بھوپال:مدھیہ پردیش کے سابق وزیر اور بھوپال کے سابق ایم ایل اے عارف عقیل طویل علالت کے بعد انتقال کر گئے۔ انہوں نے پیر کی صبح بھوپال کے ایک نجی اسپتال میں آخری سانس لی۔ عارف عقیل کی عمر 72 برس تھی۔ وہ 6 بار بھوپال نارتھ سے ایم ایل اے رہ چکے ہیں۔
کانگریس کے سینئر لیڈر اور سابق ایم ایل اے عارف عقیل طویل عرصے سے خرابی صحت میں مبتلا تھے۔ انہیں سینے میں درد کی شکایت پر اپولو اسپتال میں داخل کرایا گیا تھا۔ سابق وزیر اعلی شیوراج سنگھ چوہان، کانگریس کے ریاستی صدر جیتو پٹواری نے ان کے انتقال پر دکھ کا اظہار کیا ہے۔
عارف عقیل نے مسلسل جیت کا ریکارڈ بنایا:
بھوپال کی شمالی اسمبلی وہ سیٹ ہے جہاں سے ایم پی کے واحد مسلم ایم ایل اے عارف عقیل نے مسلسل الیکشن جیتنے کا ریکارڈ بنایا ہے۔ انہوں نے خرابی صحت کی وجہ سے 2023 کے اسمبلی انتخابات میں حصہ لینے سے انکار کر دیا تھا۔ تب کانگریس نے ان کے بیٹے عاطف عقیل کو اپنا امیدوار بنایا تھا۔ جہاں عاطف عقیل نے بڑی فتح حاصل کی تھی۔
شیرِ بھوپال کے نام سے پہچان بنائی:
بھوپال کے شیر کہلائے جانے والے عارف عقیل کے انتقال کی خبر سے شہر میں سوگ کی لہر دوڑ گئی ہے۔ بھوپال کے لوگوں کے پسندیدہ رہنما عارف عقیل نے انتہائی سادہ زندگی گزاری۔ اپنے اسمبلی حلقہ کے بہت سے علاقے آباد کیے۔ انہوں نے بہت سے بے گھر لوگوں کو گھر فراہم کیے۔ 40 سال سے بھوپال کی شمالی اسمبلی سے سیاست میں رہنے والے عارف عقیل کانگریس کے دور حکومت میں دو بار وزیر بھی رہ چکے ہیں۔ انہوں نے اقلیتی بہبود، جیل، خوراک جیسے اہم محکموں کی ذمہ داری نبھائی ہے۔ اس عرصے میں انہوں نے زبردست مقبولیت حاصل کی۔
عارف عقیل 1990 میں آزاد امیدوار منتخب ہوئے:
مدھیہ پردیش کی بھوپال شمالی اسمبلی سیٹ کے لیے پہلی بار 1977 میں انتخابات ہوئے تھے۔ اس وقت جنتا پارٹی کے حامد قریشی الیکشن جیت چکے تھے۔ 1980 میں ہونے والے انتخابات میں انڈین نیشنل کانگریس کے رسول احمد صدیقی نے الیکشن جیتا تھا۔ صدیقی نے 1985 میں بھی الیکشن جیتا تھا۔ 1990 کے انتخابات میں عارف عقیل نے آزاد امیدوار کے طور پر الیکشن لڑا اور پہلی بار منتخب ہوئے۔ لیکن 1993 کے اسمبلی انتخابات میں وہ بی جے پی کے رمیش شرما سے الیکشن ہار گئے۔ عارف عقیل اس نشست سے 2003، 2008، 2013 اور 2018 میں مسلسل الیکشن جیتتے رہے۔ اس دوران بی جے پی نے کئی چہرے میدان میں اتارے لیکن ہر بار کانگریس جیت گئی۔ 2023 کے اسمبلی انتخابات میں عارف عقیل کے جانشین کے طور پر ان کے بیٹے عاطف علی کو میدان میں اتارا گیا اور بی جے پی لہر کے بعد بھی بی جے پی یہ سیٹ نہیں جیت سکی۔ عارف عقیل کو اس جیت کی وجہ سمجھا گیا۔
