دریائے جہلم ، جھیل ڈل اور دوسرے آبی ذخائر کے نزدیک رہائش پذیر لوگوں کے لئے ایڈوائزری جاری - rain forecast advisory

محکمہ موسمیات نے وادی کشمیر میں 18 سے 20 اپریل تک موسلا دھار بارشوں کی پیشین گوئی کی ہے۔اس دوران کہیں کہیں تیز ہوائیں بھی چل سکتی ہیں، بعد ازاں وادی میں 25 اپریل تک موسم مجموعی طور پر خشک رہنے کا امکان ہے۔

سرینگر: اگلے دو دنوں کے دوران بارشوں کی پیش گوئی کے پیش نظر ضلع انتظامیہ سرینگر نے خاص طور پر آبی ذخائر کے نزدیک آباد علاقوں کے لئے ایڈوائزری جاری کی ہے۔
محکمہ موسمیات کی پیشین گوئی کے بیچ ضلعی انتظامیہ سرینگر نے جمعرات کو ایڈوائزری جاری کرتے ہوئے کہا کہ دریاوں ، ندی نالوں کے نزدیک رہائش پذیر لوگ آبی ذخائر کے نزدیک جانے سے گریز کریں۔
ایڈوائزری میں کہا گیا ہے کہ محکمہ موسمیات نے 18 سے 20 اپریل تک موسلا دھار بارشوں کی پیشین گوئی کی ہے، جس کے پیش نظر دریائے جہلم اور ندی نالوں کے نزدیک رہائش پذیر لوگوں کو مشورہ دیا جاتا ہے کہ وہ آبی ذخائر کے نزدیک جانے سے پرہیز کریں۔

ایڈوائزری میں لوگوں کو موسم کی بہتری تک ضلعی انتظامیہ کی ایڈوائزری پر من وعن عمل کرنے کی تاکید کی گئی ہے۔ضلعی انتظامیہ سرینگر کی جانب سے جاری ایڈوائزری میں ریت اور باجری نکالنے والوں ، جھیل ڈل اور دریائے جہلم میں بوٹ ، کشتیوں اور شکارا کے ذریعے سفر کرنے والوں سے کہا گیا ہے کہ متعلقہ محکمہ کے ساتھ موسمی صورتحال کی تصدیق سے پہلے دریاوں اور ندی نالوں کو عبور کرنے کی کوشش نہ کریں۔

عوام الناس سے تاکید کی گئی ہے کہ وہ کسی بھی جانکاری کے لئے ایمرجنسی آپریشن سینٹر سری نگر اور پولیس کنٹرول روم کشمیر کے ساتھ رابط قائم کریں۔

واضح رہے کہ منگل کی صبح دریائے جہلم میں کشتی الٹنے سے ایک خاتون اور اس کے دو کمسن بیٹوں سمیت 6 افراد کی موت واقع ہوئی، جبکہ تین افراد ہنوز لاپتہ ہیں۔لاپتہ افراد کے لیے سرچ آپریشن آج تیسرے روز جاری رہا۔
(یو این آئی)