نئی دہلی/غازی آباد: بی جے پی مہیلا مورچہ کی لیڈر ادیتا تیاگی نے آلٹ نیوز کے شریک بانی محمد زبیر کے خلاف غازی آباد کے کوی نگر پولیس اسٹیشن میں ایف آئی آر درج کرائی ہے۔ تیاگی کے مطابق، زبیر نے سوشل میڈیا پر اشتعال انگیز پوسٹس اور ویڈیوز کو مسلسل شیئر کیا۔
الزام ہے کہ 3 اکتوبر 2024 کو زبیر نے ایک ویڈیو پوسٹ کیا تھا، جو یتی نرسمہانند گری کا پرانا ویڈیو تھا۔ یہ ویڈیو ایک کمیونٹی کو اکسانے کے لیے پیش کی گئی تھی۔ تیاگی کا دعویٰ ہے کہ زبیر کی پوسٹ نے لوگوں کی زندگیوں کو خطرے میں ڈال دیا۔
جان سے مارنے کی دھمکیاں ملیں: ادیتا تیاگی نے کہا ہے کہ انہیں زبیر کی پوسٹ کے بعد جان سے مارنے کی دھمکیاں مل رہی ہیں۔ سوشل میڈیا پر مسلسل اشتعال انگیز تبصرے آرہے ہیں۔ تیاگی نے الزام لگایا ہے کہ زبیر نے بی جے پی کے کئی لیڈروں کو اسلام مخالف قرار دیتے ہوئے ایک فہرست بنائی جس میں وزیر اعلی یوگی آدتیہ ناتھ اور نند کشور گرجر کے نام بھی شامل تھے۔
اپنی شکایت میں انہوں نے مطالبہ کیا ہے کہ زبیر کے خلاف فوری طور پر ایف آئی آر درج کی جائے اور مناسب کارروائی کی جائے۔ انہوں نے کہا کہ اگر بروقت کارروائی نہ کی گئی تو مزید لوگوں کی زندگیوں کو خطرہ لاحق ہو سکتا ہے۔ غازی آباد پولیس نے تیاگی کی اس شکایت پر مقدمہ درج کیا ہے۔ زبیر کے خلاف انڈین کوڈ آف جسٹس (بی این ایس) 2023 کی دفعہ 196، سیکشن 228، سیکشن 299، سیکشن 356(3) اور سیکشن 351(2) کے تحت مقدمہ درج کیا گیا ہے۔
