واشنگٹن:سابق امریکی صدر ڈونلڈ ٹرمپ نے امریکی صدارتی انتخابات 2024 میں جیت درج کر لی ہے۔ انھوں نے عوام سے پُرجوش خطاب کیا۔ آج فلوریڈا میں اپنی وکٹری اسپیچ میں انہوں نے پرانے نعرے 'امریکہ کو پھر سے عظیم بنانا ہے' کو دہراتے ملک کو "ٹھیک" کرنے کا وعدہ کیا۔ ٹرمپ نے کہا کہ ''امریکہ نے ہمیں بے مثال اور مضبوط اکثریت دی ہے۔ یہ امریکہ کے لوگوں کے لیے شاندار جیت ہے جو ہمیں امریکہ کو پھر سے عظیم بنانے کے لائق بنائے گی۔''
ڈونلڈ ٹرمپ اپنی اہلیہ میلانیا اور اپنے بچوں کے ساتھ فلوریڈا میں جیسے ہی اسٹیج پر آئے، ان کے حامیوں نے پرجوش طریقے سے ان کا استقبال کیا اور "USA" کے زوردار نعرے لگائے۔ ریپبلکن سابق صدر ٹرمپ نے کہا کہ ہم اپنے ملک کو ابھرنے میں مدد کرنے جا رہے ہیں۔ "یہ ایک سیاسی فتح ہے جو ہمارے ملک نے پہلے کبھی نہیں دیکھی۔"
ٹرمپ نے اپنی تقریر میں وعدہ کیا کہ وہ نئی جنگیں شروع کرنے کے بجائے جاری جنگیں ختم کر دیں گے۔ قابل ذکر ہے کہ انہوں نے انتخابی مہم کے دوران بھی غزہ اور لبنان کی جنگ کو ختم کرنے کا وعدہ کیا تھا۔ انہوں نے کہا کہ آج ہم نے تاریخ رقم کی ہے، امریکا ایک بار پھر عظیم بنے گا اور ہم سب مل کر ملک کے تمام معاملات کو ٹھیک کریں گے۔