اڈانی معاملہ: راہل گاندھی کا گوتم اڈانی کی گرفتاری کا مطالبہ، کہا 'وہ اب تک آزاد کیوں گھوم رہے ہیں'

اڈانی کے خلاف امریکی عدالت میں فرد جرم عائد ہونے کے بعد کانگریس نے حکومت اور اڈانی گروپ کے خلاف محاذ کھول دیا ہے۔

نئی دہلی: امریکی حکومت کی جانب سے شمسی توانائی کے ٹھیکے کیلئے رشوت کے معاملے میں صنعت کار گوتم اڈانی اور دیگر لوگوں پر الزامات عائد کیے جانے کے بعد کانگریس بی جے پی پر حملہ آور ہو گئی ہے۔ اڈانی معاملے پر کانگریس رہنماؤں نے مرکزی حکومت اور بی جے پی پر سنگین الزامات عائد کیے ہیں۔

کانگریس کے رکن پارلیمنٹ اور لوک سبھا میں اپوزیشن لیڈر راہل گاندھی نے دہلی میں ایک پریس کانفرنس کے دوران کہا کہ 'حکومت اس معاملے میں کارروائی نہیں کر رہی ہے۔ اس معاملے کو پارلیمنٹ میں اٹھائیں گے۔ اڈانی کیس کی جے پی سی انکوائری ہونی چاہیے۔

انہوں نے امریکی فرد جرم پر رد عمل دیتے ہوئے کہا کہ 'اب امریکہ میں یہ بات بالکل واضح اور مستحکم ہو گئی ہے کہ اڈانی نے امریکی اور ہندوستانی قانون کو توڑا ہے۔ ان پر امریکہ میں فرد جرم عائد کیا گیا ہے اور میں حیران ہوں کہ اڈانی آج بھی اس ملک (بھارت) میں آزاد کیوں گھوم رہے ہیں۔'

راہل گاندھی نے اڈانی معاملے میں جے پی سی کی مانگ کرتے ہوئے کہا کہ 'جے پی سی ضروی ہے، اسے ہونا چاہیے، لیکن اب سوال یہ ہے کہ اڈانی جیل میں کیوں نہیں ہیں؟ امریکی ایجنسی نے کہا کہ انہوں نے بھارت میں جرم کیا ہے، رشوت دی ہے۔ مہنگے داموں بجلی فروخت کی گئی۔'

انہوں نے پی ایم مودی پر نشانہ لگاتے ہوئے کہا کہ 'وزیراعظم کچھ نہیں کر رہے، وہ کچھ نہیں کر سکتے۔ اگر وہ کچھ کرنا چاہیں تو بھی نہیں کر سکتے کیونکہ وہ اڈانی کے کنٹرول میں ہیں۔'

کانگریس رہنما نے کہا کہ 'نوٹ کر لیں، انہوں نے 2000 کروڑ کا گھوٹالہ کیا ہے لیکن میں آپ کو گارنٹی دیتا ہوں، اس آدمی کو نہ تو گرفتار کیا جائے گا اور نہ ہی اسے جانچ کا سامنا کرنا پڑے گا کیونکہ وزیر اعظم اس سے جڑے ہوئے ہیں۔'