نئی دہلی: دہلی ہائی کورٹ نے شمال مشرقی دہلی میں تشدد کے دوران قومی ترانہ گانے پر مجبور کرنے پر پولیس کے ذریعہ پانچ مسلم نوجوانوں کی پٹائی کی سی بی آئی تحقیقات کا حکم دیا ہے۔ جسٹس انوپ جے رام بھمبھانی کی بنچ نے یہ حکم دیا ہے۔ اس معاملے کی سماعت کے دوران ہائی کورٹ نے دہلی پولیس کی سخت سرزنش کی تھی اور کہا تھا کہ وہ فرانزک رپورٹ کے لیے زیادہ انتظار نہیں کر سکتے۔
درحقیقت، دہلی پولیس کی جانب سے پیش ہونے والے وکیل نے سماعت کے دوران کہا کہ نیشنل فارنسک سائنس یونیورسٹی، گجرات سے کچھ ویڈیو فوٹیج کی فرانزک رپورٹ ابھی آنا باقی ہے۔ اس پر عدالت نے برہمی کا اظہار کرتے ہوئے کہا کہ عدالت گجرات میں جاری فرانزک تحقیقات کو روک سکتی ہے۔ عدالت فرانزک رپورٹ کا انتظار نہیں کر سکتی۔ فرانزک رپورٹ کا طویل عرصے سے انتظار تھا، یہ انتظار کب ختم ہوگا؟ اس کے لیے کچھ وقت مقرر کیا جائے۔
دہلی ہائی کورٹ نے دہلی پولیس کو مسلم نوجوانوں کی پٹائی کرنے والے پولیس اہلکاروں کی شناخت اور تفتیش میں لاپرواہی کا رویہ اپنانے پر سرزنش کی۔ عدالت نے کہا تھا کہ مرنے والے نوجوان کی پوسٹ مارٹم رپورٹ میں زخمیوں کی تعداد زیادہ ہے۔ ایم ایل سی میں رجسٹرڈ زخمیوں کی تعداد میں کیسے اضافہ ہوا؟ عدالت نے کہا تھا کہ پولیس کی تحقیقاتی رپورٹ میں بہت سی غلطیاں ہیں۔ پانچ نوجوانوں میں سے ایک کی موت ہو گئی، لیکن چار زندہ ہیں۔ کیا ان پولیس اہلکاروں کی شناخت زندہ بچ جانے والے نوجوانوں سے ہوئی؟ پوری دنیا کی چھان بین کرو گے لیکن عینی شاہدین سے جرح نہیں کرو گے۔ انہوں نے ان چار نوجوانوں کے بیانات قلمبند کرنے کی زحمت تک نہیں کی یہ کیسی تحقیقات ہے؟
واضح رہے کہ سوشل میڈیا پر جنا گنا-منا نام کا ایک ویڈیو وائرل ہوا تھا، جس میں پانچ مسلم نوجوان پولیس والوں کے گھیرے میں ہیں۔ اس دوران پولیس ان پر قومی ترانہ گانے کے لیے دباؤ ڈال رہی ہے۔ یہ نوجوان زمین پر بے یارو مددگار پڑے ہیں۔ پولیس انہیں مار رہی ہے۔ فیضان نامی نوجوان کو پولیس نے 24 فروری 2020 کو گرفتار کیا اور 25 فروری 2020 کو انتہائی تشویشناک حالت میں رہا کر دیا گیا۔ انہیں ہسپتال میں داخل کرایا گیا جہاں 26 فروری 2020 کو ان کی موت ہو گئی۔
درخواست فیضان کی والدہ نے دائر کی تھی۔ درخواست میں کہا گیا کہ 25-26 فروری 2020 کی درمیانی رات فیضان نے اپنی والدہ کو بتایا کہ پولیس نے اسے تشدد کا نشانہ بنایا۔ درخواست میں کہا گیا ہے کہ فیضان کو جیوتی نگر پولیس اسٹیشن میں غیر قانونی حراست میں رکھا گیا تھا اور فیضان کو حالت خراب ہونے کے باوجود بھی کو علاج فراہم کرنے سے انکار کیا گیا تھا۔ جب اس کی مزید حالت خراب ہوئی تو پولیس کا خیال تھا کہ وہ زندہ نہیں رہ سکے گا اس لیے اسے چھوڑ دیا گیا۔ درخواست میں کہا گیا کہ اس معاملے میں قتل کا مقدمہ درج کر لیا گیا ہے تاہم تحقیقات میں پولیس اہلکاروں کو بچانے کی کوشش کی جا رہی ہے۔
