سی پی آئی ایم لیڈر محمد یوسف تاریگامی کے ساتھ خصوصی بات چیت - Muhammad Yousuf Tarigami Interview

'نروس' تاریگامی کا کہنا ہے کہ انہیں کالعدم جماعت اسلامی کے حمایت یافتہ امیدوار کے خلاف کولگام جیتنے کا ایک اور موقع مل سکتا ہے۔

کولگام: جموں و کشمیر میں اسمبلی انتخابات کے پہلے مرحلے کا آج اختتام ہوا۔ جس میں 23 لاکھ رجسٹرڈ ووٹرز میں سے تقریباً 60 فیصد ووٹرز نے اپنے حق رائے دہی کا استعمال کیا۔ کولگام میں کمیونسٹ لیڈر محمد یوسف راتھر عرف تاریگامی اور کالعدم مذہبی سیاسی تنظیم جماعت اسلامی کے حمایت یافتہ آزاد امیدوار سیار ریشی کے درمیان سخت مقابلہ دیکھنے کو ملا۔

کولگام میں اپنے گھر پر، تاریگامی نے ووٹنگ کے اختتام کے بعد نروس محسوس کرتے ہوئے اعتراف کیا کہ جماعت اسلامی کے حمایت یافتہ امیدوار نے انہیں پہلی بار اسمبلی انتخابات میں ایک "مضبوط مقابلہ" دیا جو وہ 1996 کے بعد سے لڑ رہے ہیں۔ تاریگامی نے نیشنل کانفرنس اور پیپلز ڈیموکریٹک پارٹی کے امیدواروں کے خلاف 1996 سے مسلسل چار انتخابات جیتے ہیں۔ جاری اسمبلی انتخابات میں، جے آئی کیڈر نے ریشی کی مکمل حمایت کی اور انتخابی مہم میں مذہبی نعروں کا گرما گرم تبادلہ دیکھا گیا۔

تاریگامی نے کہا کہ اگرچہ میں اپنی جیت کا اعلان کرنے کے لیے نجومی نہیں ہوں لیکن مجھے امید ہے کہ کولگام کی عوام اپنی نمائندگی کے لئے ہمیں ایک موقع اور دے گی۔ انہوں نے کہا کہ آج مجھے انتخابی مہم اور پولنگ کے دوران جس طرح کا ردعمل ملا، مجھے یقین ہے کہ مجھے پانچویں مرتبہ جیت حاصل ہوگی۔

تاریگامی نے اسمبلی انتخابات میں جماعت کے حصہ لینے پر شبہ ظاہر کرتے ہوئے کہا کہ "جماعت آزاد نہیں ہے اور ان کی لگام کہیں اور ہے"۔ انہوں نے کہا کہ جماعت کو انتخابات میں اس کے بعد ہی حصہ لینا چاہئے تھا جب حکومت ہند ان پر سے پابندی ہٹا دیتی۔ کمیونسٹ رہنما نے واضح طور پر کوئی تبصرہ نہیں کیا کہ آیا وہ اس بات کی حمایت کرتے ہیں کہ جماعت پر عائد پابندی ہٹا دی جانی چاہیے۔