شیعہ مسجد املاک کے کرایہ داروں کی جانچ کرائے گا بورڈ - Shia Mosque in Gaya

Board will examine the tenets of Shia mosque properties: گیا کی شیعہ مسجد وقف املاک تنازعہ کی جانچ ضلع انتظامیہ کی سطح سے کیا جائے گا، گزشتہ روز بورڈ کے چیئرمین نے بھی اس کا جائزہ لیا تھا، نوڈل آفیسر وقف گیا نے آج موقع پر پہنچ کر کمیٹی کے افراد سے پوری جانکاری حاصل کی ہے۔

گیا:گیا شہر کے توتباڑی محلہ میں واقعہ شیعہ مسجد احاطے میں ایک کرایہ دار اور کمیٹی کے درمیان پیدا ہوئے تنازعہ نے طول پکڑلیا ہے۔ معاملہ شیعہ وقف بورڈ تک جا پہنچا ہے۔ بورڈ معاملے کی گہرائی سے جانچ کی ذمے داری ضلع انتظامیہ کو سونپی ہے۔ ڈسٹرک مجسٹریٹ کی ہدایت کی روشنی میں ضلع نوڈل آفیسر وقف راہل کمار نے شیعہ مسجد پہنچ کر پورے معاملے سے واقف ہوئے ہیں۔ حالانکہ اس دوران ایک فریق کی موجودگی سے پورے معاملے جانچ نہیں ہوسکی ہے۔

کمیٹی شیعہ مسجد کا دعویٰ ہے کہ کرایہ دار ذالفقار حیدر مسجد سے متصل امام باڑہ اعزا خانہ کی توسیع میں رخنہ ڈال رہے ہیں کیونکہ وہ شیعہ مسجد احاطے میں واقع اپنے کرایہ کے مکان کو خالی نہیں کررہے ہیں جب کہ انہیں کئی بار نوٹس بھی دی جا چکی ہے۔ تاہم وہ اس پر عمل کرنے سے انکار کررہے ہیں۔ جس کی وجہ سے اعزا خانہ کی توسیع نہیں ہو پا رہی ہے۔ یہاں محرم اور دیگر مواقع پر جب مجلس منعقد ہوتی ہے تو جگہ کی قلت کا سامنا ہوتا ہے۔ معاملہ شیعہ وقف بورڈ تک پہنچ چکا ہے۔ شیعہ وقف بورڈ کے چیئرمین گزشتہ روز شیعہ مسجد پہنچ کر جائزہ بھی لے چکے ہیں۔ شیعہ وقف بورڈ نے جانچ کے لیے ضلع نوڈل آفیسر کو ذمہ داری ہے۔

آج نوڈل آفیسر نے موقع پر پہنچ جائزہ لیا۔ حالانکہ اس دوران صرف انجمن امامیہ وقف کے سکریٹری سید جاوید ہی پہنچے جب کہ دوسرے فریق کی عدم موجودگی سے پوری تحقیقات مکمل نہیں ہوسکی۔ نوڈل آفیسر نے بتایا کہ جب تک دونوں فریق کی باتوں کو سنا نہیں جائے گا اور کاغذات کی جانچ نہیں ہوگی تب تک نتیجہ پر پہنچنا ممکن نہیں ہے۔ دونوں کے موقف اور کاغذات کی جانچ و تصدیق کے بعد ہی رپورٹ بھیجی جائے گی۔ انہوں نے بتایا کہ بورڈ نے اسے انتہائی حساس معاملہ قرار دیا ہے اور اس وجہ سے سبھی پہلوؤں کی جانچ ضروری ہے۔