প্ৰয়াগৰাজ, উত্তৰ প্ৰদেশ : মহা কুম্ভমেলা সমাগত । ইতিমধ্যে ইয়াৰ বাবে প্ৰস্তুতি তুংগত উঠিছে । ভাৰতৰ পবিত্ৰ নদীৰৰ পাৰত এই হিন্দু ধৰ্মীয় উৎসৱৰ বাবে এখন অস্থায়ী চহৰ নিৰ্মাণ কৰা হৈছে । ইয়াত জনসমাগম ইমান বিশাল হ'ব বুলি আশা কৰা হৈছে যে ইয়াক মহাকাশৰ পৰা ইতিহাসৰ সৰ্ববৃহৎ সমাবেশ হিচাপে পৰিলক্ষিত হ'ব ।
প্ৰয়াগৰাজত নদীৰ ওপৰত শাৰী শাৰী পল্টন দলং নিৰ্মাণ কৰা হৈছে । ইয়াৰ দ্বাৰা ভাৰতীয় কৰ্তৃপক্ষই ছয় সপ্তাহ ধৰি চলিবলগা কুম্ভমেলাৰ সময়ত 400 নিযুত তীৰ্থযাত্ৰীক আদৰিবৰ বাবে বাবে প্ৰস্তুতি চলাইছে ।
উল্লেখ্য যে এই জনসমুদ্ৰ আমেৰিকা আৰু কানাডাৰ মুঠ জনসংখ্যাতকৈও অধিক । ধৰ্মীয় শ্ৰদ্ধা আৰু পৰম্পৰাগত স্নানৰ এই সহস্ৰাব্দ পুৰণি পবিত্ৰ আয়োজন প্ৰতি 12 বছৰৰ মূৰত এবাৰকৈ উক্ত স্থানত আয়োজন কৰা হয় য'ত গংগা, যমুনা আৰু পৌৰাণিক সৰস্বতী নদীৰ সংগম ঘটিছে ।
কিন্তু 13 জানুৱাৰীৰ পৰা 26 ফেব্ৰুৱাৰীলৈ অনুষ্ঠিত হ'বলগীয়া এইবাৰৰ সংস্কৰণটো এক বৃহৎ সমাবেশ হ'ব বুলি আশা কৰা হৈছে । কিয়নো এই সমাবেশে পৃথিৱীৰ এক বিশেষ উৎসৱৰ স্বীকৃতি লাভ কৰিবলৈ আগবাঢ়িছে ।
অনুষ্ঠানৰ বাবে কৰ্মৰত শ্ৰমিক বাবু চান্দৰ কপালত ঘামৰ টোপালবোৰ জিলিকি উঠিছে । কিয়নো তেওঁ 4,000 হেক্টৰ (15 বৰ্গ মাইল)তকৈ অধিক স্থানত দিন-ৰাতি একাকাৰ কৰি এক অন্তহীন বৈদ্যুতিক তাঁৰ স্থাপনৰ বাবে খাদ খনন কৰি আছে । 48 বছৰীয়া চান্দে এ এফ পিক কয়, "বহুত সংখ্যক ভক্ত আহিব ।" তেওঁ লগতে কয় যে তেওঁ এই মেলাৰ বাবে এক পুণ্যৰ কাম কৰি আছে ।
"মই অনুভৱ কৰো যে মই মোৰ ক্ষুদ্ৰ অৱদান আগবঢ়াই আছো, মই যি কৰি আছো সেয়া এক পবিত্ৰ কাৰ্য যেন লাগিছে ।" তেওঁ লগতে কয় ।
শুদ্ধ বিশ্বাস
