'ہم پھر یہاں کبھی نہیں آئیں گے'، گریٹر نوئیڈا اسٹیڈیم میں سہولیات کے فقدان پر افغانستان ناراض - AFG vs NZ Test

افغانستان اور نیوزی لینڈ کے درمیان واحد ٹیسٹ میچ 9 ستمبر سے گریٹر نوئیڈا میں شروع ہونا تھا لیکن اسٹیڈیم میں نمی کی وجہ سے پہلے دن ایک بھی گیند نہیں ڈالی جا سکی اور دوسرے دن بھی میدان کو کھیلنے کے لیے تیار نہیں کیا جاسکا ہے، جس پر افغانستان کرکٹ سخت ناراض ہے۔ گریٹر نوئیڈا اسٹیڈیم کی انتظامیہ سے ناراض افغان بورڈ کے ایک اہلکار نے کہا کہ اب ہم یہاں کبھی کھیلنے نہیں آئیں گے۔

نوئیڈا: افغانستان کرکٹ ٹیم نیوزی لینڈ کے خلاف واحد ٹیسٹ کا پہلا دن منسوخ ہونے کی وجہ سے کافی مایوس ہے۔ تاہم افغانستان کی کرکٹ ٹیم گریٹر نوئیڈا اسٹیڈیم میں ناکافی انفراسٹرکچر اور سہولیات کے فقدان پر اپنے غصہ برداشت نہیں کر سکی۔

ٹیسٹ میچ کے پہلے دن بارش نہ ہونے کے باوجود سہولیات کے فقدان اور پانی کے ناقص نکاسی کی وجہ سے ایک گیند بھی نہیں پھینکی گئی۔ جس کے نتیجے میں افغانستان کی کرکٹ ٹیم نے غصے میں کہا کہ وہ دوبارہ یہاں کبھی نہیں آئیں گے۔

واضح رہے کہ گریٹر نوئیڈا کے شہید وجے سنگھ اسپورٹس کمپلیکس اسٹیڈیم میں بی سی سی آئی کی اجازت کے بغیر پرائیوٹ لیگ کرانے اور پھر ان میچز میں فکسنگ کرانے کے الزام میں بی سی سی آئی نے 2017 میں یہاں میچ کرانے پر پابندی عائد کر دی تھی۔

اس کے بعد سے وہاں بی سی سی آئی سے متعلق کوئی میچ منعقد نہیں کیا گیا لیکن وہ اسٹیڈیم افغانستان کو نیوزی لینڈ کے خلاف واحد ٹیسٹ کی میزبانی کے لیے دے دیا گیا۔

اسٹیڈیم میں سہولیات کے فقدان پر ناراض افغانستان کرکٹ بورڈ کے ایک عہدیدار نے ٹائمز آف انڈیا کو بتایا کہ ان کی پہلی پسند لکھنؤ اسٹیڈیم تھی، لیکن انہیں نوئیڈا کے اس اسٹیڈیم میں کھیلنے کی اجازت دی گئی۔

افغانستان کرکٹ بورڈ کے عہدیدار نے مزید کہا کہ اس اسٹیڈیم پر کافی زیادہ بد نظمی ہے۔ پریکٹس کی مناسب سہولیات کی کمی نے افغانستان کرکٹ ٹیم کو پریشان کر دیا ہے۔ ہم یہاں دوبارہ کبھی نہیں کھیلیں گے۔

قابل ذکر ہے کہ یہ ٹیسٹ میچ ورلڈ ٹیسٹ چیمپئن شپ کا حصہ نہیں ہے بلکہ آئی سی سی سے منسلک سیریز ضرور ہے۔