نئی دہلی: ایسا لگتا ہے کہ اننت امبانی اور رادھیکا مرچنٹ کی شادی سے پہلے کی تقریبات ابھی ختم نہیں ہوئی ہیں۔ گجرات کے جام نگر میں تین روزہ پری ویڈنگ جشن کے بعد مکیش امبانی اور نیتا امبانی ممکنہ طور پر شادی سے پہلے کی دوسری تقریب کی میزبانی کرنے کی تیاری کر رہے ہیں۔ ایک رپورٹ کے مطابق دوسری پری ویڈنگ پارٹی 28-30 مئی کو منعقد کی جائے گی۔ امبانی خاندان لگژری کروز پر تقریباً 800 مہمانوں کی میزبانی کرے گا جو تین دنوں میں 4380 کلومیٹر کا فاصلہ طے کرے گا اور اٹلی سے جنوبی فرانس کے لیے روانہ ہوگا۔
دوسری پری ویڈنگ میں سلمان خان، شاہ رخ خان، عامر خان، رنبیر کپور اور عالیہ بھٹ شرکت کریں گے۔ بتایا گیا کہ 800 مہمانوں کے علاوہ 600 مہمان نوازی کا عملہ بھی موجود ہوگا۔
اس سے قبل جام نگر میں منعقدہ تقریب میں میٹا کے بانی مارک زکربرگ، مائیکروسافٹ کے شریک بانی بل گیٹس، ریحانہ، سچن ٹنڈولکر، ایم ایس دھونی، شاہ رخ خان، عالیہ بھٹ، کترینہ کیف سمیت تقریباً 1200 مہمانوں نے شرکت کی۔