کولر گرم ہوا دے رہا ہے تو کچن میں رکھا نمک اسے ٹھنڈا کرنے کے لیے کافی، یہ ٹِپس نوٹ کر لیں - Air Cooler Tips

اس شدید گرمی میں اگر کولر کام نہیں کر رہا ہے اور آپ بھی اس کی گرم ہوا سے پریشان ہیں تو آج ہم آپ کو ایک ایسی آسان ترکیب بتا رہے ہیں جس سے آپ کی یہ پریشانی دور ہو جائے گی۔ Cooling mixture for Cooler

حیدرآباد (نیوز ڈیسک): اس سال کی شدید گرمی نے سب کو بے حال کر دیا ہے۔ بڑھتی ہوئی تپش کی وجہ سے پنکھا، کولر کچھ بھی کام نہیں کر رہا ہے۔ اگرچہ اے سی سے لوگوں کو کچھ راحت مل جاتی ہے لیکن پنکھے اور کولر سے نکلنے والی گرم ہوا سے سب پریشان ہیں۔ دن بھر کی چلچلاتی دھوپ اور گرم ہوا کے نتیجے میں آج کل رات میں بھی راحت ملنا مشکل ہو گیا ہے۔

ایسے میں آپ کے گھر میں موجود کولر بھی اگر گرم ہوا پھینکنے لگا ہے اور آپ گرمی سے بچنے کے لیے ٹھنڈی ہوا چاہتے ہیں تو آج ہم آپ کو ایک ایسی ہی آسان ترکیب بتا رہے ہیں، جس سے آپ کا یہ مسئلہ حل ہو جائے گا اور آپ کو کولر سے بہترین ٹھنڈی ہوا ملے گی۔

• نمک اور برف کی ضرورت

خاص بات یہ ہے کہ اس کے لیے آپ کو نہ تو کوئی اضافی محنت کرنی پڑے گی اور نہ ہی کوئی پیسہ خرچ کرنا پڑے گا۔ کولر سے اچھی ٹھنڈی ہوا پانے کے لیے اپنے کچن میں رکھا ہوا نمک اور فریج میں جمی ہوئی برف لے آئیں۔ کولر کی ہوا ٹھنڈی کرنے کے لیے آپ ان دونوں چیزوں کو کسی برتن میں ملا کر کولر کے ٹینک میں رکھ دیں۔

• نمک اور برف کا تناسب

یہ ثابت شدہ سائنس ہے کہ برف میں نمک ملانے سے درجہ حرارت میں کافی کمی واقع ہوتی ہے۔ اسی لیے قلفی بنانے والے لوگ اپنے باکس میں نمک اور برف کو تہہ در تہہ جماتے ہیں، پھر اس کی مدد سے دن بھر قلفی بناتے رہتے ہیں۔ تاہم اس ترکیب کو آزماتے وقت آپ کو یہ بات ذہن میں رکھنا ہوگی کہ برف میں نمک ملانے کی ایک حد ہوتی ہے۔ اس کا تناسب 3:1 ہونا چاہیے یعنی چار حصے میں تین حصہ برف اور ایک حصہ نمک ہونا چاہیے۔ اس سے زیادہ نمک ملانا ٹھیک نہیں، ورنہ اس سے کولنک اور انجماد کا عمل بھی متاثر ہوگا۔

• نمک اور برف کی سائنس

عام طور پر جب لوگ اپنے کولر کی ہوا ٹھنڈی کرنے کے لیے اس کے پانی میں برف ڈالتے ہیں تو اس سے بہت کم وقت کے لیے ٹھنڈی ہوا ملتی ہے لیکن اگر برف میں نمک ملا کر کسی ہلکے اسٹیل کے برتن میں رکھ دیں تو کولر کافی دیر تک ٹھنڈی ہوا فراہم کر سکتا ہے۔ کیونکہ برف میں نمک ملانے سے برف کا نقطہ انجماد بڑھ جاتا ہے اور برف زیادہ دیر تک نہیں پگھلتی۔ اس کی وجہ سے آپ کا کولر کافی دیر تک ٹھنڈی ہوا دیتا رہے گا۔

واضح رہے کہ برف میں نمک ملانے سے اس کا نقطہ انجماد صفر ڈگری سینٹی گریڈ سے نیچے چلا جاتا ہے۔ برف کا یہ درجہ حرارت 18 ° سے -21 ° تک نیچے جا سکتا ہے۔ ایسی صورت حال میں جب برف اور نمک والے برتن کو کولر میں رکھیں گے تو یہ برف زیادہ دیر تک جمی رہے گی اور کولر کے پانی کو لمبے وقت تک ٹھنڈا کرتی رہے گی۔

خاص بات یہ ہے کہ اس ترکیب پر عمل کرنے کے لیے آپ کو اپنی جیب بھی ڈھیلی نہیں کرنا ہوگی۔ عام طور پر برف اور نمک گھروں میں دستیاب ہوتا ہے۔ اگر آپ کے پاس برف نہ بھی ہو تب بھی آپ اسے بازار سے یا کسی پڑوسی سے لے کر اس میں نمک ملا کر کولر کے ٹینک میں استعمال کر سکتے ہیں۔ اس کے لیے آپ کو زیادہ محنت نہیں کرنی پڑے گی۔