یوپی بجٹ2024 میں بنکر اور اقلیتی طبقہ نظر انداز

BSP MLA on UP budget 2024 اتر پردیش حکومت نے اسمبلی کے بجٹ سیشن میں 2024/25 کا بجٹ پیش کیا ہے جس میں دعوی کیا گیا ہے کہ ریاست کی ترقی خوشحالی کے لیے بجٹ ہے جبکہ اس بجٹ کو اپوزیشن کی جانب سے بنکر اور اقلیت مخالف قرار دیا جارہا ہے۔

لکھنو: اتر پردیش حکومت کی جانب سے پیش کردہ بجٹ پر ای ٹی وی بھارت کے نمائندہ نے بہوجن سماج پارٹی کے میرٹھ سے رکن اسمبلی رفیق انصاری سے خصوصی کی ہے۔ انہوں نے کہا کہ اتر پردیش حکومت اگرچہ دعوی کر رہی ہے کہ یہ بھاری بھر کم بجٹ ہے تاہم غریب ،مزدور ،کسان اور بے روزگاروں کے لیے بجٹ میں کچھ بھی خاص نہیں ہے۔ انصاری نے کہا کہ بنکر طبقہ کو بجٹ سے کافی امیدیں وابستہ تھیں لیکن یو پی حکومت نے بنکروں کو نا امید کیا ہے۔

انہوں نے کہا کہ اتر پردیش میں کاشتکاری کے بعد بنکاری شعبہ کافی اہمیت کا حامل ہے اس کاروبار سے ریاست کے لاکھوں افراد روزگار سے وابستہ ہیں۔ بنکروں نے گزشتہ برس کئی جگہ احتجاجی مظاہرہ کیا تھا اور فلیٹ ریٹ پر بجلی کا مطالبہ کیا تھا اور انہیں امید تھی کہ 2024 کے بجٹ میں انہیں راحت ملے گی لیکن حکومت نے ایسا نہیں کیا۔ سنہ 2006 میں اس وقت کے وزیراعلی آنجہانی ملائم سنگھ یادو نے بنکروں کو فلیٹ ریٹ پر بجلی دینے کا فیصلہ کیا تھا لیکن بی جے پی کی حکومت آنے کے بعد اس نظام کو ختم کر دیا گیا اب دوبارہ فلیٹ ریٹ کا نظام نافذ کیا ہے تاہم بنکروں کو کافی مہنگا پڑ رہا ہے۔

انہوں نے کہا کہ جس مشین پر فلیٹ ریٹ کے اعتبار سے 65 روپے لگایا گیا تھا لیکن اب اسی مشین پر فلٹریٹ کا دعوی کر کے 400 روپے لیا جا رہا ہے جو بنکروں کے لیے کافی مہنگا ثابت ہو رہا ہے۔ انہوں نے کہا کہ وزیراعظم نریندر مودی بنارس سے رکن پارلیمان منتخب ہو کر ملک کے وزیراعظم بنتے ہیں لیکن بنارس میں لاکھوں کی تعداد میں بنکر موجود ہیں جو بنارسی ساڑھی بنتے ہیں ان کو کافی امیدیں تھیں لیکن ان کو نا امیدی ہاتھ آئی ہے۔

انہوں نے کہا کہ حکومت سے میرا مطالبہ ہے کہ بنکروں کے لیے خاص اعلانات کیے جائیں اور فلیٹ ریٹ پر انہیں بجلی فراہم کی جائے۔ انہوں نے مزید کہا کہ بجٹ میں ایک جانب جہاں مندروں تک جانے والی سڑکوں کی مرمت اور تعمیر کے لیے بجٹ میں اعلان کیا گیا ہے تو دوسری طرف اقلیتوں کی فلاح و بہبود کے لیے بجٹ میں اعلان نہیں کیا گیا ہے۔ 220 کروڑ روپے اقلیتی طلبہ کے اسکالرشپ کے لیے اعلان کیا گیا ہے لیکن اقلیتوں کے دیگر شعبے مدرسوں کے لیے کسی بھی قسم کے بجٹ کا اعلان نہیں ہوا ہے جو افسوسناک ہے۔