ضلع گیا میں ڈینگو کے ایک بھی مریض کی رپورٹ مثبت نہیں آئی - Dengue Cases in Gaya

ضلع گیا کے باشندوں کیلیے راحت بھری خبر ہے۔ محکمۂ صحت کے مطابق ڈینگو کیسز میں قابل ذکر کمی واقع ہوئی ہے۔

گیا:ضلع گیا میں مسلسل ڈینگو کے مریض پائے جانے سے کچھ راحت ملی ہے۔ کیونکہ جمعہ کے دن جتنے مریضوں کی رپورٹ آئی اس میں ایک کی بھی رپورٹ مثبت نہیں پائی گئی ہے۔ ضلع محکمۂ صحت کی جانب سے بتایا گیا کہ مگدھ میڈیکل کالج و اسپتال میں مشتبہ دو لوگوں کی جانچ رپورٹ آئی جس میں ایک بھی متاثر نہیں پایا گیا ہے۔ اس سے قبل 14 ستمبر کو ڈینگو کا ایک بھی مریض نہیں ملا تھا۔

اس کے پہلے ڈینگو کے مریض مسلسل پائے جا رہے تھے۔ حالانکہ ضلع میں اب تک ڈینگو کے 215 مریض پائے گئے ہیں۔ ان میں دیہی علاقوں کے مقابلے شہری علاقوں میں زیادہ مریض پائے گئے ہیں۔ اب تک دیہی علاقوں میں 72 اور شہری علاقوں میں 142 مریض پائے گئے ہیں۔

مگدھ میڈیکل میں اب تک 124 مریض داخل ہوچکے ہیں۔ مگدھ میڈیکل سپرنٹنڈنٹ ڈاکٹر کے کے سنہا نے بتایا کہ اب تک مگدھ میڈیکل کے ڈینگو وارڈ میں ڈینگو کے 124 مریض داخل کرائے گئے ہیں۔ ان میں سے 121 مریض صحت یاب ہو کر گھروں کو چلے گئے۔ اس وقت تین مریض زیر علاج ہیں۔ جمعہ کو ڈینگو کے دو مریض جو پہلے ہی داخل تھے، صحت یاب ہونے کے بعد اُنہیں چھٹی دے دی گئی ہے۔ ایک مشتبہ شخص کی رپورٹ منفی آنے پر اسے اسپتال سے ڈسچارج بھی کر دیا گیا ہے۔

ڈینگو کے سب سے کم مریض مارچ میں اور سب سے زیادہ ستمبر میں
ڈسٹرکٹ ویکٹر بورن ڈیزیز کنٹرول آفیسر ڈاکٹر ایم ای حق نے بتایا کہ جمعہ کو ڈینگی کا ایک بھی مریض نہیں آیا۔ انہوں نے کہا کہ ضلع میں اب تک ڈینگو کے 215 مریض پائے گئے ہیں۔ جس میں سب سے کم مارچ کے مہینے میں اور سب سے زیادہ ستمبر کے مہینے میں پائے گئے ہیں۔ جنوری اور فروری میں ڈینگو کا ایک بھی مریض نہیں ملا۔ ڈینگو کا پہلا مریض رواں سال مارچ میں ملا تھا۔ اس کے بعد اپریل میں آٹھ، مئی میں نو، جون میں تین، جولائی میں دس، اگست میں پندرہ اور ستمبر میں سب سے زیادہ 132 مریض پائے گئے۔

اس کے ساتھ ہی اکتوبر 2024 میں اب تک صرف چار مریض پائے گئے ہیں۔ یہ خوش آئند ہے کہ مریض کم ہورہے ہیں اور ڈینگو کے اثرات کم ہونے کی وجہ سے اہل گیا کے لیے بڑی راحت کی خبر ہے۔ واضح ہو کہ کل ہی ایل جے پی کے رہنما کملیش شرما کے جواں سال بیٹے کی ڈینگو کی وجہ سے موت ہوئی ہے۔