راجستھان کے کھیت میں پاکستانی پرچم والا غبارہ برآمد

راجستھان کے کھاجوالا شہر میں پاکستانی پرچم والا ایک غبارہ ملنے پر شک و شبہات کا اظہار کیا جارہا ہے جبکہ اس بارے میں خفیہ ایجنسیوں کو اطلاع دی جاچکی ہے۔

اطلاعات کے مطابق آج راجستھان میں بیکانیر ضلع کے کھاجوالا شہر کے ایک کھیت میں پاکستانی پرچم نقش شدہ ایک غبارہ پایا گیا جس پر ’آزادی مبارک‘ تحریر تھا۔

ایک مقامی کسان نے سب سے پہلے اس غبارے کو دیکھا اور پولیس کو اس کی اطلاع دی۔ غبارے کو تھانہ کھاجوالا میں رکھا گیا ہے۔

پولیس نے اس سلسلہ میں خفیہ ایجنسیوں کو آگاہ کردیا ہے اور معاملہ کی جانچ کی جارہی ہے۔ کھاجوالا شہر حساس علاقہ مانا جاتا ہے جو بھارتی اور پاکستان سرحد پر واقع ہے۔

واضح رہے کہ ماضی میں بھی یہاں اس طرح غبارے پائے گئے تھے۔