নেশ্যনেল ডেস্ক, ৩০ মাৰ্চ : দিল্লীৰ মুখ্যমন্ত্ৰী অৰবিন্দ কেজৰিৱালক গ্ৰেপ্তাৰৰ বিৰুদ্ধে আম আদমি পাৰ্টীৰ প্ৰতিবাদ অব্যাহত আছে । বিভিন্ন কাৰ্যসূচীৰ সমান্তৰালকৈ বিৰোধী মিত্ৰজোঁট 'ইণ্ডিয়া'ই ৩১ মাৰ্চত বৃহৎ ৰেলীৰ ঘোষণা কৰিছে । কেজৰিৱালক গ্ৰেপ্তাৰৰ বিৰুদ্ধে অনুষ্ঠিত হ'বলগীয়া এই ৰেলীক লৈ দিল্লীত ব্যাপক প্ৰস্তুতি দেখিবলৈ পোৱা গৈছে ।
তাৰ অংশ হিচাপে আম আদমি পাৰ্টীৰ নেতাসকলে শুকুৰবাৰে লোকসকলক ৰেলীলৈ নিমন্ত্ৰণ জনাইছে । নেতাসকলে ঘৰে ঘৰে গৈ এই ৰেলীত অংশগ্ৰহণৰ বাবে ৰাইজৰ সহযোগিতা বিচাৰিছে । আপৰ দিল্লীৰ আহ্বায়ক গোপাল ৰায়ে কেইবাজনো দলীয় কৰ্মীৰ সৈতে কেন্দ্ৰীয় দিল্লীৰ ৰেগৰপুৰা আৰু কৰোল বাগ অঞ্চলত লোকসকলক সাক্ষাৎ কৰে আৰু তেওঁলোকক ৰামলীলা ময়দানত বৃহৎ ৰেলীত যোগদান কৰিবলৈ আহ্বান জনায় ।
ৰায়ে কয় যে কেন্দ্ৰৰ বিজেপি চৰকাৰে দিল্লীৰ জনপ্ৰিয় মুখ্যমন্ত্ৰীজনক গ্ৰেপ্তাৰ কৰাৰ দিনৰে পৰা মানুহ মাজত ক্ষোভ দেখিবলৈ পোৱা গৈছে । তেওঁ কয় যে আপৰ নেতাসকলে ঘৰে ঘৰে গৈ নিমন্ত্ৰণী পত্ৰ বিতৰণ কৰিছে আৰু ৰাইজক ৰামলীলা ময়দানলৈ আহি গণতন্ত্ৰ আৰু একনায়কত্ববাদৰ বিৰুদ্ধে শান্তিপূৰ্ণভাৱে মাত মাতিবলৈ আহ্বান জনাইছে ।
তেওঁ লগতে কয় যে ভাৰতৰ বিৰোধী দলৰ সকলো বিশিষ্ট নেতাই এই সমদলত অংশগ্ৰহণ কৰিব । দলৰ নেতা বিষেশ ৰবিয়েও কেজৰিৱালৰ গ্ৰেপ্তাৰৰ বিৰুদ্ধে প্ৰতিবাদ কৰিবলৈ এক শোভাযাত্ৰাত অংশ লয় । ইফালে আপৰ বিধায়ক সোমনাথ ভাৰতীয়ে অভিযোগ কৰি কয় যে তেওঁ আৰু সহযোগী নেতা বীৰেন্দ্ৰ কাদিয়ানক দিল্লী কেণ্ট অঞ্চলত ৰেলীলৈ লোকসকলক নিমন্ত্ৰণ জনোৱাৰ সময়ত আৰক্ষীয়ে বাধা দিছে ।
আৰক্ষীয়ে ধাৰা ১৪৪ৰ অজুহাত দেখুৱাইছিল । তেওঁৰ মতে বিজেপিয়ে প্ৰথমে আম আদমি পাৰ্টীৰ শীৰ্ষ নেতাসকলক কাৰাগাৰলৈ লৈ যাব বিচাৰে আৰু তাৰ পিচত আপৰ প্ৰাৰ্থীসকলক নিৰ্বাচনৰ প্ৰচাৰত বাধা দিব বিচাৰে ।
লগতে পঢ়ক : কেজৰিৱালক মুখ্যমন্ত্ৰীৰ পদৰ পৰা অপসাৰণ কৰিবলৈ অস্বীকাৰ দিল্লী উচ্চ ন্যায়ালয়ৰ - Delhi CM Arvind Kejriwal
