عبدالصمد کا تاریخی کارنامہ، رنجی ٹرافی میں میچ کی دونوں اننگ میں سنچری لگا دی

عبدالصمد رنجی ٹرافی کی تاریخ میں دونوں اننگز میں سنچریاں بنانے والے جموں و کشمیر کے پہلے کھلاڑی بن گئے ہیں۔

سرینگر: جموں و کشمیر کے عبدالصمد نے رنجی ٹرافی میں تاریخ رقم کی ہے۔ صمد رنجی ٹرافی میں شاندار بلے بازی کر رہے ہیں۔ صمد نے اوڈیشہ کے خلاف دونوں اننگز میں سنچریاں بنائیں۔ یہ کر کے صمد نے ایک خاص ریکارڈ اپنے نام کر لیا۔ عبدالصمد رنجی ٹرافی کی تاریخ میں دونوں اننگز میں سنچریاں بنانے والے جموں و کشمیر کے پہلے کھلاڑی بن گئے ہیں۔ ان سے پہلے جموں و کشمیر کے کسی کھلاڑی نے ایسا کارنامہ انجام نہیں دیا تھا۔

جموں و کشمیر کے عبدالصمد نے اوڈیشہ کے خلاف میچ میں پہلی اننگز میں 117 گیندوں پر 127 رنز کی اننگز کھیلی جس میں انہوں نے 6 چوکے اور 9 چھکے لگائے۔ اسی دوران دوسری اننگز میں صمد نے ایک بار پھر کمال کیا اور 108 گیندوں پر 108 رنز بنانے میں کامیاب رہے۔ اس طرح صمد نے رنجی ٹرافی میچ کی دونوں اننگز میں سنچری بنانے والے جموں و کشمیر کے پہلے بلے باز بننے کا اعزاز حاصل کیا۔

عبدالصمد نے یہ کارنامہ اوڈیشہ اور جموں و کشمیر کے درمیان کٹک کے بارابتی اسٹیڈیم میں رنجی میچ کے دوران انجام دیا۔

"میں ساتویں آسمان پر ہوں،" صمد کے والد محمد فاروق نے ای ٹی وی بھارت کے ساتھ ٹیلی فونک گفتگو میں کہا۔ "وہ ایک محنتی کھلاڑی ہے، اور اگر وہ اسی طرح پرفارم کرہا تو میں اسے جلد ہی ہندوستان کے لیے کھیلتے ہوئے دیکھوں گا۔"

اپنے بیٹے کے شاندار کارنامے پر روشنی ڈالتے ہوئے، فاروق نے بارابتی اسٹیڈیم کے مشکل حالات پر روشنی ڈالی، اور کہا کہ پچ بیٹنگ کے لیے سازگار نہیں تھی۔ "اس کے باوجود، وہ دونوں اننگز میں 100 سے زیادہ کے اسٹرائیک ریٹ کے ساتھ شاندار کھیلے،"

بتا دیں کہ صمد دائیں ہاتھ کے بلے باز اور دائیں ہاتھ سے لیگ بریک کرنے والے گیند باز ہیں۔ وہ جموں و کشمیر سے آئی پی ایل میں کھیلنے والے صرف تیسرے کرکٹر ہیں۔