کیا فل سالٹ کی کمی پوری کر پائیں گے رحمان اللہ گرباز؟ - KKR vs SRH Qualifier 1

فل سالٹ کی غیر موجودگی میں رحمان اللہ گرباز آج سن رائزرز حیدرآباد کے خلاف آئی پی ایل 2024 کے پہلے کوالیفائر میں سنیل نارائن کے ساتھ کولکاتا نائٹ رائڈرز کے لیے اوپننگ کے لیے میدان میں اتریں گے جنہوں نے اس سیزن میں کوئی میچ نہیں کھیلا ہے۔

احمد آباد: آئی پی ایل 2024 کا کوالیفائر-1 آج کولکاتا نائٹ رائڈرز اور سن رائزرز حیدرآباد کے درمیان نریندر مودی اسٹیڈیم، احمد آباد میں کھیلا جائے گا۔ دونوں ٹیمیں لیگ کی طاقتور ٹیموں میں شامل ہیں۔ دونوں ٹیموں کے درمیان دلچسپ اور سنسنی خیز مقابلہ متوقع ہے۔

لیکن آئی پی ایل پلے آف کے کوالیفائر ون جیسے بڑے میچ میں کولکاتا نائٹ رائڈرز کو اپنے اوپننگ بلے باز فل سالٹ کی کمی محسوس ہوگی۔ جو ٹی ٹوئنٹی ورلڈ کپ سے قبل اپنی ٹیم کو جوائن کرنے کے لیے اپنے ملک واپس آچکے ہیں۔

کولکاتا نائٹ رائڈرز کو آج کے میچ میں دائیں ہاتھ کے جارح مزاج بلے باز فل سالٹ کی کمی یقینی طور پر محسوس ہوگی۔ کے کے آر کی اوپننگ جوڑی فل سالٹ (435 رن) اور سنیل نارائن (461 رن) نے اس ٹورنامنٹ میں کے کے آر کو دھماکہ خیز آغاز دلانے میں بہت اہم رول ادا کیا۔ سالٹ نے آئی پی ایل کے رواں سیزن میں شاندار کارکردگی کا مظاہرہ کیا اور 12 میچوں میں 39.55 کی اوسط اور 182 کے اسٹرائیک ریٹ سے مجموعی طور پر 435 رنز بنائے۔

اب سب سے بڑا سوال یہ ہے کہ کیا افغانستان کے نوجوان وکٹ کیپر بلے باز رحمان اللہ گرباز فل سالٹ کی کمی پوری کر پائیں گے یا نہیں۔ اس میں کوئی شک نہیں گرباز باصلاحیت کرکٹر ہیں لیکن رواں آئی پی ایل میں کے کے آر کی جانب سے انہیں کھیلنے کا موقع نہیں ملا ہے۔ حیدرآباد کے خلاف دائیں ہاتھ کے بلے باز رحمان اللہ گرباز کے کے آر کی جرسی پہن کر رواں آئی پی ایل سیزن کا پہلا میچ کھیلنے کے لئے میدان میں اتریں گے۔

رحمان اللہ گرباز نے اپنا آئی پی ایل ڈیبیو 2023 میں کیا۔ اس دوران انہوں نے 11 میچوں میں 20.64 کی اوسط اور 133.53 کے اسٹرائیک ریٹ سے کل 227 رنز بنائے۔ اس کے ساتھ ہی وہ 165 ٹی20 میچوں میں افغانستان کی نمائندگی کر چکے ہیں۔ اس عرصے کے دوران انہوں نے 24.59 کی اوسط اور 148.68 کے اسٹرائیک ریٹ سے کل 3985 رنز بنائے ہیں۔