উত্তৰ প্ৰদেশৰ প্ৰয়াগৰাজ, যাক পূৰ্বতে এলাহাবাদ বুলি কোৱা হৈছিল, প্লাৱনভূমিত ম্যানহাটানৰ দুই-তৃতীয়াংশ এলেকাত এক সুবিশাল টেণ্ট চিটি নিৰ্মাণ কৰা হৈছে । মহোৎসৱৰ মুখপাত্ৰ বিবেক চতুৰ্বেদীয়ে কয়, "প্ৰায় 350 ৰ পৰা 400 নিযুত ভক্তই মেলা পৰিদৰ্শন কৰিবলৈ গৈ আছে । সেয়ে আপুনি ইয়াৰ প্ৰস্তুতিৰ পৰিমাণ কেনে হ'ব সেয়া কল্পনা কৰিব পাৰে ।"
কুম্ভমেলাৰ বাবে প্ৰস্তুতি কৰাটো হৈছে এখন নতুন দেশ প্ৰতিষ্ঠা কৰাৰ দৰে । ইয়াৰ বাবে ৰাস্তা, পোহৰ, আৱাস আৰু নৰ্দমাৰ প্ৰয়োজন । "এই অনুষ্ঠানটোক অনন্য কৰি তোলাৰ যি ব্যৱস্থা সেয়া হৈছে ইয়াৰ মহত্ব আৰু আন এক তথ্য হৈছে যে ইয়াত কাকো কোনোৱে নিমন্ত্ৰণ নজনায়... সকলোৱে নিজাববীয়াকৈ আহে, এক শুদ্ধ বিশ্বাসৰ দ্বাৰা চালিত ।" চতুৰ্বেদীয়ে এ এফ পিক কয় । "পৃথিৱীৰ কোনো ঠাইতে আপুনি এই আকাৰৰ এক সমাবেশ দেখা নাপাব, আনকি ইয়াৰ এক দশমাংশও নহয় ।"
উল্লেখ্য, প্ৰায় ১.৮ নিযুত মুছলমানে চৌদি আৰবৰ মক্কাত প্ৰতিবছৰে হজযাত্ৰাত অংশগ্ৰহণ কৰে । চতুৰ্বেদীৰ মতে, কুম্ভমেলাৰ নিৰ্মাণৰ সংখ্যাবোৰ মনত ৰাখিবলগা । প্ৰায় 150,000 শৌচালয় নিৰ্মাণ কৰা হৈছে, 68,000 এলইডি লাইটৰ খুঁটা নিৰ্মাণ কৰা হৈছে আৰু ৰাজহুৱা পাকঘৰবোৰে একে সময়তে 50,000 লোকক খাদ্য যোগান ধৰিব পাৰে ।
ধৰ্মীয় প্ৰস্তুতিৰ লগতে প্ৰয়াগৰাজত এক গুৰুত্বপূৰ্ণ আন্তঃগাঁথনি পৰিৱৰ্তনো চলিছে । প্ৰধানমন্ত্ৰী নৰেন্দ্ৰ মোদী আৰু ৰাজ্যৰ মুখ্যমন্ত্ৰী যোগী আদিত্যনাথৰ বিশাল পোষ্টাৰে চহৰখন উজলাই তুলিছে । দুয়োগৰাকী শাসকীয় হিন্দু জাতীয়তাবাদী তথা বিজেপি নেতা ৰাজনীতি আৰু ধৰ্মৰ সৈতে গভীৰভাৱে জড়িত হৈ আছে ।
অমৰত্বৰ অমৃত
কুম্ভমেলা হৈছে এক প্ৰাচীন উৎসৱ, যাৰ উৎপত্তি হিন্দু পৌৰাণিক কাহিনীত নিহিত । হিন্দুসকলে বিশ্বাস কৰে যে নদীসমূহৰ সংগমস্থলত স্নান কৰিলে তেওঁলোকৰ পাপ মোচন হ'ব আৰু তেওঁলোকে 'মোক্ষ' লাভ কৰাত সহায় কৰিব, যাৰ ফলত তেওঁলোক জন্ম আৰু মৃত্যুৰ চক্ৰৰ পৰা মুক্ত হ'ব ।
