جموں سے امرناتھ یاتریوں کا پہلا جتھہ روانہ، لیفٹنٹ گورنر منوج سنہا نے جھنڈی دکھا کر کیا روانہ - First batch of amarnath yatra

امرناتھ یاترا کے لیے جموں سے پہلے جتھے کو ایل جی منوج سنہا نے جھنڈی دکھا کر روانہ کیا۔ لیفٹیننٹ گورنر امرناتھ شرائن بورڈ کے چیئرمین بھی ہیں۔

جموں:ملک بھر سے بابا برفانی کے درشن کرنے والے عقیدت مندوں کا انتظار ختم ہو گیا۔ آج صبح تقریباً 5 بجے امرناتھ یاتریوں کا پہلا جتھہ جموں سے بابا برفانی کے مقدس غار کی طرف روانہ ہوا۔ پوجا کے بعد جموں و کشمیر کے لیفٹیننٹ گورنر اور امرناتھ شرائن بورڈ کے چیئرمین منوج سنہا نے برف کی شکل میں بنے ہمانی شیولنگ یعنی بابا امرناتھ (شری امرناتھ یاترا) کی یاترا کرنے والے پہلے جتھے کو جھنڈی دکھا کر روانہ کیا۔ اس دوران جموں کا یاتری نواس بم بم بھولے کے نعروں سے گونج اٹھا۔ بھکتوں نے بم بم بھولے کا نعرہ لگا کر اپنے مقدس سفر کا آغاز کیا۔

بابا برفانی کے درشن پر جانے والے عقیدت مندوں میں مردوں کے مقابلے خواتین کی زیادہ تعداد دیکھی گئی۔ عقیدت مند ڈھول کی تھاپ پر رقص کرتے نظر آئے۔ سخت حفاظتی انتظامات کے درمیان آج جموں سے بالتال اور پہلگام کے لیے روانہ ہونے والے عقیدت مندوں کو 29 جون کو مقدس غار میں بابا برفانی کے درشن کرنے کا موقع ملے گا۔

مزید پڑھیں:امرناتھ یاترا، ایل جی منوج سنہا نے لیا انتظامات کا جائزہ - Amarnath Yatra

ملک بھر سے آنے والے مسافر بالتال تک 14.5 کلومیٹر طویل اور چندن واڑی تک 32 کلومیٹر طویل ٹریک طے کرنے کے بعد13,000 فٹ کی بلندی پر واقع مقدس شری امرناتھ غار تک پہنچ سکیں گے اور بابا برفانی کے درشن کریں گے۔