مظفر نگر: نور جویلرز کی دکان سے دن دہاڑے لاکھوں کی ڈکیتی، کئی ملزمین گرفتار - Police Solved Robbery

ضلع مظفر نگر میں نور جویلرز کی دکان سے لاکھوں کی ڈکیتی کی واردات کا پولیس نے انکشاف کیا ہے۔ اس پر نور جویلرز کے مالک فخر الحسن نے پولیس کا شکریہ ادا کیا۔

مظفر نگر:اتر پردیش کے مظفر نگر ضلع پولیس نے 15 جولائی کو فخر الحسن کی جیویلری کی دکان اور گھر میں ہوئی ڈکیتی کی واردات کا انکشاف کرتے ہوئے آٹھ لٹیروں کو گرفتار کرنے میں کامیابی حاصل کی۔ آپ کو بتا دیں کہ جمعہ کی دیر رات انکاؤنٹر کے دوران پولیس نے چار لٹیروں کو گرفتار کیا تھا دوران تفتیش میں چار اور لٹیروں کو پولیس نے گرفتار کر لیا۔ اس ڈکیتی کے معاملے میں پولیس کے مطابق پانچ اور لٹیرے ابھی گرفت سے باہر ہیں۔ جن کو جلد ہی گرفتار کر لیا جائے گا۔ گرفت میں آئے ان لٹیروں کے قبضے سے پولیس نے لوٹے گئے سونے و چاندی کے زیورات دو بائیک غیر قانونی اسلحہ برآمد کیا ہے۔

اس سے متعلق مزید جانکاری دیتے ہوئے مظفر نگر ایس ایس پی ابھیشیک سنگھ نے بتایا کہ 15 جولائی پیر کو ضلع مظفر نگر میں نور جیویلرز کے یہاں ایک لوٹ کی واردات ہوئی تھی جس میں کچھ شرپسند برقعہ پہن کر جیویلری کی دکان میں گھس گئے تھے اور اندر سبھی کو یرغمال بناتے ہوئے لوٹ کی واردات کو انجام دیا تھا۔ اس واردات کے انکشاف کے لیے چار ٹیمیں تشکیل دی گئی تھیں۔ جس میں سے ایس او جی کی ٹیم بھی شامل تھی۔ انہوں نے بتایا کہ اس واردات کے انکشاف کے لیے ایس پی سی ٹی اور میرے ذریعے پرسنلی مونیٹرنگ کی جا رہی تھی اور دن رات کڑی محنت کرتے ہوئے اس پوری واردات کا انکشاف کر دیا گیا ہے۔

انہوں نے کہا کہ جمعہ کی رات پولیس انکاؤنٹر میں کل چار لٹیرے گرفتار ہوئے تھے جن میں سے دو پولیس کی گولی سے زخمی ہو گئے تھے۔ ان سے تفتیش کے بعد دوبارہ مسلسل ریڈ کی گئی۔ جس میں چار لوگ اور گرفتار ہوئے اور اس وقت آٹھ لٹیرے ہم نے گرفتار کر لیے ہیں۔ جن کے قبضے سے ہم نے 8.55 گرام سونا۔ چار کلو کے قریب چاندی برآمد کی ہے۔ اس کے علاوہ اس پورے معاملے میں ابھی پانچ شاطر لوٹیرے فرار ہیں۔ جن کو ہم جلد ہی گرفتار کر لیں گے۔ انہوں نے بتایا کہ اس گینگ کا یہ دوسرا اٹیمپ تھا پہلا اٹیمپ فیل ہو گیا تھا۔ سبھی نے ایک ٹیم بنائی اور لوٹ کی واردات کو انجام دیا۔ انہوں نے کہا کہ اس لوٹ کی واردات کا انکشاف کرنے والی پولیس ٹیم کو 25 ہزار کے انعام سے نوازا گیا ہے۔