کولگام میں چھ عسکریت پسندوں کی ہلاکت فورسز کے لئے بڑی کامیابی: سیکٹر کمانڈر - Kulgam Encounter

کولگام ضلع کے موڈرگام اور چنگام علاقوں میں ہفتہ کو تصادم آرائیوں کے دوران چھ عسکریت پسند اور دو فوجی اہلکار ہلاک ہوئے تھے۔

اننت ناگ (جموں کشمیر) :جنوبی کشمیر کے ضلع کولگام کے دو الگ الگ مقامات پر سیکورٹی فورسز اور عسکریت پسندوں کے درمیان تصادم میں 6 مقامی عسکریت پسندوں سمیت 2 فوجی اہلکار ہلاک ہو گئے۔ اس آپریشن میں سکیورٹی فورسز نے بھاری مقدار میں اسلحہ اور گولہ بارود بھی ضبط کیا۔ تصادم آرائیوں کے دوران چھ عسکریت پسندوں کی ہلاکت کو سیکورٹی ایجنسیز نے ’’سیکورٹی فورسز کے لیے بڑی کامیابی‘‘ قرار دیا ہے۔

تصادم کے اختتام کے بعد اننت ناگ میں ایک پریس کانفرنس کے دوران فوج کے سیکٹر کماندر (فرسٹ) پرتھوی راج چوہان اور سیکٹر کمانڈر (سیکنڈ) انیرودھ چوہان نے کہا کہ ’’یہ کامیاب آپریشن فوج اور سکیورٹی فورسز کے لئے بہت بڑی کامیابی ہے۔‘‘ انہوں نے کہا کہ ’’اس کارروائی سے جنوبی کشمیر کو ایک بہت بڑی تباہی سے بچایا گیا اور جاری امرناتھ یاترا میں خلل ڈالنے کے عسکریت پسندوں کے ارادوں پر پانی پھیر دیا گیا۔ انہوں نے کولگام کے لوگوں کا شکریہ ادا کرتے ہوئے کہا کہ ’’لوگوں کے تعاون کی بدولت ہی یہ دونوں آپریشن کامیاب ہویئے۔‘‘ سیکٹر کمانڈرز نے تصادم کے دوران ہلاک ہونے والے دو فوجی جوانوں کو زبردست خراج عقیدت پیش کیا اور کہا کہ ’’فوج، پولیس اور نیم فوجی دستوں نے مشترکہ طور پر ان آپریشنز میں بہادری کا مظاہرہ کرتے ہوئے کامیابی حاصل کی جو قابل ستائش ہے۔‘‘

آرمی افسران نے مزید کہا کہ ’’مارے گئے عسکریت پسندوں میں سے بعض کے بارے میں شبہ ہے کہ وہ پہلے کولگام اور ملحقہ اضلاع میں مختلف دہشت گردانہ سرگرمیوں میں ملوث تھے۔ آپریشن کو انجام دیتے ہوئے سیکورٹی فورسز نے انتہائی تحمل کا مظاہرہ کیا تاکہ کم سے کم نقصان کو یقینی بنایا جا سکے۔‘‘ ادھر، اس سلسلے میں پولیس نے قانون کی متعلقہ دفعہ کے تحت مقدمہ درج کر کے تفتیش شروع کر دی ہے۔

پریس کانفرنس کے دوران تصادم کے مقامات سے برآمد شدہ اسلحہ اور گولہ بارود کی بھی نشاندہی کی گئی۔ پریس کانفرنس میں ڈی آئی جی، جنوبی کشمیر رینج، جاوید اقبال، ایس ایس پی کولگام سمیت فوج اور پولیس کے کئی افسران بھی موجود تھے۔ واضح رہے کہ 6 جون کو ضلع کولگام کے موڈرگام اور چنگام علاقوں میں سکیورٹی فورسز اور عسکریت پسندوں کے مابین تصادم شروع ہوا تھا جو دو روز تک جاری رہا۔ ان تصادم آرائیوں میں چھ عسکریت پسندوں سمیت دو فوجی اہلکار ہلاک ہو گئے تھے۔