نیشنل کانفرنس کے سید آغا روح اللہ نے سرینگر پارلیمانی نشست کے لیے پرچۂ نامزدگی داخل کیا سرینگر:سرینگر پارلیمانی حلقہ کے لیے نیشنل کانفرنس کے امیدوار سید آغا روح اللہ مہدی نے جمعرات کو ریٹرننگ افسر سرینگر کے دفتر میں اپنے نامزدگی کے کاغذات داخل کیے۔ آغا روح اللہ پارٹی کے مرکزی دفتر نوائے صبح سے اپنے حامیوں کے ہمراہ روڈ شو کی شکل میں دوپہر ڈی سی آفس پہنچے۔ ان کے ساتھ پارٹی کارکنان کی ایک بڑی تعداد کے علاوہ نیشنل کانفرنس کے سینئر رہنما بھی موجود تھے۔ اس دوران ڈھول نگاڑوں کے بیچ روایتی کشمیری نغمے گاتے ہوئے خواتین کو بھی دیکھا گیا۔
یہ بھی پڑھیں:
سرینگر پارلیمانی حلقہ سے آغا روح اللہ اور وحید پرہ کے درمیان دلچسپ مقابلہ - Srinagar Lok Sabha Constituency
اس دوران این سی کے امیدوار کے ساتھ گاڑیوں کا ایک بڑا قافلہ بھی موجود تھا جس میں پارٹی کی اعلیٰ قیادت کے علاوہ دیگر علاقوں خاص طور پر آغا روح اللہ کے آبائی علاقے بڈگام سے آئے ہوئے ان کے حامیوں کی ایک خاصی تعداد بھی موجود تھی۔ واضح رہے کہ سرینگر پارلیمانی نشست میں مقابلہ بڑا دلچسپ ہونے والا ہے۔ کیونکہ سہ رخی مقابلے میں پی ڈی پی کے وحید الرحمان پرہ، اپنی پارٹی کے محمد اشرف میر اور نیشنل کانفرنس کے آغا سید روح اللہ مہدی آمنے سامنے ہیں اور یہ تینوں امیدوار ایسے ہیں جو کہ پہلی مرتبہ پارلیمانی انتخابات لڑ رہے ہیں۔
واضح رہے کہ سرینگر پارلیمانی حلقے کے لیے بدھ کو اپنی پارٹی کے امیدوار محمد اشرف میر اور پی ڈی پی کے وحید الرحمان پرہ نے اپنے پرچۂ نامزدگی داخل کیے۔ اس قبل سات آزاد امیدوار نے بھی کاغذات جمع کر چکے ہیں۔ سرینگر پارلیمانی نشست کے لیے کاغذات نامزدگی داخل کرنے کی آخری تاریج آج یعنی 25 اپریل ہے۔ کاغذات کی جانچ پڑتال 26 اپریل کو ہوگی اور امیدوار اپنے کاغذات 29 اپریل تک واپس لے سکتے ہیں۔ اس نشست میں چوتھے مرحلے کے تحت 13 مئی کو ووٹ ڈالیں جائیں گے۔ اور 4 جون کو نتائج سامنے آئیں گے۔ ایسے میں یہ دیکھنا بڑا دلچسپ ہوگا کہ کیا سرینگر پارلیمانی سیٹ کے لیے کیا اپنی پارٹی کا بلا، پی ڈی پی کی قلم دوات یا نیشنل کا ہل، ان میں سے کون جیت درج کرنے میں کامیاب ہوگا۔
