لکھنؤ:اتر پردیش کے حجاج کی پہلی پرواز آج لکھنو پہنچے گی۔حجاج کا استقبال کی پوری تیاری مکمل ہوگئی ہے۔اسی درمیان پسماندہ مسلم سماج کے قومی صدر و سابق وزیر انیس منصوری نےکہاکہ پچھلے دو سال سے ہم اترپردیش سمیت ملک بھر سے حج پر جانے والے عازمین کو درپیش مسائل کے بارے میں خبردار کرتے رہے ہیں لیکن ہماری باتوں پر غور نہیں کیا گیا جس کے نتیجے میں ہزاروں عازمین کے فوت ہونے کی ویڈیوز سوشل میڈیا پر وائرل ہورہی ہیں۔
انیس منصوری نے وزیر اعظم سے مطالبہ کیا کہ وہ اس معاملے میں براہ راست مداخلت کریں اور قونصلیٹ جنرل آف انڈیا جدہ اور حج کمیٹی آف انڈیا کے سی ای او لیاقت علی آفاقی کے ذمہ دار اہلکاروں کو فوری طور پر طلب کر کے ان سے تحقیقات کرائیں۔