نئی دہلی: پاکستان، بنگلہ دیش اور افغانستان کے غیر دستاویزی غیر مسلم تارکین وطن کو فاسٹ ٹریک شہریت دینے کے لیے متنازعہ شہریت ترمیمی قانون 2019 (سی اے اے) کے نفاذ کے قواعد لوک سبھا انتخابات کے لیے ماڈل ضابطہ اخلاق کے نافذ ہونے سے پہلے جاری کیے جانے کا امکان ہے۔ انتخابی شیڈول کا اعلان ہوتے ہی ماڈل ضابطہ اخلاق نافذ ہو جاتا ہے۔ انتخابی شیڈول کا اعلان اگلے پندرہ دن میں کیا جا سکتا ہے۔
ذرائع نے بتایا کہ انتخابی ضابطہ اخلاق کے نافذ ہونے سے پہلے سی اے اے کے قواعد جاری کیے جا سکتے ہیں۔ سی اے اے کے قواعد جاری ہونے کے بعد، مودی حکومت مظلوم غیر مسلم تارکین وطن - ہندو، سکھ، جین، بدھ، پارسی اور عیسائی - جو بنگلہ دیش، پاکستان اور افغانستان سے 31 دسمبر 2014 تک بھارت پہنچے تھے، ان کو بھارت کی شہریت دینا شروع کر دے گی۔ سی اے اے دسمبر 2019 میں منظور کیا گیا تھا اور اسے صدر جمہوریہ کی منظوری مل گئی تھی۔
تاہم اس قانون پر ابھی تک عمل درآمد نہیں ہوا ہے اور اس کے نفاذ کے لیے قواعد ضروری ہیں۔ پارلیمنٹ سے سی اے اے کی منظوری کے بعد ملک کے کچھ حصوں میں بڑے پیمانے پر مظاہرے ہوئے۔ مظاہروں اور پولیس کی کارروائی کے دوران سو سے زائد افراد اپنی جانوں سے ہاتھ دھو بیٹھے۔ وزارت داخلہ نے درخواست دہندگان کی سہولت کے لیے ایک پورٹل تیار کیا ہے اور پورا عمل آن لائن ہوگا۔