سرینگر ائیرپورٹ پر فلائٹ آپریشن بحال

Flight Operations Resume at Srinagar Airport: ہفتہ اور اتوار کی درمیانی شب برفباری کے نتیجے میں جہاں سرینگر جموں شاہراہ پر ٹریفک کی نقل و حمل متاثر ہوئی، وہیں سرینگر ایئرپورٹ پر بھی پروازیں منسوخ کی گئیں۔

سرینگر (جموں کشمیر):سرینگر کے بین الاقوامی ہوائی اڈے پر پیر کو دوبارہ سے فلائٹ آپریشن شروع کر دیا گیا ہے۔ ڈائریکڑ ایئرپورٹ کے مطابق سرینگر میں موجودہ موسمی صورتحال کے پیش نظر تمام پروازیں اپنے طے شدہ شیڈول پر اڑان بھریں گیں۔ اتوار کو وادی کشمیر کے میدانی اور بالائی علاقوں میں ہوئی تازہ برفباری اور خراب موسم کے نتیجے میں سرینگر کے بین الاقوامی ہوائی اڈے پر شیڈول شدہ تمام پروازیں منسوخ کر دی گئیں۔

سرینگر ایئرپورٹ کے ڈائریکٹر جاوید انجم نے کہا کہ اتوار کی صبح لگاتار برفباری ہونے کی وجہ سے پروازوں کو لینڈنگ اور اڑان بھرنے میں مشکلات پیش آئیں جس کے چلتے تمام پروازیں منسوخ کرنا پڑیں۔ ایسے میں آج موسم کی صورتحال کو دیکھتے ہوئے امید ہے کہ فلائٹ آپریشن بنا کسی خلل کے جاری رہے گا۔ گزشتہ کل کی برفباری سے زمینی ٹرانسپورٹ بھی متاثر ہوا ہے جبکہ ریل پٹری پر برف جمع ہونے کے باعث بانہال بارہمولہ ریل خدمات کو بھی احتیاطً معطل کرنا پڑا تھا۔ تاہم پیر کو ریل خدمات کو پھر سے بحال کیا گیا ہے۔

ادھر، جموں وکشمیر کو زمینی راستے سے باقی دنیا سے جوڑنے والی سرینگر - جموں قومی شاہراہ پر پھسلن کی وجہ سے ٹریفک بے حد دھیمی رفتار سے چل رہا ہے۔ ٹریفک پولیس نے مسافروں کو اطلاع دی ہے کہ وہ سفر شروع کرنے سے پہلے سڑک کی صورتحال دریافت کریں تاکہ آگے جاکر کسی بھی پریشانی کا سامنا نہ کرنا پڑے۔

واضح رہے کہ ہفتہ اور اتوار کی درمیان شب سرینگر سمیت وادی کشمیر کے دیگر میدانی علاقوں میں تازہ برفباری ہوئی جس میں میدانی علاقوں میں 3 سے 6 انچ جبکہ بالائی علاقوں میں 6 سے 12 انچ تک برفباری ریکارڈ کی گئی، جس کے نتیجے میں معمولات زندگی متاثر ہوئی۔ وہیں جموں و کشمیر ڈیزاسٹر منیجمنٹ اتھارٹی نے خراب موسمی صورتحال کے چلتے جموں وکشمیر کے 8 اضلاع کے لیے اگلے 24 گھنٹوں کے دوران برفانی تودے گر آنے کی وارننگ جاری کی ہے۔ ان اضلاع میں بانڈی پورہ، بارہمولہ،کپوارہ، گاندربل،کشتواڑ، پونچھ اور رام بن شامل ہیں۔