نئی دہلی: سینئر انڈین ریونیو سروس (آئی آر ایس) افسر ایم انسویا نے اپنی جنس تبدیل کروا لی ہے۔خاص بات یہ ہے کہ حکومت نے افسر کی سرکاری طور پر نام اور جنس تبدیل کرنے کی اپیل کو بھی منظور کر لیا ہے۔
آپ کو بتاتے چلیں کہ ہندوستانی سول سروس کی تاریخ میں یہ پہلا موقع ہے جب کسی افسر کو اس طرح جنس اور نام تبدیل کرنے کی اجازت دی گئی ہے۔ 35 سالہ انوسویا کسٹم ایکسائز اینڈ سروس ٹیکس اپیل اتھارٹی (سیسٹیٹ) حیدرآباد میں جوائنٹ کمشنر کے طور پر تعینات ہیں۔
درخواست وزارت خزانہ کو جمع کرائی گئی۔
وزارت خزانہ کے حکم کے مطابق، 2013 بیچ کے آئی آر ایس افسر ایم انسویا نے وزارت کو ایک عرضی پیش کی تھی۔ اس درخواست میں اس نے حکومت سے اپنا نام اور جنس تبدیل کرنے کی درخواست کی تھی۔ جس کی حکومت نے منظوری دے دی۔ یہی نہیں حکومت نے اس سلسلے میں حکم نامہ بھی جاری کر دیا ہے۔