کاشی پور: 17 اپریل کو جب پورا ملک رام نومی منا رہا تھا، اسی وقت کاشی پور کی ایک خاتون درندہ بن گئی۔ الزام ہے کہ اس خاتون نے اپنی سوتیلی بیٹی کو قتل کیا۔ اس کے بعد اس نے لاش کو بھی ٹھکانے لگایا۔ لیکن سی سی ٹی وی فوٹیج نے قتل کا پردہ فاش کر دیا۔ جس کے بعد پولیس نے خاتون کے خلاف مقدمہ درج کرکے اسے گرفتار کرلیا۔
کاشی پور کے آئی ٹی آئی تھانہ علاقہ کے کھڑکپور دیوی پورہ کے رہنے والے مونو پرجاپتی الیکٹریکل فٹنگ کا کام کرتے ہیں۔ پانچ سال قبل ان کی بیوی رینا دیوی بیماری کی وجہ سے انتقال کر گئی تھیں۔ ان کی دو بیٹیاں سونی اور تنو ہیں۔ تنو اپنی خالہ کے گھر رہتی ہے۔ چار سال قبل مونو کی دوسری شادی لکشمی دیوی سے ہوئی، جو گاؤں فاضل پور، تھانہ دلاری، ضلع مرادآباد کی رہائشی تھی۔ ان کا ایک بیٹا اور ایک بیٹی ہے۔ لکشمی اکثر اپنی سوتیلی بیٹی سونی کو مارتی تھی۔
16 اپریل کو مونو اپنے کزن سے ملنے بجنور کے گالہ کھیڑی گیا تھا۔ 17 اپریل کو سونی کو کنیا پوجا کے لیے تیار کرنے کے بعد اس کی دادی سنتوش دیوی بھی چلی گئیں۔ اسی دن شام کو لکشمی نے اپنے شوہر کو فون کیا اور سونی کے لاپتہ ہونے کی اطلاع دی۔ مونو نے گھر پہنچ کر اپنی بیٹی کو تلاش کیا اور 112 نمبر پر آئی ٹی آئی پولیس کو اطلاع دی۔
مزید پڑھیں:
اگلے دن پولیس نے سی سی ٹی وی فوٹیج چیک کی۔ ایک فوٹیج میں لکشمی کو اپنی سوتیلی بیٹی سونی کے ساتھ سامنے کے زیر تعمیر مکان میں جاتے ہوئے دیکھا گیا۔ پولیس نے جب اس سے سختی سے پوچھ گچھ کی تو لکشمی نے قتل کا اعتراف کر لیا۔ ان کی اطلاع پر پولیس نے جمعرات کی رات 12 بجے گھر میں ڈالی گئی ریت سے سونی کی لاش برآمد کی۔ اس کے گلے میں رسی کے نشان اور جسم پر مختلف جگہوں پر چھالے تھے۔ پولیس نے پوسٹ مارٹم کے بعد نعش والد کے حوالے کر دی۔ پولیس نے ملزمہ لکشمی کے خلاف مقدمہ درج کر کے اسے گرفتار کر لیا ہے۔
