گلمرگ حملہ: گونڈولا کیبل کار احتیاطی طور پر معطل

بارہمولہ میں ہوئے عسکری حملے کے بعد اسکی ریزارٹ گلمرگ کے گنڈولہ کیبل کار کو عارضی طور پر بند کر دیا گیا ہے۔

بارہمولہ:شمالی کشمیر کے ضلع بارہمولہ میں حکام نے معروف سیاحتی مقام گلمرگ کے نزدیک ہوئے عسکری حملے کے بعد گنڈولہ کیبل کار (Gondola Rope Way) کو جمعہ کے روز احتیاطی طور معطل کر دیا ہے۔ گزشتہ شام ہوئے عسکری حملہ میں دو فوجیوں سمیت چار افراد کی ہلاکت ہوئی۔ ہلاک ہونے والوں میں دو مقامی آرمی پورٹرز بھی شامل ہیں۔

یہ حملہ معروف اسکی ریزارٹ (Ski Resort) گلمرگ سے چھ کلومیٹر دور فوجی کی ایک گاڑی پر کیا گیا جس کے بعد حملہ آور فرار ہو گئے۔ حملہ کے فوراً بعد علاقے کو محاصرے میں لیکر تلاشی کارروائی شروع کی گئی۔ حکام نے کہا: ’’گلمرگ کے بوٹا پاتھری سیکٹر میں ہوئے حملے کے بعد گنڈولہ کیبل کار پروجیکٹ کو عارضی طور پر بند کر دیا گیا ہے جو کہ سیاحوں اور کیبل کار عملہ کی حفاظت کو یقینی بنانے کے لیے اٹھایا گیا ایک احتیاطی اقدام ہے۔‘‘

حکام کا مزید کہنا کہ مقامی انتظامیہ، سیکورٹی ایجنسیز کے ساتھ مل کر کام کر رہی ہے تاکہ صورتحال کی نگرانی کی جا سکے اور عوام خاص کر سیاحوں کی حفاظت کو یقینی بنایا جا سکے۔ گلمرگ کا گنڈولا کیبل کار اپنے قدرتی اور شاندار نظاروں، پہاڑوں کے منفرد تجربات کے لئے سال بھر سیاحوں کی متوجہ کا مرکز رہتا ہے۔ گلمرگ کا گونڈولا کیبل کار دنیا کی دوسری سب سے طویل اور سطح سمندر سے بلند ترین کیبل کار سروس ہے۔ سطح سمندر سے 13,976 فٹ کی بلندی پر واقع یہ پروجیکٹ سیاحوں کو افروٹ پہاڑی سے کونگ ڈوری تک کے نظاروں سے لطف اندوز کرتا ہے۔ گنڈولہ لفٹ پروجیکٹ دو مرحلوں پر مشتمل ہے۔