কিংবদন্তী অনুসৰি, দেৱতা আৰু ৰাক্ষসসকলে অমৰত্বৰ অমৃত থকা এটা কলহ বা 'কুম্ভ'ৰ বাবে যুঁজ দিছিল । এই যুদ্ধৰ সময়ত চাৰি টোপাল পৃথিৱীত পৰিছিল । তাৰে এটা টোপাল প্ৰয়াগৰাজত পৰিছিল । আন টোপালবোৰৰ এটা হৰিদ্বাৰত, এটা নাছিকত আৰু এটা উজ্জয়িনীত পৰিছিল ।
উল্লেখ্য যে, এই তিনিখন চহৰতো পৰ্যায়ক্ৰমে ইখনৰ পিছত সিখনত কুম্ভমেলা অন্য বছৰবোৰত অনুষ্ঠিত হয় । কিন্তু প্ৰয়াগৰাজত প্ৰতি 12 বছৰত অনুষ্ঠিত হোৱা এই কুম্ভমেলা আটাইতকৈ ডাঙৰ । আয়োজক কৰ্তৃপক্ষই ইয়াক মহান বা 'মহা' কুম্ভমেলা বুলি অভিহিত কৰিছে ।
কৰ্তৃপক্ষই জনোৱা অনুসৰি, 2019 চনত প্ৰয়াগৰাজত অন্তিমবাৰ অনুষ্ঠিত কুম্ভমেলাত 240 নিযুত ভক্তৰ সমাৱেশ ঘটিছিল । কিন্তু সেইটো আছিল সৰু বা 'অৰ্ধ' উৎসৱ, যিটো মুখ্য অনুষ্ঠানটোৰ মাজত আছিল । 69 বছৰীয়া বুৰঞ্জীবিদ হেৰম্ব চতুৰ্বেদীয়ে কয়, "যেতিয়া আপুনি কুম্ভৰ বিষয়ে উল্লেখ কৰিব যাব, তেতিয়া আপুনি জ্যোতিৰ্বিজ্ঞানৰ বিষয়েও ক'ব লাগিব ।"
তেওঁ লগতে কয়, "বৃহস্পতিয়ে এটা বছৰত এটা ৰাশিৰ চিহ্ন পৰিবহণ কৰে । সেয়েহে, যেতিয়া ই 12 টা ৰাশি চিহ্ন সম্পূৰ্ণ কৰে, তেতিয়া ই হৈছে কুম্ভ ।" তেওঁ কয় যে এই উদযাপনৰ মূল বিষয় হৈছে "জ্ঞানী আৰু বিদ্বান, দৰিদ্ৰ আৰু প্ৰয়োজনীয় লোক"ক ভিক্ষা প্ৰদান কৰা ।
নগ্ন সন্ন্যাসী
এই কুম্ভমেলালৈ এনে কিছুমান তীৰ্থযাত্ৰী ইতিমধ্যে আহিছে, যাৰ ভিতৰত আছে উলংগ নগা সাধু । তেওঁলোকে দূৰৱৰ্তী পৰ্বত আৰু অৰণ্যৰ পৰা কেইবা সপ্তাহ ধৰি খোজকাঢ়ি আহিছে, য'ত তেওঁলোকে সাধাৰণতে ধ্যানত মগ্ন হৈ থাকে ।
তেওঁলোকে 13 জানুৱাৰীত আৰম্ভ হ'বলগীয়া ছয়টা অতি পৱিত্ৰ স্নানৰ প্ৰথমটোত নেতৃত্ব দিব । ভয়ংকৰ জঁটাধাৰী 90 বছৰীয়া নগা উলংগ সাধু দিগম্বৰ ৰমেশ গিৰিয়ে এ এফ পিক কয়, "মই ৰাইজক মোৰ আশীৰ্বাদ দিবলৈ ইয়ালৈ আহিছোঁ । আপুনি হৃদয়েৰে যি বিচাৰে কুম্ভত পাব ।"
(শিৰোনামৰ বাহিৰে এই প্ৰতিবেদনত ইটিভি ভাৰতে একো সম্পাদনা কৰা নাই আৰু এই প্ৰতিবেদন এক ছিণ্ডিকেটেড ফীডৰ পৰা প্ৰকাশ কৰা হৈছে।)
