ہندؤوں پر ظلم اور کرکٹ ایک ساتھ کیسے ممکن؟ آدتیہ ٹھاکرے کا بی سی سی آئی اور حکومت سے سوال - IND vs BAN

بھارت اور بنگلہ دیش کے درمیان دو ٹیسٹ میچوں کی سیریز کا پہلا ٹیسٹ میچ 19 اگست سے چنئی میں شروع ہو رہا ہے۔ لیکن اس سے قبل ہی اس سیریز کے خلاف احتجاج شروع ہو گیا ہے۔ احتجاج کرنے والے کا کہنا ہے کہ بنگلہ دیش میں ہندووں پر ظلم ہو رہا ہے اور ہم ان کے ساتھ کرکٹ کیسے کھیل سکتے ہیں۔

نئی دہلی: بھارتی کرکٹ ٹیم 19 ستمبر سے بنگلہ دیش کے خلاف دو ٹیسٹ میچوں کی سیریز کھیلنے جا رہی ہے۔ اس سے پہلے شیو سینا (ادھو گروپ) کے لیڈر آدتیہ ٹھاکرے بھارت-بنگلہ دیش سیریز کی مخالفت کر چکے ہیں۔

اپنے سوشل میڈیا اکاؤنٹ ایکس پر پوسٹ کرتے ہوئے انہوں نے کہا ہے کہ بنگلہ دیش میں ہندوؤں پر مظالم کے درمیان کوئی کھیل نہیں ہوگا۔ انہوں نے بی سی سی آئی اور حکومت دونوں کو تنقید کا نشانہ بنایا۔

آدتیہ ٹھاکرے نے ایکس پر پوسٹ کیا اور لکھا، ' بنگلہ دیش کرکٹ ٹیم ہندوستان کے دورے پر ہے۔ صرف وزارت خارجہ سے یہ جاننا چاہتے ہیں کہ کیا بنگلہ دیش میں ہندوؤں کو پچھلے 2 ماہ میں تشدد کا سامنا کرنا پڑا جیسا کہ کچھ میڈیا اور سوشل میڈیا نے ہمیں بتایا ہے؟ اگر ہاں، اور ہندوؤں اور دیگر اقلیتوں کو تشدد کا سامنا کرنا پڑا، تو پھر بی جے پی کے زیر انتظام بھارتی حکومت بی سی سی آئی کے بارے میں اتنا نرم رویہ کیوں اختیار کر رہی ہے اور دورے کی اجازت کیوں دے رہی ہے؟'

آدتیہ ٹھاکرے نے مزید کہا، 'اگر نہیں، تو کیا وزارت خارجہ بنگلہ دیش میں تشدد کے بارے میں مسلسل سوشل میڈیا اور میڈیا رپورٹس سے متفق ہے؟ یہاں ان کے ٹرول دوسرے ملک بنگلہ دیش میں تشدد کا بہانہ بنا کر ہندوستانیوں میں نفرت پیدا کر رہے ہیں، جب کہ بی سی سی آئی اسی بنگلہ دیشی ٹیم کی کرکٹ کے لیے میزبانی کر رہا ہے۔ میں حیران ہوں کہ جو لوگ اس تشدد کے خلاف مہم چلا رہے ہیں وہ بی سی سی آئی سے بات کیوں نہیں کرتے اور سوال کیوں نہیں کرتے؟ یا یہ صرف بھارت میں نفرت پیدا کرنے اور انتخابی مہم چلانے کے بارے میں ہے؟'

اس سے قبل گووا سے تعلق رکھنے والے ہندو جانا جگروتی سمیتی نامی گروپ نے میچز کی منسوخی کا مطالبہ کیا ہے۔ گروپ کا کہنا ہے کہ بنگلا دیش میں ہندوؤں پر جاری مظالم کی وجہ سے بھارت اور بنگلا دیش کے میچز نہیں ہونے چاہئیں۔گروپ نے مطالبہ کرتے ہوئے کہا ہے کہ اس وقت تک میچز نہیں ہونے چاہئیں جب تک مظالم بند نہ ہوں، میچز کی جلد از جلد منسوخی کے لیے بھارتی بورڈ کو خط لکھ دیا ہے۔

واضح رہے کہ بھارت اور بنگلہ دیش کے درمیان پہلا ٹیسٹ میچ 19 سے 23 ستمبر تک کھیلا جائے گا۔ اس سیریز کا دوسرا میچ کانپور کے گرین پارک اسٹیڈیم میں کھیلا جا رہا ہے۔ دوسرا میچ 27 ستمبر سے یکم اکتوبر تک کھیلا جائے گا۔