میرٹھ میں عام آدمی پارٹی کا احتجاج - Aam Aadmi Party Protest

میرٹھ میں آج عام آدمی پارٹی کے کارکنان نے مختلف قسم کی سبزیاں لیکریوگی حکومت کے خلاف ضلع کلکٹریٹ آفس پر زبردست مظاہرہ کیا۔ مظاہرین کا کہنا تھا کہ یوگی حکومت کو اپنا فیصلہ واپس لینا ہوگا ورنہ تحریک چلائیں گے۔

میرٹھ: 22 جولائی سے مغربی اتر پردیش اور اترا کھنڈ میں شروع ہو رہی کانوڑ یاترا کے پیش نظر یوگی حکومت نے ایک فرمان جاری کیا جس میں سڑکوں کے کنارے ہوٹل ،ریستوران کے مالکان اور دکانداروں کو اپنی اپنی دکانوں کے سامنے اپنا نام لکھنا ہے۔ کانوڑ یاترا کے راستوں پر پڑنے والی دکانوں اور وہاں کام کرنے والے تمام ملازمین کی پہچان بتانے کی ہدایت دی گئی ہے۔

اس کے ساتھ ٹھیلوں پر پھل اور سبزیاں فروخت کرنے والے دکانداروں کو اپنا نام پہچان لکھنی ہوگی تاکہ شیو بھگتو کو راستے کے دوران کسی قسم کی پریشانی نہ ہو۔ وہیں یوگی حکومت کی اس ہدایت پر اب سیاسی پارٹیوں کے رہنماؤں نے اپنا ردعمل کا اظہار کیا ہے۔ انہوں نے اس طرح کی ہدایت کو ملک میں منافرت پیدا کرنے والا بتایا۔

آج میرٹھ میں ضلع کلکٹریٹ آفس پر عام آدمی پارٹی کے کارکنان نے انوکھے انداز میں احتجاجی مظاہرہ کیا۔ان کا کہنا تھا کہ کانوڑ یاترا میں شیو بھگتو کے نام پر ہوگی سرکار پارلیمانی انتخابات میں اپنی ہار کو بھلانا چاہتی ہے۔یہی وجہ ہے کہ وہ اب پوری طرح سے ہندو اور مسلمان کے درمیان خلا بنانا چاہتی ہے۔

عام آدمی پارٹی کے رہنماوں کامزید کہنا تھا کہ اسی کے بہانے بی جے پی گزشتہ دنوں ہوئے پارلیمانی انتخابات میںملی شکست کو بھلانے کی کوشش کر رہی ہے،اسے یہ بھی سمجھ میں آچکا ہے کہ اگلے انتخابات میں بھی اس کی شکست یقینی ہے۔