بھاگلپور کے لوگوں کو ملے گی کچرے سے نجات - People of Bhagalpur

بھاگلپور بلدیہ نے رڈیوس، ری یوز، ریسائیکل سنٹر قائم کرنے کا فیصلہ کیا ہے اور اس کا پہلا سنٹر اسٹیشن کے نزدیک لوہیا پُل پر شروع ہوگیا، جس کا افتتاح بھاگلپور کی کمشنر ڈاکٹر پریتی، میئر ڈاکٹر وسندرا لال اور ڈپٹی میئر ڈاکٹر صلاح الدین احسن نے کیا۔

بھاگلپور : کچرا ہمارے شہر، قصبوں اور محلوں کے لیے ایک بڑا مسئلہ بنتا جا رہا ہے۔ جس موڑ پر چلے جائیے کچرا گندگی کی شکل میں شہر کی خوبصورتی پر گہن لگا رہے ہیں، لہذا اسی کچرے میں کمی لانے کے لیے بھاگلپور بلدیہ نے رڈیوس، ری یوز، ریسائیکل سنٹر قائم کرنے کا فیصلہ کیا ہے اور اس کا پہلا سنٹر اسٹیشن کے نزدیک لوہیا پُل پر شروع ہوگیا۔ جس کا افتتاح بھاگلپور کی کمشنر ڈاکٹر پریتی، میئر ڈاکٹر وسندرا لال اور ڈپٹی میئر ڈاکٹر صلاح الدین احسن نے کیا۔

اس لیے اب آپ شہر کے باشندوں کو مستعمل کپڑے، جوتے چپل، کاپی قلم یا گھر میں بیکار پڑی کوئی بھی چیز کچرے کے ڈھیر میں ڈالنے کے بجائے اس سنٹر پر پہنچا سکتے ہیں۔ جہاں جیویکا دیدی ان کچروں سے استعمال کی چیزیں بنا دیں گی۔ اس سے شہر میں کچرے کے انبار میں بھی کمی آئے گی اور ماحولیات پر اس کا اچھا اثر پڑے گا۔ بھاگلپور بلدیہ کی یہ پہل تو اچھی ہے لیکن جب ہم نے ہم کمشنر صاحبہ سے پابندی والے پلاسٹک کے سرعام استعمال پر سوال کیا تو اس کا ان کے پاس کوئی جواب نہیں تھا۔

کاربن ڈائی آکسائڈ اور دیگر نقصان دہ گیسوں کے اخراج کے ساتھ ساتھ پلاسٹک کا استعمال ہمارے ماحولیات کے لیے کتنا نقصان دہ ہے یہ کسی سے چھپا نہیں ہے، پھر بھی ہم اس کا استعمال خوب کرتے ہیں لہذا ضرورت اس بات کی ہے کہ اگر ہمیں ماحولیات دوست بننا ہے تو جیویکا دیدی کے ہاتھوں بنائے گئے کپڑے کے تھیلوں کا استعمال کریں۔ اس سے وہ معاشی طور پر مستحکم بھی ہوں گی اور کچرے سے بھی نجات ملے گی۔

بھاگلپور کو اسمارٹ سٹی کا درجہ حاصل ہے اور اسمارٹ سٹی کے نام پر سینکڑوں کروڑ روپئے خرچ بھی ہوئے یہ اور بات ہے کہ جدھر کا رخ کیجئے گندگی منہ بائے کھڑی نظر آئے گی ایسے ایسے میں بھاگلپور بلدیہ کی اس چھوٹی سی کوشش بھی قابل ستائش ہے۔