'جادوئی کرسی' جو نیتاؤں کے بیٹھتے ہی ان کے وعدے یاد دلائے گی، ان کے جھوٹ کو بے نقاب کرے گی - AI CHAIR OF LEADERS

گورکھپور کے طلباء نے ایک ایسی کرسی بنائی ہے جس پر بیٹھتے ہی سیاسی رہنماؤں کے بارے میں سب کچھ بتا دے گی اور ان کے تمام راز کھول دے گی۔ لیڈران بھی اب اس بات سے انکار نہیں کرپائیں گے کہ عوام ان سے ناراض ہے۔

گورکھپور(اترپردیش): گورکھپور کے طلبا نے ایک ایسی نایاب کرسی تیار کی ہے جس پر بیٹھنے کے بعد لیڈران کو عوام سے کئے گئے وعدے یاد آنے لگیں گے اور وہ عوام سے کیے گئے وعدوں کو بھول بھی نہیں پائیں گے۔ نیتا جی جیسے ہی اس جادوئی کرسی پر بیٹھیں گے ان کو انتخابات کے دوران کیے گئے سب وعدے یاد آنے لگیں گے۔

گورکھپور کے آئی ٹی ایم انجینئرنگ کالج میں کمپیوٹر سائنس کی تعلیم حاصل کرنے والے طلباء نے مل کر ایک ایسی کرسی بنائی ہے جو بیٹھتے ہی لیڈروں کو ان کے وعدے یاد دلائے گی۔

• لیڈروں کو وعدے یاد دلائے گی کرسی

آئی ٹی ایم کالج کے کمپیوٹر اور ڈیٹا سائنس کے طلب علم انشیت سریواستو اور ان کی ٹیم کے ممبران پرناو شرما اور مانویندر ترپاٹھی نے ایک ایسی "اے آئی چیئر" بنائی ہے جس پر لیڈر کے بیٹھتے ہی، یہ کرسی ان کے ذریعہ کیے گئے عوام سے وعدے یاد دلائے گی۔ اگر علاقے کے لوگ ناراض ہوں گے تو کرسی قائدین کو اس بات کا بھی احساس دلائے گی۔

طالب علم پرناو شرما کا کہنا ہے کہ یہ 'اے آئی چیئر'، سب کو ذہن میں رکھتے ہوئے ڈیزائن کی گئی ہے، چاہے وہ وزیر اعظم ہو یا وزیر اعلی، اس میں بہت سی خصوصیات ہیں۔ یہ کرسی نہ صرف قائدین کو روزگار، تعلیم، خواتین، روڈ سیفٹی وغیرہ جیسے مسائل کے بارے میں عوام سے کئے گئے وعدوں کی یاد دلائے گی بلکہ ان کو پورا نہ کرنے پر ناراض عوام کے خلاف انتباہ بھی کرے گی۔

اس کرسی کو جلد ہی سوشل میڈیا سے منسلک کیا جانے والا ہے۔ انہوں نے بتایا کہ اس کرسی پر نصب سرخ اور سبز روشنی کے انڈیکیٹر کے ذریعے قائدین کے کام کا جائزہ لیا جائے گا۔ عوام یہ تشخیص خود کریں گے اور سوشل میڈیا پلیٹ فارم کے ذریعے انہیں 'اچھے' یا 'برے' نمبر دے سکیں گے۔

• کرسی پر سینسر نصب

طالب علم پرناؤ نے بتایا کہ کرسی پر سینسر نصب ہیںان کے ایکٹیو ہونے سے وزیر اعظم، وزیرِ اعلیٰ یا کسی دوسرے لیڈر کو بھی اس کرسی کے ذریعہ اشارے ملنا شروع ہو جائیں گے اور ان کو معلوم ہو جائے گا کہ کتنے لوگ ان کو پسند یا ناپسند کر رہے ہیں۔

کرسی پر بیٹھنے والے کو بھی اپنے کام کی معلومات اور مقبولیت کے بارے میں علم ہوجائے گا۔ یہ کرسی عوام کی ناراضگی کا اندازہ لگا کر خود بہ خود ہلنے لگتی ہے۔ اس سے لیڈروں کو یہ بھی محسوس ہوتا ہے کہ عوام ناراض ہے۔

• کرسی کو تیار کرنے میں صرف 15 دن لگے

انسٹی ٹیوٹ کے ڈائریکٹر این کے سنگھ نے کہا کہ یہ اے آئی چیئر مستقبل میں ٹیکنالوجی کے ذریعے اس کرسی کی زیادہ اہمیت ہو جائے گی اور ملک کے مستقبل کا فیصلہ کرنے میں اس کا بہت بڑا رول ہوگا۔

ان ہونہارطلبأ نے 35 ہزار روپے خرچ کر کے صرف 15 دن میں یہ کرسی تیار کی ہے۔ اس کی تیاری میں اینڈرائیڈ موبائل، ریڈ اینڈ گرین انڈیکیٹرز، پن کیبل، فائبر چیئر، پی سی بی بورڈ، بیٹری وغیرہ استعمال کیے گئے ہیں۔

دریں اثنا، مدن موہن مالویہ ٹیکنالوجیکل یونیورسٹی، گورکھپور کے ریٹائرڈ پروفیسر نریندر سنگھ نے کہا کہ بچوں نے بہت اچھی اور جدید کرسی بنائی ہے۔ مجموعی طور پر اس سے عوامی نمائندوں کو اپنی ذمہ داری کا بھی احساس ہوگا جو انہوں نے عوام سے وعدے کئے تھے اب اس کو فراموش نہیں کر پائیں گے۔ طلباء کی کاوشیں قابل تعریف ہیں۔