شعیب خان کا کمال، ایک ہی اننگ میں 10 وکٹیں لے کر سب کو کیا حیران - Ten Wickets in An Innings

کرکٹ کی تاریخ میں ایسی بہت کم ہی مثالیں ملتی ہیں جب کسی گیندباز نے ایک ہی اننگ میں تمام 10 وکٹیں حاصل کی ہوں، لیکن ممبئی کے ایک بولر نے ایک اننگ میں 10 وکٹیں لے کر اپنا نام روشن کیا ہے۔

ممبئی: کرکٹ کی تاریخ میں شاذ و نادر ہی کسی گیند باز نے ایک اننگ میں تمام 10 وکٹیں حاصل کی ہوں گی۔ ایسا کارنامہ بین الاقوامی کرکٹ میں صرف تین بار ہی ہوا ہے۔ انگلینڈ کے عظیم باؤلر جم لیکر، سابق ہندوستانی کپتان انیل کمبلے اور نیوزی لینڈ کے اعجاز پٹیل نے یہ کارنامہ انجام دیا ہے۔ تینوں کھلاڑیوں نے ٹیسٹ کرکٹ میں یہ کارنامہ انجام دیا ہے۔

اب ممبئی کی کانگا نامی لیگ میں ایک گیندباز نے ایک اننگ میں 10 وکٹیں حاصل کرکے سب کو حیران کردیا ہے۔ اس گیندباز کا نام شعیب خان ہے۔ بائیں ہاتھ کے اسپنر شعیب کانگا لیگ ای ڈویژن میں گوڑ سرسوات کرکٹ کلب (گاڈ سرسوات سی سی) کے لیے کھیل رہے تھے۔ گورنمنٹ لاء کالج کی پچ پر شعیب نے بغیر کسی وقفے کے مسلسل 17.4 اوورز کرائے اور جولی کرکٹرز کے تمام 10 بلے بازوں کو آؤٹ کرنے میں کامیاب رہے۔

شعیب خان کی خطرناک گیندبازی کی وجہ سے جولی کرکٹرز کی پوری ٹیم صرف 67 رنز پر آؤٹ ہوگئی۔ جواب میں گور سرسوات نے انکور دلیپ کمار سنگھ کے ناٹ آوٹ 27 رنز کی بدولت چھ وکٹوں پر 69 رنز پر اننگز ڈکلیئر کر دی۔ اس کے بعد جولی کرکٹرز نے دوسری اننگز میں 3 وکٹوں پر 36 رنز بنائے۔ گوڑ سرسوات نے پہلی اننگز میں برتری کی بنیاد پر میچ میں کامیابی حاصل کر لی۔

ایک اننگ میں دس وکٹ لینے والے کھلاڑی

واضح رہے کہ انگلینڈ کے لیجنڈری گیندباز جم لیکر نے 1956 میں مانچسٹر کے اولڈ ٹریفورڈ میں آسٹریلیا کے خلاف 53 رنز دے کر ایک اننگز میں 10 وکٹیں لینے کا شاندار ریکارڈ بنایا تھا۔ اس کے بعد انیل کمبلے نے 1999 میں نئی ​​دہلی میں پاکستان کے خلاف 26.3 اوورز میں 74 رنز دے کر 10 وکٹیں حاصل کیے تھے۔ پھر دسمبر 2021 میں بھارت کے خلاف وانکھیڑے ٹیسٹ میچ میں اعزاز پٹیل نے 119 رنز کے عوض 10 وکٹیں حاصل کرکے یہ کارنامہ انجام دیا تھا۔

کانگا لیگ کی تاریخ کیا ہے؟

سابق کرکٹر ڈاکٹر ہرموس جی کانگا کی یاد میں کانگا لیگ ٹورنامنٹ کا آغاز ہوا۔ ہرموس جی کانگا نے 43 فرسٹ کلاس میچوں میں 1905 رنز بنائے اور 33 وکٹیں حاصل کیے تھے۔ کانگا لیگ ممبئی کے مختلف میدانوں جیسے آزاد میدان، شیواجی پارک، کراس میدان وغیرہ میں کھیلی جاتی ہے۔ عظیم بلے باز سچن تنڈولکر بھی اس لیگ میں کھیل چکے ہیں۔ سچن نے اس لیگ میں اپنا ڈیبیو 1984 میں 11 سال کی عمر میں جان برائٹ کرکٹ کلب سے کیا تھا۔ ان کے بیٹے ارجن تنڈولکر نے بھی 2013 میں کانگا لیگ میں ڈیبیو کیا تھا۔