اقلیتی بہبود کے ضلعی افسر محمد خالد کو عہدے سے برخاست کیا گیا

ریاست اترپردیش کے رامپور میں اقلیتی بہبود کے ضلعی افسر محمد خالد کو ان کے عہدے سے برخاست کردیا گیا ہے۔ ضلع انتظامیہ رویندر کمار ماندڑ نے بتایا کہ ان کے خلاف بے ضابطگیوں کی کئی شکایات تھیں اور جانچ میں قصوروار تصدیق کیے گئے ہیں، اسی لیے محکمۂ اقلیتی بہبود نے ان کو عہدے سے برخاست کردیا ہے۔

رامپور کے اقلیتی بہبود کے افسر محمد خالد کو ان کے عہدے سے برخاست کردیا گیا۔ اطلاعات کے مطابق ان کے خلاف لاپرواہیاں برتنے اور بے ضابطگیوں کی متعدد شکایات اترپردیش حکومت کے محکمۂ اقلیتی بہبود کے دفتر پہنچی تھیں۔

ساتھ ہی ہم آپ کو بتادیں کہ ای ٹی وی بھارت نے گزشتہ دنوں رامپور کے مدرسہ جامع العلوم فرقانیہ اور تحصیل ٹانڈہ کے مدرسہ رحمانیہ میں جاری بے ضابطگیوں کو دکھایا تھا، جس میں متاثرین نے ان مدارس کے ساتھ ہی اقلیتی بہبود کے افسر محمد خالد کی کارکردگی پر بھی اپنی ناراضگی کا اظہار کیا تھا۔ یہی وجہ ہے کہ محمد خالد کی برخاستگی کو ای ٹی وی بھارت کی ان خبروں سے بھی جوڑ کر دیکھا جارہا ہے۔

اس معاملے پر ضلع مجسٹریٹ رویندر کمار ماندڑ نے کہا کہ محمد خالد کی برخاستگی کے بعد اب نئے افسر کی تعیناتی کے بعد ہی مدارس سے ملنے والی شکایات کو دور کرایا جائے گا۔

بہرحال اب دیکھنا ہوگا کہ نئے افسر کی تعیناتی کے بعد کیا ان مدارس میں متاثر اساتذہ اور ملازمین کو انصاف مل سکے گا یا نہیں۔