نئی دہلی: وزیر اعظم نریندر مودی نے منگل کو سابق وزیر اعظم اندرا گاندھی کو ان کی یوم پیدائش پر خراج عقیدت پیش کیا۔ اس موقع پر کانگریس صدر ملکارجن کھرگے، راہل گاندھی، پرینکا گاندھی اور کانگریس کے دیگر بڑے لیڈروں نے دہلی کے شکتی استھل پر خراج عقیدت پیش کیا۔
پی ایم مودی برازیل میں تین ملکوں کے دورے پر ہیں۔ یہاں سے انہوں نے سابق وزیر اعظم اندرا گاندھی کو خراج عقیدت پیش کیا۔ انہوں نے سوشل میڈیا ایکس پر لکھا، 'ہماری سابق وزیر اعظم مسز اندرا گاندھی کو ان کی یوم پیدائش پر خراج عقیدت۔'
راہول گاندھی نے اندرا گاندھی کے ساتھ بچپن کی تصاویر سوشل میڈیا پر شیئر کیں اور ایک پوسٹ میں لکھا کہ کس طرح ان کی دادی اندرا گاندھی ہمت اور محبت کی مثال تھیں۔
پوسٹ میں لکھا گیا، 'دادی ہمت اور محبت دونوں کی مثال تھیں۔ ان سے ہی میں نے سیکھا ہے کہ اصل طاقت قومی مفاد کے راستے پر بے خوف ہو کر چلنا ہے۔ ان کی یادیں میری طاقت ہیں جو مجھے ہمیشہ راستہ دکھاتی ہیں۔
پرینکا گاندھی نے لکھا، 'میری دادی محترمہ اندرا گاندھی نے ہمیشہ مہاراشٹر کے نندربار سے اپنی انتخابی مہم شروع کرت تھیں۔ ان کا ماننا تھا کہ قبائلی معاشرے کی ثقافت بہترین اور منفرد ہے کیونکہ یہ فطرت کا احترام اور تحفظ کرتی ہے۔ جب وہ وزیراعظم بنیں تو انہوں نے قبائلی برادریوں کو بااختیار بنانے کے لیے بہت سے اہم قوانین بنائے۔ انہوں نے اپنی پالیسیوں سے قبائلیوں، دلتوں، پسماندہ لوگوں اور غریبوں کو سب سے زیادہ مضبوط کیا۔ آج، کانگریس پارٹی ذات پر مبنی مردم شماری اور ایس سی، ایس ٹی اور او بی سی کے لیے ریزرویشن کی حد کو پاس فیصد سے بڑھا کر اندرا گاندھی کے نظریات کو آگے بڑھا رہی ہے۔ دادی جی ! آپ کی طرف سے دی گئی خدمات اور اقدار کا سبق ہمیشہ ہمارے ساتھ رہے گا۔
کانگریس صدر ملکارجن کھرگے نے بھی نئی دہلی میں شکتی استھل میں اندرا گاندھی کو خراج عقیدت پیش کیا۔ کھرگے نے ایک پوسٹ میں لکھا ہے کہ بہت سے لوگوں نے 'آئرن لیڈی آف انڈیا' سے تحریک لی، جو زندگی بھر کی جدوجہد، ہمت اور متحرک قیادت کی مجسم تصویر تھیں۔ کھرگے کی پوسٹ میں لکھا گیا، 'کروڑوں ہندوستانی 'آئرن لیڈی آف انڈیا' اندرا گاندھی کی زندگی سے تحریک حاصل کرتے رہیں گے، کیونکہ وہ زندگی بھر کی جدوجہد، ہمت اور متحرک قیادت کی مجسم تصویر تھیں۔ انہوں نے قوم کی تعمیر میں بے لوث کردار ادا کیا۔ انہوں نے ہندوستان کے اتحاد اور سالمیت کو برقرار رکھنے کے لیے اپنی جان قربان کی۔ ان کے یوم پیدائش پر ہمارا عاجزانہ خراج عقیدت۔
اندرا گاندھی 19 نومبر 1917 کو ہندوستان کے پہلے وزیر اعظم پنڈت جواہر لال نہرو اور کملا نہرو کے ہاں پیدا ہوئیں۔ اندرا گاندھی نے جنوری 1966 سے مارچ 1977 تک اور پھر جنوری 1980 سے اکتوبر 1984 میں ان کے قتل تک پہلی اور واحد خاتون وزیر اعظم کے طور پر خدمات انجام دیں۔
