৰিবলৈ আগবাঢ়িছে ।
