گیا: پرامن ماحول میں محرم کے اختتام کے لیے ضلع انتظامیہ متحرک - Gaya administration

محرم کو پرامن ماحول میں اختتام کرانے کے لیے ضلع سطح پر تیاریاں کی گئی ہیں۔ آج سے ضلع میں جلوس نکلنے کا سلسلہ شروع ہوگا۔ محرم کے پیش نظر پولیس کی تعیناتی شہرسے لیکر گاوں تک ہوگی۔ کلکٹریٹ میں امن وامان کے تعلق سے اہم میٹنگ ہوئی جس میں افسران سمیت امن کمیٹی کے اراکین اور شہر کے ہندو مسلم سبھی طبقے کے معززین کی شرکت ہوئی۔

گیا: ضلع گیا میں محرم کو پرامن ماحول میں اختتام کرانے کے لیے ضلع انتظامیہ اور پولیس انتظامیہ کی جانب سے تیاریاں کی جا رہی ہیں۔ سب ڈویژن سے لے کر تھانہ سطح اور ضلع سطح پر امن کمیٹی کی میٹنگ بھی ہوئی ہیں۔ ماضی میں جن مقامات پر تنازع ہوا تھا وہاں پر پولیس کی خصوصی نگاہ رکھنے کی بھی ہدایت دی گئی ہے۔ اس بار ڈرون کیمروں سے بھی جلوس پر نگاہ رکھی جائے گی۔ کلکٹریٹ میں ڈی ایم ڈاکٹر تیاگ راجن ایس ایم اور ایس ایس پی آشیش بھارتی کی مشترکہ صدارت میں محرم کو پرامن اور ہم آہنگی ماحول میں منانے اور قانون کی بالادستی کو یقینی بنانے کے لیے امن کمیٹی کی میٹنگ ہوئی۔ جس میں افسران سمیت امن کمیٹی کے ممبران سیاسی وسماجی رہنماؤں کی شرکت ہوئی اور سبھی نے اپنے علاقوں میں ہونے والی تیاریوں سے آگاہ کیا۔

میٹنگ میں ڈی ایم نے کہا کہ جس طرح رام نومی اور بقرعید تہواروں کے دوران امن و امان کو برقرار رکھا گیا تھا، اسی طرح محرم کے دوران بھی اسے برقرار رکھا جائے گا۔ میٹنگ میں ڈی ایم اور ایس ایس پی نے کہا کہ ڈی جے باجا کسی بھی حالت میں استعمال نہیں کیا جائے گا۔ ڈی جے پر مکمل پابندیاں عائد کر دی گئی ہیں۔ صوتی آلودگی سے متعلق سپریم کورٹ کے رہنما اصولوں پر مکمل عملدرآمد کیا جائے گا۔ محرم کے موقع پر نکالے جانے والے جلوس کو مدنظر رکھتے ہوئے تمام تھانوں کے راستوں کی جانچ پڑتال کر لی گئی ہے اور اسی راستے سے ہی جلوس نکالا جائے گا۔ نئے راستے کسی صورت اختیار نہیں کیے جائیں گے۔ انہوں نے کہا کہ سبھی ایس ڈی او، ڈی ایس پی ذاتی طور پر اپنے علاقے کے راستوں کا دورہ کریں تاکہ بعد میں اس مقام پر موجودہ صورتحال کا جائزہ فوری طور لیا جا سکے۔

انہوں نے تمام افسران سے کہا کہ وہ محرم کے موقع پر اپنے علاقوں میں پوری چوکسی اور تیاری کے ساتھ الرٹ رہیں۔امن کمیٹی کے ارکان سے کہا کہ وہ اپنے علاقے میں تازیہ کی اونچائی کا بھی جائزہ لیں تاکہ یہ راستے میں بجلی کی تاروں یا دیگر چیزوں کو نہ چھوئے۔ ماضی میں حادثے پیش آچکے ہیں اسلیے اسکا خیال رکھاجائے۔ ایس ایس پی آشیش بھارتی نے کہا کہ ہنگامہ کرنے والے سماج دشمن عناصر سے سختی سے نمٹا جائے گا۔ سماج دشمن عناصر پر کڑی نظر رکھی جارہی ہے۔ امن خراب کرنے والوں کی نشاندہی کرکے سخت کارروائی کی جائے گی۔ اس سال صرف پچھلے سالوں کے لائسنس ہولڈرز کو ہی لائسنس جاری کیے جا رہے ہیں۔ انہوں نے سختی سے ہدایت کی کہ تمام تھانہ انچارج اس بات کو یقینی بنائیں کہ ایک بھی جلوس لائسنس کے بغیر نہ نکلے۔

انہوں نے کہا کہ مختلف تھانوں اور سب ڈویژنل افسران کی تجویز پر موصول ہونے والی فہرست کی روشنی میں ویڈیو گرافر، ڈرون، واچ ٹاور وغیرہ لگائے جا رہے ہیں۔ سوشل میڈیا پر کڑی نظر رکھی جا رہی ہے، افواہ یا جذبات کو بھڑکانے والے پوسٹ یا شیئر کرنے والوں پر کڑی نظر رکھی جائے گی۔ وہیں جلوس کے راستے پر پانی جماو کے تعلق سے بھی باتیں ہوئیں جس پر ڈی ایم نے کہاکہ پانی کے نکاسی کے لیے میونسپل کارپوریشن کو ہدایت دی گئی ہے۔

واضح ضلع بھر میں 1167 چھوٹے وبڑے تازیہ جلوس نکالے جاتے ہیں۔ اس بار حتمی رپورٹ سبھی تھانوں سے ضلع ہیڈ کوارٹر کو موصول نہیں ہوئی ہے کہ اس بار تازیہ جلوس کی تعداد کتنی ہے۔